Федеральнэ, республикэ къэралыгъо тынхэу къафагъэшъошагъэ­хэр республикэ филармонием ащаратыжьыгъэх. Урысыем и Мафэ ехъулIэу шIэныгъэм, медицинэм, гъэсэныгъэм, спортым, культурэм ыкIи нэмыкI лъэныкъохэм пэрытыныгъэ ащызыIыгъхэр агъэшIуагъэх.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м иминистрэхэм я Кабинет хэтхэр, общественностым илIыкIохэр.
МэфэкI Iофтхьабзэм хэла­жьэхэрэм шIуфэс къарихи, Адыгеим и ЛIышъхьэ къыхи­гъэщыгъ Урысыем щыпсэурэ лъэпкъ зэфэшъхьафхэм язы­кIыныгъэрэ лIэужхэм язэпхыныгъэрэ ятамыгъэу щыт мэфэ­кIым ехъулIэу мы Iофтхьабзэр зэрэзэхащэрэр.
«Мыщ фэдэ мафэм тэ ана­хьэу зэхэтэшIэ хэгъэгу гупсэм ихэхъоныгъэ зышъхьамысыжьэу мафэ къэс зиIахь хэзышIыхьэрэ, зиIоф­хэмкIэ ащ иджырэ тарихъ зытхырэ ицIыфхэм Урысыер нахь лъэш, нахь пытэ зэрашIырэр. Непэ тэ зищытхъу тIорэр ащ фэдэ цIыфхэу республикэми, хэгъэгуми апае гъэхъэгъэшхо­хэр зышIыгъэхэр ары», — къыIуагъ КъумпIыл Мурат.
Республикэм ипащэ къыхигъэщыгъ композиторхэм я Союз ишъолъыр къутамэ итхьаматэу Нэхэе Аслъанчэрые исэнэхьаткIэ гъэхъэгъэшхохэр зэриIэхэр, Урысые Федерацием и Президент и УказкIэ орденэу «Культурэмрэ искусствэмрэ алъэныкъокIэ гъэхъагъэхэр зэриIэхэм фэшI» зыфиIорэр ащ къызэ­рэфагъэшъошагъэр. КъумпIыл Мурат зэрэхигъэунэфыкIы­гъэмкIэ, композитор цIэрыIом адыгэ культурэм, хэгъэгум имузыкальнэ искусствэ, лъэпкъ­хэм язэгурыIоныгъэ игъэпытэн иIахьышхо ахишIыхьагъ.
Джырэ документальнэ кином Адыгеим хэхъоныгъэ зэрэщи­шIырэм къытегущыIэзэ, Адыгеим и ЛIышъхьэ режиссерэу Нэгъэплъэ Аскэрбый итворчествэ къыщыуцугъ. Культурэмрэ искусствэмрэ алъэныкъокIэ гъэхъагъэхэр зэриIэхэм фэшI Урысыем и Президент и Рэзэныгъэ тхылъ ащ къыфагъэ­шъошагъ.
ИскусствэхэмкIэ Мыекъопэ кIэлэцIыкIу еджапIэу N 1-м ипащэу Лариса Грачевар искусствэмрэ педагогикэмрэ зэрафэшъыпкъэр мы мафэм къа­Iуагъ. Мы бзылъфыгъэр зипэщэ еджапIэм кIэлэцIыкIу сэнаущхэм яамалхэм закъызэIурегъэхы. КIэлэегъаджэм щытхъуцIэу «Урысые Федерацием культурэмкIэ изаслуженнэ IофышI» зыфиIорэр къыфагъэшъошагъ.
Мэкъу-мэщым гъэхъагъэу щашIыгъэхэм республикэм и ЛIышъхьэ къатегущыIэзэ, Кощ­хьэблэ районым щыпэрыт фермер хъызмэтшIапIэм ипащэу Зыхьэ Зураб дэгъоу иIофшIэн зэрэзэхищэрэр, щытхъуцIэу «Уры­сые Федерацием мэ­къу-мэщымкIэ изаслуженнэ IофышI» зыфиIорэр ащ къызэрэфагъэшъошагъэр къыIуагъ.
Граждан обществэм республикэм зызэрэщиушъомбгъурэр, мы лъэныкъом илъэсыбэ хъугъэу АР-м и Общественнэ палатэ итхьаматэу Устэ Руслъан Iоф зэрэщишIэрэр КъумпIыл Мурат шъхьафэу къыIуагъ. Къэ­ралыгъом и Президент зигугъу къэтшIыгъэ общественнэ организацием ипащэ УФ-м и Президент ихэдзын изыфэгъэхьазырынрэ изэхэщэнрэ чанэу зэрахэлэжьагъэм фэшI рэзэныгъэ тхылъ къыфигъэшъошагъ.
Илъэс 30 хъугъэу еIолIэн­чъэу къэралыгъо къулыкъур зэ­рихьырэм фэшI щытхъу тамыгъэу «ЕIолIэнчъэу Iоф зэри­шIэрэм фэшI» зыфиIорэр Адыге­им и ЛIышъхьэ и Администрацие и Правовой гъэIорышIапIэ ипащэу Марина Гильдельбаум къыфагъэшъошагъ.
