Темыр Осетием икъэралыгъо драматическэ театрэу Коста Хетагуровым ыцIэ зыхьырэр Лъэпкъ театрэм ихьэ­­кIагъ, спектаклэхэу «Тиль» ыкIи «Черная бурка» зыфиIохэрэр къыщигъэлъэгъуагъэх. Ащ фэгъэхьыгъэу АР-м и Театральнэ зэхахьэ пресс-конференцие щыкIуагъ.

Темыр Осетием итеатрэ идиректорэу Григорий Мамиевым ыкIи ихудожественнэ пащэу Казбек Джелиевым зэIукIэ­гъоу тижурналистхэм адыряIагъэм Адыгеир театральнэ шъолъырэу, Мыекъуапэ театральнэ къалэу зэрэщытыр щыхагъэу­нэфыкIыгъ.
АР-м и Театральнэ зэхахьэ ипащэу Ацумыжъ Рустам Iофтхьабзэр къызэIуи­хыгъ. Мыщ фэдэ гастроль инхэм Урысыем ишъолъырхэм якультурэ хэхъоныгъэхэр ышIынхэмкIэ, цIыфхэр, лъэпкъхэр нахь зэрэшIэнхэмкIэ мэхьанэшхо зэряIэр къыIуагъ.
— Непэрэ шэпхъэшIухэм адиштэу Осетием и Лъэпкъ театрэ зэрэлажьэрэр цIыфхэм ядгъэлъэгъуныр типшъэрылъ шъхьэIагъ. НыбжьыкIэхэр ппIунхэмкIэ, лъэпкъ тарихъхэр ябгъэшIэнхэмкIэ искусствэр IэпыIэгъушху. Лъэпкъ театрэхэр яIэпэIэсэныгъэкIэ зэхъожьынхэ фае. Театрэм иактерхэм къагъэлъэгъогъэ спектаклэхэм ежьхэм яекIолIа­кIэ къахэщы. Осетин лъэпкъым итарихъ щыщ пычыгъо тигуапэу адыгэ чIыгум къышъуфэтщагъ. Анахьэу къыхэзгъэщымэ сшIоигъу — тикъэгъэлъэгъонхэр зэкIэ осетиныбзэкIэ тэгъэуцух, къэралыгъом инэмыкI чIыпIэхэм спектаклэхэр зэдзэкIыжьыгъэу щядэIух. Тыбзэ икъызэтегъэнэжьынкIэ тиIофшIэн мэхьанэ иIэу сэлъытэ, — къыIуагъ Григорий Мамиевым.
— Театральнэ искусствэр зикIасэхэм апае спектаклэхэу «Тиль» ыкIи «Черная бурка» зыфиIорэ тикъэгъэ­лъэгъонхэр осетиныбзэкIэ къэтщагъэх. Тиль Уленшпигель фэгъэхьыгъэ тхыдэу «Тиль» зыцIэм унэнчъэу къекIокIырэ, зызышIытэ­жьырэ Тиль цIыфхэм ядагъохэм адэхьащхызэ къызэригъэлъагъо­хэрэр, нэпэнчъэгъэ-къэрарынчъа­гъэм, хьарамыгъэм, акъылынчъа­гъэм яутэкIыгъэ героир иакъылкIэ, игубзыгъагъэкIэ зэратекIуагъэр ары. «Черная бурка» зыфиIорэр гум лъыIэсырэ, мэхьэнэ куу зиIэ ыкIи джырэ уахътэм диштэрэ, ямышIыкIэу гъэпсыгъэ спектаклэу щыт. ЦIыфым щыкIагъэу иIэр, шIулъэ­гъуныгъэр, къэрарынчъагъэр псэушъхьэ рольхэмкIэ IофшIагъэм къы­щыдгъэлъэгъуагъ. Ащ еплъы­хэрэм зэфэхьысыжь тэрэзхэр ашIынхэм спектаклыр тегъэ­­- псы­хьагъ, — къыIуагъ художест­веннэ пащэу Казбек Джелиевым.
— Театрэхэм язэдэлэжьэныгъэ гъэпытэгъэным тапэкIи тыдэлэ­жьэщт. Титворческэ купхэм амалэу яIэм нахь зегъэушъомбгъугъэным ыкIи гъэхъагъэхэр ашIынхэм тыпылъыщт. Адыгеим итеат­рэхэри Осетием шIэхэу кIощтых, — къы­Iуагъ Ацумыжъ Рустам.
Пресс-конференцием хэлэжьэгъэ журналистхэм яупчIэхэм хьакIэхэм джэуапхэр къаратыжьыгъ.