Республикэу Беларусь и Правительствэрэ Адыгэ Республикэм иминистрэ­хэм я Кабинетрэ (Урысые Федерациер) зэда­шIы­гъэ зэзэгъыныгъэу ­сатыу-экономикэ, научнэ-техническэ ыкIи социальнэ, культурэ лъэныкъомкIэ зэдэлэжьэныгъэу азыфагу илъым тегъэпсыхьагъэр гъэцэкIагъэ хъуным пае Респуб­ликэу Беларусь илIыкIо куп Адыгеим къэкIогъагъ. АР-м и ЛIышъхьэу КъумпIыл Мурат блэгъэныгъэ зыдытиIэ къэралыгъом илIыкIохэм зэIукIэгъу адыриIагъ.

Белоруссием къикIыгъэ купым ипэщагъэр концернэу «Белгос­пищепром» зыфиIорэм итхьаматэу Олег Жидковыр ары. Ащ хэхьагъэх концернэу «Белгос­пищепромым» иIэкIыб къэрал сатыу IофшIэнкIэ ыкIи товархэр аIэкIэгъэхьэгъэнхэмкIэ Iофтхьабзэхэм афэгъэзэгъэ гъэIорышIапIэм ипащэу Игорь Груцо, Рес­публикэу Беларусь ипо­сольствэу Урысые Федерацием щыIэм икъутамэу къалэу Краснодар дэтым ипащэу Игорь Щегловыр.
Адыгэ Республикэм ыцIэкIэ зэдэгущыIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзауррэ ащ игуадзэу ЛIыхэсэ Махьмудрэ, АР-м и ЛIышъхьэ IэкIыб къэрал зэпхыныгъэхэмкIэ ыкIи инвестициехэмкIэ иIэпыIэгъоу Хьакъунэ Бэллэ, АР-м мэкъу-­мэщымкIэ иминистрэу Къуанэ Анзаур, АР-м экономикэ хэхъо­ныгъэмкIэ ыкIи сатыумкIэ иминистрэ иапэрэ гуадзэу Александр Павловскэр.
КъумпIыл Мурат шIуфэс къа­рихыгъ Республикэу Беларусь къикIыгъэхэм ыкIи къыхигъэ­щыгъ язэдэлэжьэныгъэ хэхъоны­гъэ зэришIырэр, тапэкIи джыри нахь игъэкIотыгъэу ар лъагъэкIо­тэным бгъуитIуми яфедэ зэрэхэ­лъыр. Республикэм и ЛIышъхьэ къызэриIуагъэкIэ, ащ мэхьанэшхо иIэу щыт Урысыемрэ Бело­руссиемрэ язэфыщытыкIэхэр джыри нахь пытэнхэмкIэ.
Адыгэ Республикэм сатыум ылъэныкъокIэ гъусэныгъэ пытэ зыдыриIэхэм Республикэу Беларусь ащыщ, товархэмкIэ зэ­рэзэхъожьхэрэм имызакъоу, нэ­мыкI лъэныкъо зэфэшъхьаф­хэмкIи. Адыгеим и ЛIышъхьэ къызэрэхигъэщыгъэмкIэ, промышленностым, зекIоным, къы­дэгъэкIыжьыным, логистикэм алъэныкъокIэ проект гъэшIэгъон­хэр инвесторхэм игъо афалъэгъунхэмкIэ амалышIухэр щыIэх.
«Хэгъэгум ипащэхэм яIэпы­Iэгъу хэлъэу Адыгеим бэ щызэ­шIуахырэр инвестициехэр на­хьыбэу къихьанхэмкIэ, инвес­торхэм адеIэнхэмкIи лъэныкъо зэфэшъхьафхэр агъэфедэх. Щы­Iэныгъэм нафэ къыщэхъу а лъэныкъомкIэ республикэм инвестициехэр нахьыбэ зэрэщы­хъухэрэр. ТапэкIи тизэдэлэжьэныгъэ-зэгъусэныгъэ пытэным пае лъэныкъо пстэуми зэхъо­кIыныгъэшIухэр афэтшIыщтых», — къыIуагъ КъумпIыл Мурат.
Концернэу «Белгоспищепром» зыфиIорэм итхьаматэу Олег Жидковым къызэриIуа­гъэмкIэ, мы аужырэ илъэси 3-м къыкIоцI республикхэм товарэу зэIэкIагъахьэрэр фэди 2,3-кIэ нахьыбэ хъугъэ, мы илъэсми Iофхэр ащ тетэу кIэкIых.

