Урысые Федерацием и ­Следственнэ комитет Адыгэ Рес­публикэмкIэ иследственнэ гъэIорышIапIэ Тэхъутэмыкъое районымкIэ иследственнэ отдел иследовательхэм къаугъоигъэ материалхэмкIэ зыныбжь имыкъугъэ Д. Ю. Демешко Урысыем и Уголовнэ кодекс ия 159.6-рэ статья ия 3-рэ Iахь ипунктэу «в-м», ия 272-рэ статья ия 4-рэ Iахь зигугъу къа­шIырэ бзэджэшIэгъэ 18 зэрихьагъэкIэ хьыкумым ыгъэмысагъ.
Нафэ къызэрэхъугъэмкIэ, 2024-рэ илъэсым имэлылъ­фэгъу-жъоныгъокIэ мазэхэм бзэджэшIэ купым хэтэу Д. Ю. Демешко Тэхъутэмыкъое районым щыIэзэ, лые зэрихыгъэхэм якъэбархэр хэбзэнчъэу мобильнэ телефонкIэ къызIэкIигъэхьагъэх ыкIи чIыфэ къаратыным зыщыкIэлъэIухэрэ тхылъхэр ахэм ацIэкIэ банк горэм фи­гъэхьыгъэх.
Хабзэр зэраукъорэм гу лъызымытэгъэ банкым сомэ миллионрэ мини 186-м ехъурэ чIы­фэ къызэраритыщтымкIэ зэзэгъыныгъи 9 зэхигъэуцуагъ ыкIи зигугъу къэтшIыгъэ ахъщэр мурад бзаджэ зиIагъэм хэбзэнчъэу къызIэкIигъэхьагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэрэ Адыгеим хэгъэгу кIоцI IофхэмкIэ и Министерствэ уголовнэ лъыхъонымкIэ и ГъэIорышIапIэрэ зэдызэшIуахыгъэ Iофтхьабзэхэм яшIуагъэкIэ зы­ныбжь имыкъугъэм игъогупэ пыбзыкIыгъэ хъугъэ.
Хьыкумым ышIыгъэ унашъом диштэу Д. Ю. Демешко условнэ пщыныжьэу илъэси 5 тыралъхьагъ.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм ипресс-къулыкъу