Къэралыгъо фондэу «Хэгъэгум иухъумакIохэр» зыфиIорэм ипшъэрылъ шъхьаIэхэм ащыщ пат­риотическэ пIуныгъэр. Ащ епхыгъэу Урысыем и Мафэ ипэгъокIэу Мые­къопэ къэралыгъо технологическэ университетым лIыхъужъны­гъэм идесэ щызэхащагъ.

Iофтхьабзэр шъолъыр фондым пхырищырэ проектэу «ЛIы­хъужъэу къэхъухэрэп» ыкIи уры­сые проектэу «ЛIыхъужъхэм афэгъэхьыгъэ зэдэгущыIэгъу­хэр» зыфиIохэрэм къадыхэ­лъытагъ.
ХэушъхьафыкIыгъэ дзэ операцием иветеранэу Александр Махневыр апшъэрэ еджапIэм истудентхэм аIукIагъ, къулыкъур зэрихьыгъэр къафиIотагъ, Хэгъэгум иухъумакIохэмкIэ физическэ ыкIи гукIочIэ ухьазырыныгъэу ахэлъым мэхьа­нэшхо зэриIэм ныбжьыкIэхэм анаIэ тыраригъэдзагъ.
Александр Махневым къы­Iотэгъэ къэбарэу еджакIохэм нахь ашIогъэшIэгъон хъугъэр дзэ операцием щыIэзэ, кIэлэцIыкIухэм къатхыгъэ письмэхэу шIушIэ IэпыIэгъум къыхэ­кIы­гъэхэм яджэхэзэ дзэкIолI-
хэм ащыщ къызэтыричыгъэр ежь икIалэ къытхыгъэу къызэ­рэчIэкIыгъэр ары. ГушIо нэпсхэр ащ къызэрехыгъэхэр дзэ­кIолIхэм зэхашIагъ. ЗэуапIэм ыкIыб къикIырэ IэпыIэгъум тиухъумакIохэм мэхьанэ зэрэратырэм мы хъугъэ-шIагъэр ишыхьат.
Апшъэрэ еджапIэм щыкIогъэ зэIукIэгъум факультет зэ­фэшъхьафхэм ащеджэрэ нэб­гырэ 30 фэдиз хэлэжьагъ. НыбжьыкIэхэр якъэралыгъо рыгушхонхэм ыкIи Хэгъэгум иухъумакIохэм ялIыгъэ лъытэныгъэ фашIыным мыщ фэдэ Iофтхьабзэхэр афэIорышIэх.