Урысые Iофтхьабзэу «Тэ Урысыем тырицIыф» зыфиIорэм къыдыхэлъытагъэу Адыгеим игурыт еджапIэхэм яапшъэрэ классхэм арысхэу еджэным, творчествэм, спортым, общественнэ IофшIэным гъэхъагъэхэр ащызышIыгъэхэм мэфэкI шIыкIэм тетэу паспортхэр къаратыжьыгъэх.

Адыгеим и ЛIышъхьэу КъумпIыл Мурат зыхэлэжьэгъэ Iофтхьабзэр республикэ филармонием щыкIуагъ.
Джащ фэдэу ащ хэлэжьагъэх АР-м иминистрэхэм я Кабинет, АР-м и Къэралыгъо Совет – Хасэм, АР-м гъэсэныгъэмрэ шIэныгъэмрэкIэ и Министерствэ ялIыкIохэр, кIэлэегъаджэхэр, ны-тыхэр.
Федеральнэ, республикэ къэралыгъо тынхэр зафагъэшъошэ нэуж мыщ фэдэ Iофтхьабзэр зэрэзэхащэрэм мэхьанэшхо зэриIэр Адыгеим и ЛIышъхьэ ишIуфэс псалъэ къыщыхигъэщыгъ. ЛIэужхэр пытэу зэрэзэпхыгъэхэр, нахьыжъхэм ахэлъ хэбзэшIухэр нахьыкIэхэм зэрэлъагъэкIуа­тэхэрэр ахэм дэгъоу къаушыхьаты.
«КIэлэеджакIохэм паспортхэр къазэраратырэр егъэжьэпIэ къодыеу щыт ныIэп, нахьыжъхэм къалэжьыгъэ тынхэр залъэ­гъухэкIэ, ныбжьыкIэхэм къагурэIо ахэр хьалэлэу зэрэлэжьагъэхэр, яIоф зэрэфэшъыпкъагъэхэр, яцыхьэ зэрэзытелъыжьыгъэр ягъэхъэгъэшхохэм якъэкIуапIэу зэрэхъугъэр. Тэ, нахьыжъхэм, мыщ фэдэ кIэлэцIыкIу чанхэм, зэчыишIухэм хэбзэ-зэхэтыкIэхэр лъагъэкIотэн, республикэ гупсэм ищытхъу арагъэIон зэралъэкIыщтым тицыхьэ телъ», — къыIуагъ Къум­пIыл Мурат.
Адыгеим и ЛIышъхьэ Урысыем игражданин ипаспорт аритыжьыгъ Мамый Алан (Адыгэкъалэ игурыт еджапIэу N 22-р), Пщыжъ Аидэ (Мыекъуапэ игимназиеу N 2-р), Ермолай Лященкэм (Джэджэ районымкIэ гурыт еджапIэу N 9-р), ЩэшIэ Аминэ (Красногвардейскэ рйонымкIэ гурыт еджапIэу N 7-р), Екатерина Трофимчук (Кощхьэблэ районымкIэ гурыт еджапIэу N 13-р), Демид Сильченкэм (Мыекъопэ районым гъэсэныгъэмкIэ игупчэу N 4-р), Анастасия Радченкэм (Тэхъутэмыкъое районымкIэ гурыт еджапIэу N 27-р), Илья Шумовым (Тэхъутэмыкъое районымкIэ гурыт еджапIэу N 2-р), СтIашъу Ренат (Теуцожь районымкIэ гурыт еджапIэу N 6-р), Аулъэ Бэллэ (Шэуджэн районымкIэ гурыт еджа­пIэу N 1-р).
Мыхэр дэгъоу зэреджэщтыгъэхэм дакIоу «Движение Первых» зыфиIорэм ипроектхэми чанэу ахэлажьэх. Ахэм ащыщыбэмэ олимпиадэхэм, спорт ыкIи нэмыкI зэнэкъокъухэм хагъэунэфыкIырэ чIыпIэхэр ыкIи текIоныгъэхэр къащыда­хыгъ. Ахэр шIушIэ Iофтхьабзэхэм, еджапIэхэм ащызэхэщэгъэ театрэхэм якъэгъэ­лъэгъонхэм, медиа, волонтер IофшIэным чанэу ахэлажьэх, музыкэм, тарихъым, ныдэлъфыбзэм язэгъэшIэн, спортым ыкIи нэмыкIхэм яшъыпкъэу апылъых.
Адыгеим и ЛIышъхьэ псауныгъэ пытэ яIэнэу, гъэхъэгъакIэхэр ашIынэу кIэлэцIыкIухэм афэлъэIуагъ. Урысыем ицIыф шъыпкъэ зэрэхъущтхэм ицыхьэ зэрэте­лъыр хигъэунэфыкIи, КъумпIыл Мурат ахэм гъэхъагъэу ашIыгъэхэм зэригъэразэрэр къыIуагъ, шIоу щыIэр зэкIэ къадэхъунэу афэлъэIуагъ.