Республикэм имэкъумэщ хъызмэт хэхъоныгъэ егъэшIыгъэнымкIэ къэра­лыгъо программэхэр, лъэпкъ проектхэр гъэфедэгъэнхэр, IэпыIэ­гъумкIэ Iофтхьабзэхэм зягъэушъомбгъугъэныр — ахэр ыкIи нэмыкI
пшъэрылъхэр Адыгеим и ЛIышъхьэу КъумпIыл Мурат къыщигъэ­нэ­фагъэх министрэхэм я Кабинет иIэгъэ зэхэсыгъом.

Ащ хэлэжьагъэх АР-м и ­Къэралыгъо Совет — Хасэм и Тхьаматэу Владимир На­рожнэр, муниципальнэ обра­зованиехэм япащэхэр.
Республикэм ипащэ къызэ­рэхигъэщыгъэмкIэ, федеральнэ гупчэм къытырэ амалхэр гъэфедэгъэнхэм, фермерхэр на­хьыбэу шIуагъэ къэзыхьырэ программэхэм ахэгъэлэжьэгъэн­хэм мэхьанэшхо яI. Гущы­Iэм пае, «АгростартапымкIэ» илъэситфым къыкIоцI (2023 — 2024-м) IофшIэныр зыублэгъэкIэ фермери 173-мэ сомэ миллион 360,8-рэ хъурэ грантхэр аратыгъэх. А программэмкIэ IофшIэнхэр лъэкIуатэх. БэмышIэу АР-м мэкъу-мэщымкIэ и Министерствэ «АгростартапымкIэ» зэнэкъокъоу кIуагъэм икIэуххэр щызэфахьысыжьы­гъэх.

АР-м мэкъу-мэщымкIэ иминистрэу Къуанэ Анзаур къы­зэриIуагъэмкIэ, лъэIу тхылъ 40 къаIэкIэхьагъ, ахэм ащыщэу 24-мэ адырагъэштагъ, азыныкъом на­хьыбэр Кощхьэблэ районым къикIыгъ. IофшIэныр езгъэжьэгъэкIэ фермерхэм ащ тетэу сомэ миллиони 109-рэ хъурэ субсидиехэр къаIэкIэхьащтых. Ахъщэр зыпэIуагъэхьащтыр гъэщымрэ лымрэ якъэхьыжьынкIэ былымхъуным хэхъоныгъэ егъэшIыгъэныр, дагъэ зыхашIыкIырэ культурэхэр, хэтэрыкIхэр, нэшэ-­хъырбыдзхэр нахьыбэу къэхьыжьыгъэнхэр ары.

Адыгэ Республикэм исоциальнэ-экономикэ хэхъоныгъэкIэ унэе программэм тегъэпсыхьагъэу IэпыIэгъумкIэ Iофтхьэ­бзакIэм хэушъхьафыкIыгъэу зэхэсыгъом илъэхъан анаIэ тырарагъэдзагъ. Мы илъэсым къыщегъэжьагъэу цумпэ ­лъэпкъ зэфэшъхьафхэм якъэхьыжьын пэIухьащт ахъщэм изы Iахь телъытэгъэ субсидиехэр чIыгулэжьхэм къызфагъэфедэн алъэ­кIыщт. 2025-рэ илъэсым къыщегъэ­жьагъэу 2027-м нэс а гухэлъхэм сомэ миллион 300 апэIуагъэхьанэу рахъу­хьагъ. Ащ нэмыкIэу бюджетым къыхимыубытэрэ инвестициехэу сомэ миллион 30-м ехъухэрэр къызфагъэфедэщтых, фермер хъызмэтшIапIэхэр кIэу зэхащэщтых, IофшIэпIэ чIыпIакIэхэр щыIэ хъущтых. Къэралыгъо IэпыIэгъур зэратыхэрэм 2030-рэ илъэсым ыкIэм ехъулIэу пстэумкIи цумпэ лъэпкъ зэфэшъхьафэу тонн 547-рэ фэдиз къахьыжьын фае.

ЗэIукIэгъум илъэхъан зэнэкъокъум зэрэхэлэжьэщтхэмкIэ, ахъщэр зэратырагощэщтымкIэ Iофыгъо заулэхэм атегущыIагъэх. Ахэр анахьэу зыфэгъэхьыгъагъэхэр цумпэ лъэпкъ зэфэшъхьафхэр гъэфэбапIэхэм ыкIи чIыгум къазэрэщагъэкIыщтхэр ары.
«Грант программэхэмрэ IэпыIэгъум къыдилъытэрэ нэмыкI Iофтхьабзэхэмрэ амалышIухэр къатыщтых фермерхэм хэхъоныгъэ ашIынымкIэ ыкIи къоджэ­дэсхэм ящыIакIэ нахьышIу хъунымкIэ. Унэе бизнесым хэхъоныгъэ егъэшIыгъэ­нымкIэ цIыфхэм амалхэр ятэгъэгъотых, ащ ишIуагъэкIэ мэкъумэщ хъызмэтым хэхъоныгъэ ешIы, муниципалитет пэпчъ къыщахьыжьырэр нахьыбэ мэхъу, Iоф­шIэпIэ чIыпIакIэхэр зэхащэх, къоджэ псэу­пIэхэм адэсхэм IофшIэни нахь агъоты. Арышъ, АР-м мэкъу-мэщымкIэ и Министерствэ чIыгулэжьхэм грант IэпыIэгъу ятыгъэнымкIэ, ящыкIэгъэ къэ­барыр аIэкIэгъэхьэгъэнымкIэ, ищыкIэгъэ тхылъхэр гъэхьазырыгъэнхэмкIэ ыкIи угъоигъэнхэмкIэ ишIуагъэ аригъэкIын фае», — къыIуагъ КъумпIыл Мурат.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.