Теннис цIыкIумкIэ ятIонэрэ зэIу­хыгъэ шъолъыр зэнэкъокъу Адыгеим икъэлэ шъхьаIэ щыкIощт. Программэу «Урысыем инеущырэ маф» зыфиIорэм къыдыхэлъытагъэу ар ­зэхащэ.

Мэкъуогъум и 26-м 2014 — 2017-рэ илъэс-­хэм къэхъугъэ спортсменхэр зэнэкъокъу-
щтых. Мэкъуогъум и 27 — 28-м хагъэунэфыкIырэ чIыпIэхэм афэбэнэщтых 2012 — 2017-рэ илъэсхэм къэхъугъэхэр. Джащ фэдэу мэкъуогъум и 28-м нэбгыритIоу зэгъусэхэ спортсмен хъулъфыгъэ, бзылъфыгъэхэм ыкIи зэхэпхъагъэу щытхэм заушэтыщт (2008 — 2017-рэ илъэсхэм къэхъугъэхэр).
Мэкъуогъум и 29-м кIалэхэм ыкIи пшъа­шъэхэм яунэе зэнэкъокъухэр рагъэкIокIыщтых. Iофтхьабзэр Адыгэ къэралыгъо университетым иордэунэу Кобл Якъубэ ыцIэ зыхьырэм щыкIощт.
ЗэрагъэнэфагъэмкIэ, Краснодар ыкIи ­Ставрополь крайхэм, Ростовскэ ыкIи Херсонскэ хэкухэм, Донецкэ ыкIи Луганскэ народнэ республикэхэм ялIыкIохэр турнирым хэлэжьэщтых. Адыгеир спортсмен 50 фэдизмэ къагъэлъэгъощт, ахэр республикэм икъэлэ шъхьаIэ, Адыгэкъалэ, Красно­гвардейскэ, Кощхьэблэ, Мыекъопэ ыкIи Теуцожь районхэм ялIыкIох.