Федеральнэ проектэу «Iэры­фэгъу къэлэ щыIакIэр гъэпсы­гъэныр» зыфиIорэм къыдыхэ­лъытагъэу зэтырагъэпсы­хьащт чIыпIэхэмкIэ мэкъэтыныр аухыгъ.

Лъэпкъ проектэу «ЩыIэныгъэм пае инфраструктурэр» зыфиIорэм тегъэ­псыхьагъэу зэнэкъокъур кIуагъэ. Пшъэрылъ шъхьаIэу ащ иIагъэр нэбгырэ мин 20-м ехъу зыдэс псэупIэхэм хэхъоныгъэ ягъэшIыгъэныр ары. Мыщ фэгъэхьыгъэ къэбар къыригъэ­хьагъ ителеграм-нэкIубгъо АР-м и ЛIышъхьэ.
Адыгэ РеспубликэмкIэ муниципалитети 3-мэ — къалэу Мыекъуапэ, къэлэгъэпсыкIэ зиIэ псэупIэхэу Инэм­рэ Яблоновскэмрэ ащызэтырагъэ­псыхьащт общественнэ чIыпIэхэр къы­хахынхэу къапыщылъыгъ. ЗэкIэмкIи ахэр чIыпIи 9 хъущтыгъэ.
Къалэу Мыекъуапэ щыпсэухэрэм нахьыбэу амакъэ зыфатыгъэр кафедральнэ чылысэу Успение Пресвятой богородицы къыпэIулъ общественнэ чIыпIэр ары (мэкъэ 16 748-рэ).
Инэм щыпсэухэрэм нахьыбэу ама­къэ зыфатыгъэр БжыхьэкъоякIэм дэт культурэм и Унэ дэжь щыт кIэлэ­цIыкIу площадкэм игъэцэкIэжьын (мэкъэ 4474-рэ).
Яблоновскэм щыпсэухэрэм ама­къэхэр фатыгъэх урамэу Космическэм тет унэу 37/2-м дэжь щыIэ спорт пло­щадкэм игъэцэкIэжьын (мэкъэ 3615-рэ).
Къихьащт илъэсым мы чIыпIэхэм теплъакIэ яIэ хъущт.
— Мэлылъфэгъум и 21-м къыщегъэжьагъэу мэкъуогъум и 12-м нэс рекIокIыгъэ мэкъэтынхэм ахэлэжьагъэхэм, ахэм япчъагъэ нэбгырэ мин 40-м ехъу, зэкIэми тафэраз. Мые­къуапэ щыпсэухэрэм чанэу зыкъа­гъэлъэгъуагъ. 2019-рэ илъэсым къыщегъэжьагъэу щагу 204-рэ ыкIи общественнэ чIыпIэ 97-рэ республикэм щызэтырагъэпсыхьагъ. Ахэм ащыщэу 2024-рэ илъэсым игъэкIотыгъэу Iоф­шIэнхэр щагу 31-мэ ыкIи общественнэ чIыпIи 8-мэ ащызэрахьагъэх. Мыщ фэдэ екIолIакIэм цIыфхэр рыразэх, яунагъохэр, ясабыйхэр ягъусэхэу агъэ­кIэжьыгъэ чIыпIэхэм къыщакIухьэ, защагъэпсэфы.
ТичIыпIэхэр зэтегъэпсыхьэгъэнхэмкIэ къэралыгъо программэхэм ыкIи лъэпкъ проектхэм тапэкIи тахэлэ­жьэщт, зыгъэпсэфыпIэ чIыпIакIэхэр къызэIутхыщтых, къэлэ скульптурэхэр ыкIи нэмыкI псэуалъэ­хэр дгъэ­псыщтых. ЦIыфхэм ящыIакIэ нахьышIу шIыгъэным тыпылъыщт, — хигъэунэфыкIыгъ АР-м и ЛIышъхьэ.