Зэрэхэгъэгу фэдэу Адыгеими Урысыем и Мафэ щыхагъэунэфыкIыгъ.

Мэфэкl lофтхьабзэхэр республикэм иныбжьыкlэ патриотическэ зэхахьэхэм къызэlуахыгъ. Мыекъуапэ игупчэ Урысыем ибыракъышхо щаушхугъ, ащ нэбгыришъэрэ шъэныкъорэ фэдиз хэлэжьагъ. Хэкупсэныгъэмрэ зыкlыныгъэмрэ ятамыгъэ ар хъугъэ.
Мэфэкl lофтхьэбзэ шъхьаlэхэр бэмышlэу агъэкlэжьыгъэ къэлэ гупчэу Лениным ыцlэ зыхьырэм щыкlуагъэх. Ахэр къызэlуихыгъэх хэушъхьафыкlыгъэ дзэ операцием хэлажьэхэрэм lэпыlэгъу ягъэкIыгъэным фытегъэпсыхьэгъэ марафоным. АР-м ибзылъфыгъэхэм я Союзрэ хэгъэгум идзэкlолlхэм яунагъохэм я Комитетрэ партиеу «Единэ Россиер» яlэпыlэгъоу ар зэхащагъ. Ащ къыдыхэлъытагъэу къэлэ гупчэм республикэм игуфэкIо зэхахьэхэм яшlушlэ къэгъэлъэгъон щыкlуагъ. Ахэм ялIыкIохэм агъэхьазырыгъэ lэпэщысэ зэфэшъхьафхэр къагъэлъэгъогъагъэх, шIоигъоныгъэ зиIэхэм ахэр ащэфынхэ алъэкIыгъ. Iофтхьабзэм ахъщэу къыкIэкIуагъэр зэкIэ дзэкlолlхэм яфэныкъуагъэхэм ядэгъэзыжьын пэlуагъэхьащт. Джащ фэдэу lашэм изэхэхынрэ иугъоинрэ, апэрэ медицинэ lэпыlэгъур зищыкIагъэхэм ягъэгъотыгъэным фаехэм зыфагъэсэн амал яIагъ.
Къэралыгъо мэфэкlым ихэгъэунэфыкlын хэлэжьагъэх АР-м и Лlышъхьэу Къумпlыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет хэтхэр, къулыкъу зэфэшхьафхэм ялlыкlохэр.

Мэфэкlым къекlолlагъэхэм шIуфэс гущыlэхэмкlэ закъыфигъэзагъ АР-м и Лlышъхьэ. Урысыем и Мафэ къэралы­гъом щыпсэурэ пстэуми ямэфэкlэу зэрэщытыр ащ къыхигъэщыгъ.
«Хэгъэгушхоу ыкlи кlочlэшхоу щыт къэралыгъом узэрэщыщыр зыдэпшlэжьыныр, узэкъотэу инеущырэ мафэ уфэлэжьэныр къыбгурыlоныр мы мафэм шъхьаlэ. Урысыем тырэгушхо! Адыгеир ащ изы lахь цlыкlу. Республикэм щыпсэухэрэм lофэу ашlэрэм ишlуагъэкlэ шъо­лъырым хэхъоныгъэхэр ешIы, ыпэкIэ лъэкIуатэ. Ащкlэ «тхьашъуегъэпсэу» шъо­сэlо. Анахь шъхьаlэр тизыкlыныгъ. Адыгеир, зэрэ Урысые фэдэу, сыдигъокlи зэныбджэгъуныгъэм ищыс. Мамырныгъэрэ зэгурыlоныгъэрэ азыфагу илъэу цlыф лъэпкъ зэфэшъхьафхэр щэпсэух. Унагъо пэпчъ псауныгъэ пытэ илъынэу сышъу­фэлъаIо», — къыlуагъ Адыгеим и ЛIышъхьэ.
Республикэм итворческэ купхэм къатыгъэ къэгъэлъэгъонышхом мэфэкlыр къыгъэбаигъ.
Анцокъо Ирин.