Адыгеим и ЛIышъхьэу КъумпIыл Мурат АР-м и Апшъэ­рэ хьыкум и Тхьаматэу Шумэн Байзэт агъашIозэ зэрэ­IукIырэм фэгъэхьыгъэ игъэкIотыгъэ зэIукIэм хэлэжьагъ.

Ащ щыIагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, хьыкумышI къулыкъухэм яIэшъхьэтетхэр, хьыкумышI системэм иветеранхэр.
Республикэм и ЛIышъхьэ къызэгущы­Iэм Шумэн Байзэт лъэшэу зэрэфэразэр къыхигъэщыгъ ыкIи хабзэм, правосудием, цIыфхэм уафэлэжьэн зэрэфаемкIэ щысэтехыпIэу зэрэщытыр къыхи­гъэщыгъ.
«Аужырэ илъэсхэр тихэгъэгукIэ къызэрыкIоу щытыгъэхэп: пандемиер, санкциехэр, гумэкIыгъуакIэхэр. Ау Шумэн Байзэт Азмэт ыкъом иIэпэIэсэныгъэ, ипшъэдэкIыжь икъоу зэрэзэхишIыкIырэм яшIуагъэкIэ Адыгеим ихьыкумхэм дэ­гъоу ыкIи зыпкъ итэу Iоф ашIагъ», —къыIуагъ КъумпIыл Мурат.
Ащ къызэрэхигъэщыгъэмкIэ, респуб­ликэм ихьыкумышI системэ ицыхьэ зытелъыжьэу непэ хэхъоныгъэ ешIы, цIыфхэм якъэухъумэнкIи нахь шIогъэ ин хэлъэу пшъэрылъэу къэуцухэрэр зэшIуехых. КъумпIыл Мурат къызэри­IуагъэмкIэ, хьыкумышIхэм яIэпэIэсэ­ныгъэ зыкъыIэтынымкIэ, хьыкумхэм Iоф ащашIэнымкIэ амалэу яIэхэр нахьышIу шIыгъэнхэмкIэ, джырэ технологиехэр гъэфедэгъэнхэмкIэ бэ непэ зэшIуахырэр. Анахьэу ащ къыхигъэщыгъэр Iофэу зыхаплъэхэрэм нахь екIолIэкIэ тэрэз афыряIэ зэрэхъугъэр, ифедэхэр къыу­хъумэнхэмкIэ бизнес-сообществэм ицыхьи нахь зытелъыжь зэрэхъугъэр ары.
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм хьыкумхэм анаIэ къызэра­щытырагъэтырэм шъхьафэу игугъу ащ къышIыгъ.
ТичIыпIэгъухэу республикэмрэ хэгъэ­гумрэ апае бэ зэшIозыхыгъэхэм ятарихъ шIэжь хэмыкIокIэжьыным Шумэн Байзэт иIахьэу хишIыхьагъэр КъумпIыл Мурат къыхигъэщыгъ. ГущыIэм пае, Адыгеим изаслуженнэ хьыкумышIхэм апае шIэжь пхъэмбгъум икъызэIухынкIэ ишIуагъэ къыгъэкIуагъ, ащ нэмыкIэу Хэгъэгу зэошхом хэлэжьэгъэ хьыкумышIхэм ясаугъэт игъэуцуни иIахь хишIыхьагъ, къэлэ паркым чъыг лъэпкъ инэу «платанкIэ» заджэхэрэр гъогум ыбгъуитIукIэ щагъэтIысхьаным хэлэжьагъ ыкIи нэ­мыкIыбэхэр зэшIуихыгъэх.
Шумэн Байзэт гуетыныгъэ хэлъэу ипшъэрылъхэр зэригъэцэкIагъэхэм, ­республикэм ихьыкумышI системэ игъэ­пытэн иIахьышхо зэрэхишIыхьагъэм апае зэрэфэразэр Адыгеим и ЛIышъхьэ къы­Iуагъ.
