Адыгэ Республикэм терроризмэм пэшIуекIогъэнымкIэ икомиссие изимычэзыу зэхэсыгъоу АР-м и Правительствэ зычIэт унэм щыкIуагъэм тхьамэтагъор щызэрихьагъ Адыгеим и ЛIышъхьэу КъумпIыл Мурат.

Зэхэсыгъом хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэ­рэщэ Анзаур, федеральнэ инспектор шъхьаIэу Сергей Дрокиныр, хэбзэухъу­мэкIо къулыкъухэм, республикэм иминистерствэ зэфэшъхьафхэм, муниципалитетхэм япащэхэр.
Урысые Федерацием итранспорт, иэнергетическэ псэуалъэхэм ыкIи иинфраструктурэ, джащ фэдэу цIыфхэр на­хьыбэу зыщызэIукIэхэрэ чIыпIэхэм диверсие-террористическэ мыхъо-мы­шIа­гъэхэу ащызэрахьэхэрэр нахьыбэ зэрэхъухэрэм къыхэкIэу Адыгэ Респуб­ли­кэм ит псэуалъэхэр къэухъумэгъэнхэмкIэ Iофтхьэбзэ тедзэхэу зэрахьащтхэм комиссием изэхэсыгъо щатегущыIагъэх.
Псэлъэ шъхьаIэ къэзышIыгъэр терроризмэм пэшIуекIогъэнымкIэ комиссием итхьаматэ игуадзэу, щынэгъончъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ипащэу Михаил Кемеровыр ары. Нэужым яеплъыкIэхэр къыраIотыкIыгъэх.
Республикэм и ЛIышъхьэ къызэрэ­хигъэщыгъэмкIэ, комиссием ышIыгъэ унашъохэр шъолъыр ыкIи муниципальнэ къулыкъу гъэнэфагъэхэм яIофшIэн лъа­псэ фэхъунхэ фае.
«Ахэм ягъэцэкIэн зыфэIорышIэщтыр цIыфхэм ящыIэныгъэрэ япсауныгъэрэ зэрар арамыхыныр, респуб­ликэм иинфраструктурэ зэщымыкъоныр ыкIи зыпкъитыныгъэ ащ илъыныр ары», — къыхигъэщыгъ АР-м и ЛIышъхьэ.