ФутболымкIэ Адыгэ Республикэм ипервенствэ иапэрэ къекIокIыгъо ­къыдыхэлъытэгъэ ешIэгъоу зэкIахьагъэхэр мы мафэхэм щыIагъэх. Зэнэ­къокъум ныбжьыкIэ командэхэр ары хэлажьэхэрэр.

Краснодар краим изэнэкъокъу зэрэхэла­жьэрэм къыхэкIэу командэу «Мыекъуапэ» иешIэгъухэр зэкIахьагъэх. Республикэ футбол еджапIэм зыщызыгъасэхэрэр «Кощхьаблэм» 2:1-у текIуагъэх. Къэлапчъэм Iэгуаор дэзыдзагъэхэр Ефим Тенежьянрэ Чэсэбый Тимуррэ («Мыекъуапэ»), Джамырзэ Инал («Кощхьабл»). Ащ ыуж республикэм икъэлэ шъхьаIэ илIыкIохэр къуаджэу Пэнэжьыкъуае еблэгъагъэх ыкIи командэу «Чэчэнаим» те­кIуагъэх, пчъагъэр — 3:0. Мы ешIэгъум Тимофей Орловым (тIогъогогъо), Ефим Тенежьян къэлапчъэм Iэгуаор дадзагъ.

Джырэ уахътэм зэнэкъокъум апэрэ чIыпIэр щызэдагощы «Тэхъутэмыкъуаерэ» «Мые­къуапэрэ». Ау тэхъутэмыкъуаехэм ешIэгъоу яIагъэр зыкIэ нахь макI, «Кощхьаблэр» ящэнэр.
Къэлапчъэм Iэгуаор анахьыбэрэ дэзыдзагъэхэр: Дмитрий Копаневыр (16), Артем Шориныр (7).
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Тэхъутэмыкъуай» — 15 (5).
2. «Мыекъуапэ» — 15 (6).
3. «Кощхьабл» — 12 (6).
4. «Чэчэнай» — 9 (6).
5. «ДЮСШ» — 2 (6).
6. «Урожай» — 1 (4).
7. «Адыгэкъал» — 1 (5).