ЦIыфым ифитыныгъэхэмкIэ АР-м и Уполномоченнэу илъэсыбэрэ Iоф зышIэгъэ Анатолий Осокиным орденэу «Хэгъэгум ыпашъхьэ гъэхъагъэу щыриIэхэм афэшI» зыфиIорэм имедалэу я II-рэ шъуашэ зиIэр къыфагъэшъошагъ.
Социальнэ Iофтхьабзэхэр зыгъэцэкIэрэ организациехэм Iофэу ашIэрэм мэхьанэшхо зэриIэм къытегущыIэзэ, Адыгеим и ЛIышъхьэ къыхигъэщыгъ граждан обществэм ихэхъоныгъэ Адыгеим ибзылъфыгъэхэм я Союз итхьаматэу Вэрэкъо Хьалимэтрэ Мыекъопэ гурыт еджапIэу N 7-м икIэлэегъаджэу Сергей Левченкэмрэ яIахьышIу зэрэхашIыхьэрэр. Общест­вэмкIэ мэхьанэшхо зиIэ Iоф­тхьа­бзэхэм язэхэщэн чанэу зэрэ­хэлажьэхэрэм фэшI ахэм УФ-м и Президент и Рэзэныгъэ тхылъ къафагъэшъошагъ.
Къэралыгъо граждан къулыкъур еIолIэнчъэу зэригъэца­кIэрэм фэшI тамыгъэу «Урысыем ипсэолъэшI гъэшIуагъ» зыфиIорэр Адыгеим псэолъэшIынымкIэ, транспортымкIэ, псэу­пIэ-коммунальнэ, гъогу хъыз­мэтымкIэ иминистрэ игуадзэу Лафышъэ Рэмэзан къыфагъэшъошагъ.
Джащ фэдэу Адыгеим и ЛIышъхьэ экономикэм, псэо­лъэшIыным, мэкъу-мэщым алъэ­ныкъокIэ, къэралыгъо, муниципальнэ къулыкъумкIэ, общественнэ зэфыщытыкIэхэмкIэ, искусствэмкIэ ыкIи культурэмкIэ федеральнэ, республикэ тынхэр къызыфагъэшъошагъэхэм афэгушIуагъ.
ГущыIэм пае, щытхъуцIэу «АР-м инароднэ кIэлэегъадж» зыфиIорэр Кощхьэблэ районым гъэсэныгъэмкIэ игъэIорышIапIэ ипащэу Бэрзэдж Асиет, щыт­хъуцIэу «АР-м инароднэ артист» зыфиIорэр Адыгеим лъэпкъ къашъомкIэ и Къэралыгъо академическэ ансамблэу «Налмэсым» иартистэу Къулэ Алый, щытхъуцIэу «АР-м гъэсэны­гъэмкIэ изаслуженнэ IофышI» зыфиIорэр Адыгэ кIэлэегъэджэ колледжэу Хъ.Б. Андырхъуаем ыцIэ зыхьырэм икIэлэегъаджэу Марина Бондаренкэмрэ зипсауныгъэкIэ щыкIагъэ зиIэ кIэлэцIыкIухэр зыщаIыгъ еджэпIэ-интернатым икIэлэпIоу Щагужъ Женерэ афагъэшъошагъ.
Республикэм и ЛIышъхьэ волонтерхэу, предпринимательхэу, цIыф къызэрыкIохэу хэу­шъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм IэпыIэгъу афэ­хъухэрэм шъхьафэу «тхьа­шъуегъэпсэу» ариIуагъ. ГуфэкIо купхэм, общественнэ объединениехэм япащэхэм ыкIи ахэм ахэлажьэхэрэм, предпринимательхэм ыкIи нэмыкIхэм шIэжь тамыгъэу «ХэушъхьафыкIыгъэ дзэ операцием хэлажьэхэрэм IэпыIэгъу зэрафэхъухэрэм фэшI» зыфиIорэр афагъэшъошагъ.
«ТидзэкIолIхэм непэ хэу­шъхьафыкIыгъэ дзэ операциер зыщыкIорэ чIыпIэм тихэгъэгу ифедэхэр къыщагъэгъунэ, тэ мыщ, тылым, тызэгъусэу Iоф зыщыдатшIэрэр Адыгеимрэ Урысыемрэ нахь лъэш, нахь фэшIыгъэ хъунхэр ары», — къы­Iуагъ КъумпIыл Мурат.
ЗэIукIэм икIэух республикэм и ЛIышъхьэ Iофтхьабзэм хэлэжьэгъэ пстэуми Адыгеимрэ Урысыемрэ яфедэ зыхэлъ гъэ­хъэгъакIэхэр ашIынэу афэлъэ­Iуагъ.
АР-м и ЛIышъхьэ ипресс-къулыкъу
къытырэ къэбархэмкIэ
ЛIышэ Саныет.