«Къэлэ щыIакIэм инэшанэхэр къыдэтлъытэхэзэ, машинэшIынымкIэ тикомплексхэм, джащ фэдэу мэкъумэщ предприятиехэм атегъэпсыхьагъэу бгъуитIуми Iоф зэдэтшIэн зэрэтлъэкIыщтым иамалхэр нэрылъэгъух. Шъо шъуиреспубликэ фэдэу тэри мэкъумэщ хэгъэгоу тыщыт, хъызмэт зехьанымкIэ Iофэу тшIэрэм шIуагъэу къытырэм джы­ри нахь зыкъызэриIэтыщым иамалхэм талъэхъу, былымхъу­нымкIи, къэкIыхэрэм алъэны­къокIи Iофхэм язытет джыри нахьышIу зэрэхъущтым ренэу тынаIэ тетэгъэты», — къыIуагъ Республикэу Беларусь илIыкIо куп ипащэ.
Олег Жидковым къызэриIуа­гъэмкIэ, Белоруссием ибылымахъохэм щэм икъэхьыжьынкIэ IэпэIэсэныгъэу, IофшIэкIэшIоу аIэкIэлъ хъугъэм зыщагъэгъо­з­э­ным ишIуагъэ къэкIощт респуб­ликэр анахь зэрыгушхорэ, ыцIэ чыжьэу зыгъэIугъэ гъомылап­хъэхэм ащыщ адыгэ къуаеу къыдагъэкIырэр нахьыбэ шIыгъэнымкIэ.
Ахэм анэмыкIэу блэгъэныгъэ зыдытиIэ къэралыгъом иапшъэ­рэ еджапIэхэм, шIэныгъэмкIэ игупчэхэм Адыгеим щыщ IофышIэ гъэнэфагъэхэр рагъэ­блэгъэнхэшъ, IофшIэкIэшIур аIэ къырагъэхьаным пае IэпыIэгъу къафэхъунхэм фэхьазырых. Бе­лоруссием къикIырэ зекIохэм тиреспубликэ агу рехьы, зыщыбгъэпсэфынымкIи, культурэмрэ спортымрэ алъэныкъокIи Iоф­шIэкIэшIоу аIэкIэлъым зыща-
гъэ­гъозэным анаIэ тарадзэн мурад яI.
КъумпIыл Мурат Белоруссием къикIыгъэхэм ягухэлъхэм, кIэщакIо зыфэхъугъэхэм адыри­гъэштагъ ыкIи вице-премьерым, лъэныкъо зэфэшъхьафхэмкIэ министерствэхэм япащэхэм пшъэрылъ афишIыгъ IофшIэнымкIэ, шIэныгъэмкIэ, социальнэ ыкIи культурэ лъэныкъохэмкIэ язэдэлэжьэныгъэ тапэкIи нахь зызэрэрагъэушъомбгъущтым тегъэпсыхьэгъэ Iофыгъохэм анаIэ атырадзэнэу.
Шъугу къэтэгъэкIыжьы: Рес­публикэу Беларусь къикIыгъэ лIыкIохэр Адыгеим къызэкIохэм предприятие анахь инитIумэ ащыIагъэх: пшъэдэкIыжьэу ыхьы­рэмкIэ гъунэпкъэ гъэнэфагъэ зиIэ обществэу «Кар­тонтарэмрэ» обществэу «Питейный Дом» зыфиIорэмрэ. Ащ нэмыкIэу гупчэу «Сибизнес» зыфиIорэм къыкIэлъыкIорэ Iофыгъом епхыгъэу зэIукIэ щызэхащэгъагъ: «Республикэу Бе­ларусь и Правительствэрэ Адыгэ Республикэм иминист­рэхэм я Кабинетрэ (Урысые Федерациер) сатыу-экономикэ, научнэ-техническэ ыкIи социальнэ-культурнэ зэдэлэжьэныгъэм ехьылIэгъэ Зэзэгъыныгъэу зэдашIыгъэр пхырыщыгъэным тегъэпсыхьэгъэ зэпхыныныгъэр» зыфиIорэр. ЛъэныкъуитIуми яведомствэ гъэнэфагъэхэр очнэу ыкIи пэIудзыгъэ шIыкIэм тетэу а зэдэгущыIэгъум хэлэжьагъэх.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.