«Адыгеим и Апшъэрэ хьыкум иIофшIэн нахь дэгъоу зэхэщэгъэным епхыгъэ Iофэу о узхэлэжьагъэр зэрэлъагъэкIотэщтым, шэн-хэбзэ шIагъохэу щыIэ хъугъэхэм афэшъыпкъэхэу республикэм ихьыкумышIхэм тапэкIи цIыфхэм яфитыныгъэхэр цыхьэшIэгъоу къызэраухъу­мэщтхэм сицыхьэ телъ», — къыIуагъ КъумпIыл Мурат.
Адыгэ Республикэм ыпашъхьэ гъэ­хъэгъэ инэу щыриIэхэм апае АР-м и Апшъэрэ хьыкум и Тхьаматэу Шумэн Байзэт АР-м и ЛIышъхьэ и УказкIэ медалэу «Адыгеим и Щытхъузехь» зыфиIорэр къыфагъэшъошагъ. КъумпIыл Мурат а тын лъапIэр къыритыжьзэ фэлъэIуагъ псауныгъэ пытэ иIэнэу, шIоу щыIэр зэкIэ къыдэхъунэу.
Мы Iофтхьабзэм къыщыгущыIагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Арбитражнэ хьыкум и Тхьаматэу Александр Боровик, Мые­къопэ гарнизон дзэ хьыкумым итхьаматэу Валерий Соломатиныр, хьыкумышI системэм иветеранхэм я Совет итхьаматэ игуадзэу Хьакъуй Юныс, АР-м ихьыкумышIхэм я Совет итхьаматэу Екатерина Богатыревар.
ИкIэухым Шумэн Байзэт республикэм ипащэхэм, АР-м и Апшъэрэ хьыкум иIофышIэхэм, хьыкумышI сообществэм хэтхэм АР-м и Апшъэрэ хьыкум и Тхьамэтэ IэнатIэ зеIыгъым Iофэу ышIагъэм осэшхо къызэрэфашIыгъэм пае зэрафэразэр къыIуагъ.
Шъугу къэтэгъэкIыжьы: Шумэн Байзэт 1991-рэ илъэсым Шэуджэн районым ипрокуратурэ IофшIэныр щыригъэжьэгъагъ. Я 2000-рэ илъэсым чъэпыогъум Адыгэкъалэрэ Теуцожь районымрэ язэгъэшIужь хьыкумышI IэнатIэм Iуа­гъэхьэгъагъ. Илъэс 15 зытешIэм АР-м и Теуцожь район хьыкум итхьаматэу аухэсыгъ. 2019-м АР-м и Апшъэрэ хьыкум и Тхьаматэу хадзыгъагъ. Юрист сэнэхьатым илъэс 33-м ехъурэ рылэ­жьагъ, ащ щыщэу илъэс 24-м хьыкумышI IэнатIэр ыIыгъыгъ.
Шумэн Байзэт Iоф зыщишIэгъэ илъэс­хэм мы къыкIэлъыкIохэрэр къыфагъэшъошагъэх: щытхъуцIэу «АР-м изаслуженнэ юрист», АР-м и Къэралыгъо Совет — Хасэм ищытхъу тамыгъэу «Закон. Пшъэрылъ. ЦIыфыгъ» зыфи­Iохэрэр, УФ-м и Апшъэрэ хьыкум дэжь щызэхэщэгъэ ХьыкумышI департаментым итамыгъэу «За усердие» зыфиIоу я II-рэ шъуашэ зиIэр, УФ-м ихьыкумышIхэм я Совет и Рэзэныгъэ тхылъ, Апшъэрэ хьыкумым дэжь щызэхэщэгъэ ХьыкумышI департаментым имедалэу «ЕIолIэнчъэу къулыкъур зэрихьырэм фэшI» зыфиIорэр ыкIи нэмыкI тынхэр.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.