Художественнэ творчествэмкIэ Дунэе фестиваль-зэнэкъокъоу «Адыгеим ижъогъожъыехэр» зыфиIорэр Мыекъуапэ щыкIуагъ. АР-м культурэмкIэ и Министерствэрэ Лъэпкъ культурэм и Гупчэрэ ащ кIэщакIо фэхъугъэх. Хэгъэгум иухъумакIо и Илъэс къыдыхэлъытагъэу ар рагъэкIокIыгъ.

Шъолъыр 13-мэ къарыкIыгъэ ныбжьыкIэхэр фестивалым хэлэжьагъэх. IэкIыб къэралыгъохэу Армением, Тыркуем, Сирием, Бангладеш, Танзанием, Чад къарыкIыгъэ творческэ купхэр Iофтхьабзэм хэлэжьагъэх. Урысыем ишъолъырыкIэхэу Донецкэ ыкIи Луганскэ народнэ республикэхэм апэрэу зэнэкъокъум зыщаушэтыгъ. Къырым, Къэрэщэе-Щэр­джэсым, Адыгеим, Къалмыкъым, Краснодар ыкIи Ставрополь крайхэм, Астраханскэ, Воронеж, Ростов, Тюменскэ, Ульяновскэ хэкухэм къарыкIыгъэхэр зэхахьэм къекIолIагъэх.
Лъэныкъо зэфэшъхьафхэмкIэ ныбжьыкIэхэм зыкъагъэлъэгъуагъ — орэдкъэIонымкIэ, къэшъонымкIэ, Iэмэ-псымэхэм мэкъамэхэр къягъэIогъэнымкIэ, цирк искусствэмкIэ, художественнэ гущыIэмкIэ.
— «Адыгеим ижъогъожъыехэр» зыфиIорэ фестивалыр Iоф­тхьэбзэ анахь шъхьаIэмэ ащыщ хъугъэ. Илъэс къэс ащ зеушъом­бгъу, хэлэжьэрэ артист ныбжьыкIэхэм яIэпэIэсэныгъэ ха­гъахъо. Ар зихьатырыр зыгъасэхэрэр ары. Мыгъэрэ Iофтхьабзэм Урысыем ишъолъыр 13-мэ, къэралыгъуи 6-мэ ялIыкIохэр хэлэжьагъэх, тапэкIэ джыри ащ нахь зедгъэушъомбгъущт, — къыIуагъ АР-м культурэмкIэ иминистрэу Аулъэ Юрэ.
IэкIыб къэралыгъохэм ялIыкIохэр зэнэкъокъум заочнэ шIыкIэм тетэу хэлэжьагъэх. Ахэм къагъэхьыгъэ видеотехыгъэхэм осэшIхэр ахэплъагъэх, тикъэралыгъо ишъолъыр зэфэшъхьафхэм къарыкIыгъэхэр Мыекъуапэ щызэнэ­къокъугъэх. УФ-м ыкIи Адыгеим культурэмрэ искусствэмрэкIэ яIофышIэшхо­хэр ары осэшI купым хэтыгъэхэр. Лъэ­ныкъо пэпчъкIэ ахэм зэфэхьысыжьхэр ашIыгъэх, текIоныгъэ къыдэзыхыгъэ­хэр агъэнэфагъэх.

«Орэд къэIоныр» зыфиIорэ лъэны­къомкIэ Гран-прир зыфагъэшъошагъэр Луганскэ Народнэ Республикэм къикIыгъэ лъэпкъ орэдыIо купэу «Алая роза» зыфиIорэр ары. «Iэмэ-псымэхэм ямэкъамэхэр» зыфиIорэмкIэ анахь дэгъур Мыекъопэ районым илъэпкъ ансамблэу «АрсДхол» зыцIэр ары. Лъэныкъоу «Художественнэ гущыI» зыфиIорэм ащытекIуагъ къалэу Краснодар къикIыгъэ Марина Шпунарь. «Цирк исскуствэр» зыфиIорэ лъэныкъом апэрэ чIыпIэр къыщыдихыгъ къалэу Ульяновскэ илIыкIоу Виктория Даниловам.
Iофтхьабзэм къыдыхэлъытэгъагъ кIэлэцIыкIухэмрэ ныбжьыкIэхэмрэ ясурэт­шIыгъэхэм, яIэпэщысэхэм якъэгъэлъэгъон, ащ дакIоу шъолъырхэм къарыкIыгъэхэм апае лекцие зэхащагъ. Джащ фэдэу Лъэпкъ музейми ащагъэх.
Фестивалым зэфэхьысыжьхэр фэп­шIымэ пытагъэ хэлъэу къэпIон плъэ­кIыщт «Адыгеим ижъогъожъыехэр» респуб­ликэм имызакъоу нэмыкI шъолъырхэми ащызэлъашIэ зэрэхъугъэр.
Сэнаущыгъэ зыхэлъ артист ныбжьыкIэхэм IэпыIэгъу афэхъугъэным, культурэм ылъэныкъокIэ зэпхыныгъэу яIэр гъэпытэгъэным ар фэIорышIагъ.
Лъэпшъыкъо Фатим.