Дунаир къызыфабэу, уц­хэр нахь къэкIынхэу зыфежьэкIэ, уз щынагъо­хэр зезыхьэрэ бамыкIым Адыгеим ичIыпIэхэм защиушъомбгъоу хабзэ.

Ащ къыдыхэлъытагъэу бамыкIым зэрихьэрэ уз щынагъом, «клещевой вирусный энцефалит» зыфаIорэр зиIэхэм якъы­хэгъэщынкIэ гъэтхапэм и 6-м къыщегъэжьагъэу Роспотребнадзорым и ГъэIорышIапIэу АР-м щыIэм тхьамафэ къэс уплъэкIунхэр зэхещэх. Ащ фэ­гъэ­хьыгъэу эпидемиологие лъып­лъэнымкIэ ГъэIорышIапIэм иотдел иIофышIэу Шэуджэн Нуриет «Адыгэ макъэр» гущыIэгъу фэхъугъ.
— Тызхэт илъэсым имэкъуогъу и 16-м ехъулIэу къытIэ­кIэхьэгъэ къэбарымкIэ, мы илъэсыр къызихьагъэм къыщегъэжьагъэу бамыкIыр къяцэ­къагъэу нэбгырэ 444-мэ ме­дицинэ учреждениехэм зафа­гъэзагъ, ахэм ащыщэу 251-р кIэлэ­цIыкIух. ИкIыгъэ илъэсым мыщ фэдэ иуахътэ ебгъапшэ-
мэ, нэбгырэ 446-мэ бамыкIыр яцэкъагъэу агъэунэфыгъ, 247-р — кIэлэцIыкIух. ЗэрэхъурэмкIэ, кIэлэцIыкIоу бамыкIыр къызэцэкъагъэхэм япчъагъэ мыгъэ проценти 3-кIэ нахьыб, — къы­Iуагъ Шэуджэн Нуриет.
ТигущыIэгъу къызэрэхигъэщыгъэмкIэ, зэкI пIоми хъунэу республикэм ирайонхэм бамыкIыр къыщяцэкъагъэу агъэунэфыгъ. Анахьыбэу зыщыхъугъэр Мыекъуап ыкIи Адыгэкъал, ащ къыкIэлъэкIох Мыекъопэ, Тэ­хъутэмыкъое ыкIи Красногвардейскэ районхэр.
— Адыгэ Республикэм бамыкI лъэпкъ зэфэшъхьафыбэ къыщыхагъэщы, ау анахь
шъхьэIи 4-р ары тыуплъэкIурэр. Непэ ехъулIэу ахэм ахэхьэрэ бамыкI зэфэшъхьаф 318-у АР-м къэбзэныгъэмрэ эпидемиоло­гиемрэкIэ и Гупчэ щауплъэ­кIугъэхэм уз щынагъохэу «клещевой боррелиоз» зыфиIорэр къахагъэщыгъ. БамыкIыр зэцэкъагъэхэм ащыщэу зы нэбгыр мы узыр зиIэу агъэунэфыгъэр, — хигъэунэфыкIыгъ тигущы­Iэгъу.
БамыкIхэм зэрахьэрэ узхэр нахь псынкIэу къыхэгъэщыгъэнхэм фэшI ахэр къызэцэкъагъэ­хэм афэгъэхьыгъэ къэбарыр псынкIэу алъагъэIэсы нэбгырэ пэпчъ зэпхыгъэ медицинэ учреждениехэм, ахэм алъыплъэнхэм, учетым хагъэуцонхэм афэшI.
ЦIыфхэм япсауныгъэ къэухъу­мэгъэным, бамыкIхэм зэрахьэрэ узхэм ахэр ащыухъумэгъэнхэм афэшI Роспотребнадзорым АР-мкIэ и ГъэIорышIапIэ унашъохэр ышIыгъэх. Ахэм къащыгъэнэфагъэх министерствэхэм, къулыкъухэм, муниципальнэ образованиехэм зэшIуахын фэе Iоф­тхьабзэхэр. Пстэуми апэ рагъэ­шъырэр кIэлэцIыкIу зыгъэпсэфыпIэ, былымхэр зыщагъэхъурэ, цIыфхэр бэу зыщызэIукIэхэрэ чIыпIэхэм щэнаутхэр атеутхэгъэнхэр ары.
— Анахьэу тынаIэ зытедгъэ­тыхэрэр кIэлэцIыкIу зыгъэпсэфыпIэхэр, еджапIэхэм къащызэIуахыгъэ мэфэ лагерьхэр ары. Ахэм яIофшIэн рамыгъажьэзэ, бамыкIхэр зыгъэкIодырэ щэ­наутхэр къапыщылъ щагухэм атыракIагъэх. Ащ ишIуагъэ къы­зэрэкIуагъэм ишыхьат а чIыпIэ­хэм бамыкIыр къащяцэкъагъэу джыри зы хъугъэ-шIагъэ къызэрэхэмыкIыгъэр, — къыхи­гъэщыгъ Нуриет.
Джащ фэдэу гъэзетым иамал тигущыIэгъу къызфигъэфедэзэ, чIыопсым къыщызыкIухьэрэ цIыфхэм зафегъазэ нахь зыфэ­сакъыжьынхэу, бамыкIыр къыо­зымыгъэкIолIэрэ шIыкIэхэр агъэ­федэнхэу. Щыгъынхэр, Iэпкъ-­лъэпкъхэр къаплъыхьанхэ фае. БамыкIыр къызыплъэгъукIэ, ищыкIэгъэ Iэмэ-псымэхэр бгъэфедэхэзэ пкъышъолым псынкIэу къытепхын ыкIи меди­цинэ учреждением охътэ кIэ-
кIым уекIолIэн фае.
Iэшъынэ Сусан.