Top.Mail.Ru

Мэкъуогъум и 15-р — медицинэм иIофышIэ и Маф

Псауныгъэм икъэухъумэн иIофышIэхэу лъытэныгъэ зыфэтшIыхэрэр!

Шъуисэнэхат епхыгъэ мэфэкIым фэшI тышъуфэгушIо!
ЦIыфхэм ящыIэныгъэрэ япсауныгъэрэ якъэухъумэн зищыIэныгъэ зэрэпсаоу пэIузыгъэхьэрэ цIыф бланэхэм инэу тызэрафэразэр къэтэIо ыкIи мэфэкIымкIэ тафэгушIо. Шъо – врачхэм, фельдшерхэм, медсестрахэм – мафэ къэс шъуиIэпыIэгъу зищыкIагъэхэм шъуалъэIэсы, IэпэIэсэныгъэ, гуфэбэныгъэ шъухэлъэу шъуипшъэрылъхэр шъогъэцакIэх.
Илъэс къэс Адыгеим псауныгъэм икъэухъумэнкIэ икъулыкъухэм пэрыт шIыкIэ-амалхэр, технологиехэр аIэ къырагъахьэх. Медицинэм иIофышIэ­хэм шIуагъэ къытэу япшъэрылъхэр агъэцэкIэнхэм пае къулыкъу гъэнэфагъэ­хэм ищыкIагъэр зэкIэ зэшIуахы.
Псауныгъэм икъэухъумэн ылъэныкъокIэ тапэкIи амалыбэ дгъэфедэщт. Технологиехэм узыр зэрэбгъэунэфыщтымкIэ ыкIи ащ узэреIэзэщтымкIэ мэхьанэшхо зэряIэр хэти къыгурыIон фае. ЦIыфхэм яIазэхэрэм шIэныгъэ зэряIэм, IэпэIэсэныгъэ зэрахэлъым имызакъоу, сымаджэ хъугъэ цIыфым гущыIэ фабэу пагъохыщтым, ыгу къызэраIэтыщтым мэхьэнэ гъэнэфагъи иI.
Республикэм псауныгъэм икъэухъумэнкIэ исистемэ гуетыныгъэ ин фыряIэу Iоф щызышIэхэрэм ыкIи ащ иветеранхэм тызэрафэразэр, зыфэгъэзэгъэхэ Iофым зэрэфэшъыпкъэхэм, тичIыпIэгъухэм ящыIакIэ нахьышIу зэрэхъущтым яшъыпкъэу зэрэдэлажьэхэрэм апае осэшхо зэрафэтшIырэр къэтэIо.
ШъуиIофшIэгъу мафэ къэс гушIуагъо къышъуфихьынэу, шъузэIазэхэрэр къышъуфэрэзэнхэу, сэнэхьатэу къыхэшъухыгъэр цIыфхэм ящыкIэгъэ шъып­къэу зэрэщытым шъугу нахь къыIэтэу шъущыIэнэу шъуфэтэIо.
Ныбджэгъу лъапIэхэр, псауныгъэ пытэ, щыIэкIэшIу, насып шъуиIэнэу, шъуиунагъохэм зэгурыIоныгъэ-фэбагъэ арылъынэу, Iофэу жъугъэцакIэрэми гъэхъэгъакIэхэр щышъушIынхэу тышъуфэлъаIо.

Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу
Владимир Нарожнэр