АР-м ибзылъфыгъэхэм я Союз и Мыекъопэ къэлэ къутамэ ипредпринимательхэм я Клуб Iофтхьэбзэ гъэшIэгъон кIэщакIо фэхъугъ. «Коррекционные техники в одежде» зыфиIорэ егъэджэн сыхьатыр стилист IэпэIасэу Хъуажъ Заремэ зэхищагъ.

Модэм дебгъэштэныр IэшIэхэп. Бзылъфыгъэ ныбжьыкIэхэр уахътэм дэлъэбэкъонхэм иамалхэм алъэхъух. ШэкI пIуакIэхэр, щыгъын зэмышъогъу­хэр, шъо нэгъыфхэр 2025-м игъэмафэ инэшэнэ шъхьаIэх.
А зэпстэур зэрэзэдебгъэштэщтым хэшIыкI фыуиIэн фае. ЗэгъэкIукIэ тэрэзым ишъэфхэр пшIэхэмэ ахэр дахэу къэлъэгъощтых. Хъуажъ Заремэ бзылъфыгъэм ыпкъ къекIоу щыгъынхэр зэрэбгъэпсыщтхэр къекIолIагъэхэм къаригъэ­лъэгъугъ.
Аужырэ илъэс зэкIэлъыкIохэм ары ащ иIофыр — зызэрэпфэпэщтымкIэ уахътэм къыгъэуцурэ шэпхъэ гъэнэфагъэхэм о къыокIурэр ахегъащэ. «FashIon» зыфиIорэ зэнэкъокъоу къалэу Краснодар аужырэ илъэсхэм щыкIорэм Заремэ изэхэщакIу, стилист, брендмейкер, модэм фэгъэхьыгъэ журналхэм, модельнэ агентствэхэм адэлажьэ.
— Непэрэ мафэм ишапхъэхэм адиштэу зыпфэпэным мэхьанэшхо иI. Узыпхырыплъырэ кIэпхынхэр, гъончэджхэр дахэхэп. Щыгъыныр зэдиштэу зэпыплъхьаным хэшIыкI фыуиIэн фае. КIыхьэми, кIакоми бзылъфыгъэм ыпкъ диштэу щыгъы­ныр щытын фае. Анахь шъхьаIэр бзылъфыгъэр зыфаер, къекIурэр ары. Пкъыр ищыгъэу къэлъэгъонэу фаехэм шъэфыбэ къафызэIус­хыщт,— къыIуагъ Заремэ.
АР-м ибзылъфыгъэхэм я Союз и Мыекъопэ къэлэ къутамэ ипредпринимательхэм я Клуб ипащэу Надежда Шевченкэр егъэджэн сыхьатым къыщыгущыIагъ.
— ЦIыфым дагъоу иIэхэр хэзыгъэ­кIокIэрэ щыгъынхэр зэрэбгъэфедэнхэ плъэкIыщтым Хъуажъ Заремэ къытегущыIэщт. Модэр зэрэбаим, зэрэхьалэмэтым, кIуачIэу хэлъым бзылъфыгъэхэр щыгъозэщтых. Ахэм япчъагъэ республикэм щыхэ­хъо. Бзылъфыгъэхэм я Союз хэтхэр пы­тэу зэрэзэпхыгъэхэм щэч хэлъэп. ЫпкIэ зыхэмылъ егъэджэн сыхьатхэр, зэхахьэхэр, форумхэр, десэ гъэ­шIэ­гъонхэр, шIэныгъэ куу къэзытырэ зэIукIэхэр темызэщэу зэхэтэщэх. Предпринимательствэм къэралыгъо IэпыIэгъу етыгъэнымкIэ анахь зигъо Iофыгъохэм татегущыIэ. Джащ фэдэу IофшIэ­кIэшIоу тIэкIэлъымкIэ тызэхъо­жьы, тизэпхыныгъэхэр тэгъэпытэх. АР-м предпринимательствэм IэпыIэгъу фэхъугъэнымкIэ и Гупчэ сыдигъокIи ипчъэ къытфызэIухыгъ, — къыIуагъ Надежда Шевченкэм.
КъекIолIэгъэ бзылъфыгъэ пэпчъ шIогъэшIэгъон лъэныкъом кIэ горэ къы­хихыгъ.
— Щыгъыным цIыфхэм уахещэ. Бзылъфыгъэм ыпкъ къекIоу зифэпэным фэгъэхьыгъэ егъэджэн сыхьатыр сшIогъэшIэгъоныгъ. Зэдимыштэнхэу къысщыхъущтыгъэ щыгъынхэр пкъыгъо цIыкIухэмкIэ зэбгъэкIунхэ зэрэплъэкIыщтыр лъэшэу згъэшIэгъуагъэ. Шъошэ джанэхэр, бгырыпххэр, бзылъфыгъэ паIор, тыжьыным хэшIыкIыгъэ бгъэгупэ чыIур зэгъэкIугъошIоу къы­чIэкIыгъ, — къыIуагъ Татьяна Шарбашовам.
Непэ дунэе щыгъын дизайным стилистхэм анахьэу къыхагъэщырэр зыми фэмыдэу, ямышIыкIэу, зыщызылъэрэм тегъэпсыхьагъэу ахэр дыгъэнхэр ары. Уахътэм къыдэкIорэ гупшысакIэхэр зы­хищэхэзэ, непэрэ шъуашэм лIэуж пэпчъ дэкIэжьын кIуачIэ хэлъ, зэшIокI иI.
НэкIубгъор
зыгъэхьазырыгъэр
Лъэпшъыкъо Фатим.