АР-м и Правительствэ зычIэт унэм щыкIогъэ зэIукIэгъоу Адыгеим и ЛIышъхьэу КъумпIыл Муратрэ федеральнэ къэралыгъо учреждениеу гъогухэм я ГъэIорышIапIэу «Черноморье» зыфиIорэм пэщакIэу фашIыгъэ Максим Тарасовымрэ щызэдыряIагъэр республикэм игъогухэм язытет нахьышIу шIыгъэнымкIэ ыкIи ахэм хэхъоныгъэ ягъэшIыгъэнымкIэ Iофыгъоу къэуцугъэхэм афэгъэхьыгъагъ.

ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, министрэхэм я Кабинет и Тхьаматэ игуадзэу Хъоткъо Хъызыр, АР-м псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр.
ЗэIукIэгъум иублэгъум КъумпIыл Мурат пшъэдэкIыжь зыпылъ IэнатIэм зэрэIуагъэхьагъэмкIэ Максим Тарасовым фэгушIуагъ ыкIи Адыгеимрэ федеральнэ автомобиль гъогухэм я ГъэIорышIапIэу «Черноморье» зыфиIорэмрэ шIуагъэ къэзытыщт зэдэлэжьэныгъэу азыфагу илъыр лъэгэпIэ иным тетэу зэрэлъагъэ­кIотэщтым ицыхьэ зэрэтелъыр къыхигъэщыгъ.

«Щынэгъончъэ ыкIи Iэрыфэгъу гъогухэм республикэм иэкономикэ ихэхъо­ныгъэкIэ, инвестициехэр нахьыбэу къи­хьанхэмкIэ, зекIохэм япчъагъэ хэхъо­нымкIэ мэхьанэшхо яI. Арышъ, автомобиль гъогухэм яшIынрэ язэтегъэпсыхьанрэ мылъкушхо апэIутэгъахьэ. Лъэпкъ проектхэмрэ къэралыгъо программэхэмрэ атегъэпсыхьагъэу федеральнэ гупчэм игъоу къытфилъэгъурэ амалхэмрэ IэпыIэгъоу къытитырэмрэ нахь игъэкIотыгъэу зэрэдгъэфедэщтхэм тынаIэ тетэгъэты. Ахэм зыкIэ ащыщ федеральнэ автомобиль гъогухэм я ГъэIорышIапIэу «Черноморьем» къытитырэ IэпыIэгъум ишIуагъэкIэ Инэмрэ Яблоновскэмрэ азыфагу гъогу зэхэкIыпIэу иIэщтым ишIын ублагъэ зэрэхъугъэр. Ащ ишIогъэ­шхо къэкIощт федеральнэ гъогум изы Iахь рыкIорэр нахь макIэ шIыгъэнымкIэ. Джащ фэдэу «Черноморьем» респуб­ликэм икъушъхьэлъэ чIыпIэхэм непэ IофшIэн гъэнэфагъэхэр ащызэшIуехых, Кавказ къэралыгъо биосфернэ заповедникым екIолIэрэ гъогоу А-159-м игъэцэкIэжьыни макIо. А IофшIэнхэм респуб­ликэмкIэ мэхьанэшхо яI», — къыIуагъ АР-м и ЛIышъхьэ.
Республикэм и ЛIышъхьэ къызэрэхигъэхъожьыгъэмкIэ, лъэпкъ проектыкIэу «ЩыIэныгъэм пае инфраструктурэр» зыфиIорэм къыдыхэлъытагъэу, къэралыгъо ыкIи муниципальнэ программэхэм къапкъырыкIыхэзэ, километрэ 85-рэ фэдиз зикIыхьэгъэ гъогу 40 агъэкIэ­жьынэу ыкIи ашIынэу мы илъэсым рахъухьагъ.
Мы аужырэ илъэсихым Адыгеим километрэ 507-рэ зикIыхьэгъэ гъогу 363-рэ щызэтырагъэпсыхьагъ. Ахэм респуб­ликэ фондым щыщ сомэ миллиард 40,4-рэ фэдиз апэIуагъэхьагъ. Росавтодорым иамалхэмкIэ а уахътэм къыкIоцI федеральнэ гъогу километри 101-рэ зэтырагъэпсыхьагъ ыкIи игъэкIотыгъэу агъэцэкIэжьыгъ.
ЗэдэгущыIэгъум илъэхъан респуб­ликэм иавтомобиль гъогухэм ягъэкIэ­жьын, гъогухэм къатехъухьэрэ тхьамыкIагъохэм къакIегъэчыгъэным, федеральнэ гъогухэм арыкIохэрэм япчъагъэ къыщыгъэкIэгъэным, видеоамалхэр нахь игъэкIотыгъэу гъогухэм ащыгъэфедэгъэн­хэм япхыгъэ Iофыгъохэм анэсыгъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.