Адыгеим и ЛIышъхьэу КъумпIыл Мурат Мыекъуапэ дэт еджапIэу N 2-м зыщэIэм псэолъэшI IофшIэнхэр зэрэкIохэрэр зэригъэшIагъ ыкIи игъом ахэр аухынхэм пае пшъэрылъ гъэнэфагъэхэр афишIыгъ.

Лъэпкъ проектэу «НыбжьыкIэхэмрэ кIэлэцIыкIухэмрэ» зы­фиIорэм ифедеральнэ про­ектэу «АнахьышIоу щыIэр зэкIэ кIэлэцIыкIухэм апай» зыфиIорэм къыдыхэлъытагъэу игъэкIотыгъэ IофшIэнхэр агъэцакIэх.
Ащ къекIолIагъэх АР-м иминистрэхэм я Кабинет и Тхьаматэ игуадзэу — финансхэмкIэ министрэу Виктор Орловыр, министрэхэм я Кабинет и Тхьаматэ игуадзэу Хъоткъо Хъызыр, Мыекъуапэ имэрэу Геннадий Митрофановыр, гъэсэныгъэ уч­реждениехэм яадминистрациехэм ялIыкIохэр.
КъумпIыл Мурат еджапIэм зыщэIэм, псэолъапхъэу агъэфе­дэхэрэм язытет ыуплъэкIугъ, подрядчикхэм гущыIэгъу афэ­хъугъ. Адыгеим и ЛIышъхьэ анахьэу ынаIэ зытыридзагъэр IофшIэнымкIэ графикыр гъэцэкIагъэ зэрэхъурэр ары ыкIи къызэрэхигъэщыгъэмкIэ, пIа­лъэу агъэнэфагъэм — илъэсыкIэ еджэгъум иублэгъум Iоф­шIэнхэр зэкIэ аухынхэ фае.

ЕджапIэр зычIэт унэр 1976-рэ илъэсым ашIыгъагъ. Мыщ фэдэ игъэкIотыгъэ гъэцэкIэжьын Iоф­шIэнхэр апэрэу ащ рашIылIэх. Мылъкоу пэIухьащтыр сомэ миллиони 136,3-рэ фэдиз мэхъу. Унашъхьэм изы Iахь агъэцэ­кIэ­жьыгъ, унэкIоцI дэпкъхэр агъэлагъэх, шъхьаныгъупчъэ блыпкъ­хэр зэблахъугъэх, псырыкIуапIэр, гъэфэбапIэхэр зэтырагъэ­псыхьагъэх. КIашъор, электричествэ рыкIуапIэхэр зытетынхэ фаем лъыкIахьэу шIыгъэнхэмкIэ IофшIэнхэр зэшIуахыгъэх, унэ гупэм игъэцэ­кIэжьын фе­жьагъэх, плиткэр агъэтIылъы. IофшIэнэу агъэцэ­кIэн фаем ипроцент 70-р зэшIуахыгъах. ЗэрэрахъухьагъэмкIэ, еджапIэм ищыкIэгъэ мебелымрэ Iэмэ-­псымэхэмрэ ащэфыщтых.
ЕджапIэр зычIэт унэм иигъэ­кIотыгъэ гъэцэкIэжьын нэмыкIэу ащ къыпэIулъ чIыпIэри гъэкIэжьыгъэнымкIэ IофшIэны­шхо къапыщылъ. Чэур зэбла­хъущт, къэзыгъэнэфхэрэр уахътэм диштэхэу ашIыщтых, плиткакIэ тыралъхьащт.

Анахьэу анаIэ зытырагъэты­хэрэм ащыщых щынэгъончъэным иIофыгъохэр: къэухъумэгъэнымрэ къэгъэгъунэнымрэ япхыгъэ системакIэхэу джырэ лъэхъаным диштэхэрэр еджапIэм IэкIагъэхьащтых, машIом зыкъыштэмэ макъэ къэзыгъэ­Iущт пкъыгъохэр хагъэуцощтых, терроризмэм псэуалъэр щыу­хъу­мэгъэнымкIэ Iофтхьэбзэ гъэ­нэфагъэу зэшIуахыщтхэм къа­хеубытэх макъэ къэзыгъэ­Iущт пкъыгъохэу еджапIэм хагъэуцощтхэр. КIэлэеджакIохэм еджэным епхыгъэ Iофтхьабзэ­хэм ялъэхъан Iэрыфэгъу, щынэгъончъэ амалхэр яIэ хъунхэмкIэ а Iофтхьабзэхэм шIуагъэ къатыщт.
«КIэлэцIыкIухэм еджапIэм охътабэ щагъакIо. Гъэсэныгъэ дэгъу ягъэгъотыгъэнымкIэ ыкIи еджапIэр ахэмкIэ Iэрыфэгъоу щытынымкIэ шапхъэхэр аукъохэ хъущтэп. КIэлэеджакIохэм ямызакъоу, кIэлэегъаджэхэмкIи еджапIэр гуIэтыпIэу, Iэрыфэ­гъоу щытын фае. Тэ гухэлъэу тиIэр шэпхъэ анахь лъагэхэм адиштэу илъэсыбэрэ кIэлэцIыкIухэм еджапIэхэр афэгъэлэжьэгъэнхэр ары», — къыIуагъ КъумпIыл Мурат.
Урысыем гъэсэныгъэмкIэ и Министерствэ 2025-рэ илъэсым къыщегъэжьагъэу 2027-м нэс гъэсэныгъэ зыщарагъэгъотырэ организациехэу игъэкIотыгъэ гъэцэкIэжьынхэр зэрашIылIэщтхэмкIэ ипрограммэ къыдыхэлъы­тагъэу Адыгеим организацие 27-мэ игъэкIотыгъэ гъэцэкIэ­жьынхэр арашIылIэщтых. Мы илъэсым муниципалитет зэфэшъ­хьафхэм яеджэпIи 9-мэ игъэ­кIо­тыгъэ гъэцэкIэжьынхэр ащы­кIощтых.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.