Мэкъэтынхэр неущ зэфашIыжьых
«ЩыIэныгъэм пае инфраструктурэр» зыфиIорэ лъэпкъ проектым къыдыхэлъытагъэу зэхащэгъэ мэкъэтынхэр ыкIэм фэкIуагъэх, мэкъуогъум и 12-м ахэр зэфашIыжьых.
Шъугу къэдгъэкIыжьын, псэупIэхэм яобщественнэ чIыпIэхэу зэтырагъэпсыхьащтхэр цIыфэу ахэм адэсхэм къыхахынхэу мэкъэтынхэр 2017-рэ илъэсым къыщегъэжьагъэу зэхащэх. Нэбгырэ мин 20-м къыщымыкIэу зыдэсхэр ары ащ хэлажьэхэрэр. Урысыем ишъолъырхэм зэкIэми онлайн шIыкIэм тетэу ар ащэкIо. АдыгеимкIэ къалэу Мыекъуапэ, поселкэхэу Инэм, Яблоновскэр ары чIыпIэу гъэкIэжьын зищыкIагъэхэр къызщыхахыхэрэр.
Мыгъэ мэкъэтынхэр мэлылъфэгъум и 21-м рагъэжьагъэх. Адыгеим икъэлэ шъхьаIэ щашIырэ чылысэу Успение Пресвятой богородицы къыпэIулъ чIыпIэр, Хэгъэгу зэошхом хэкIодагъэхэм ясаугъэт зэхэт къызэлъиубытырэ шъолъырыр ыкIи къалэм ирайон цIыкIоу «Восход» зыфиIорэм иурамэу Шоссейнэм тет скверыр зэнэкъокъум хагъэлэжьэнэу къырагъэуцогъагъ.
Инэм псэупIэ коимкIэ къутырэу Суповскэмрэ къуаджэу БжыхьэкъоякIэмрэ якIэлэцIыкIу джэгупIэхэр, поселкэу Яблоновскэм иурамхэу Космическэмрэ Краснодарскэмрэ атет спорт площадкэхэр, зэпстэумкIи щы мэхъух, хагъэлэжьэнхэу къыхахыгъагъэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, Мыекъуапэ пштэмэ, чылысэу Успение Пресвятой богородицы къыпэIулъ чIыпIэр апэ ит, нэбгырэ 15905-мэ ащ амакъэхэр фатыгъэх.
Къэлэ гъэпсыкIэ зиIэ Инэм псэупIэ коимкIэ къуаджэу БжыхьэкъоякIэм культурэм и Унэу дэтым дэжь щыт кIэлэцIыкIу джэгупIэм пэрытныгъэр ыIыгъ. Къоджэдэс нэбгырэ 4464-мэ ар къыхахыгъ.
Поселкэу ЯблоновскэмкIэ урамэу Космическэм тет унэу N 37-м дэжь щыт кIэлэцIыкIу-спорт площадкэр апэ ит, мэкъэ 3605-рэ фатыгъ.
— Мэкъэтынхэм Адыгеим щыпсэухэрэр зэрахэлажьэхэрэм мэхьанэшхо иI. ТызэхэгущыIэжьызэ тызэдеIэжьмэ ары тиреспубликэ гупсэ нахь дахэ, нахь къабзэ, щыпсэухэрэмкIи, зекIоу къакIохэрэмкIи Iэрыфэгъу зытшIышъущтыр, — къыхигъэщыгъ АР-м и ЛIышъхьэу КъумпIыл Мурат ащ къытегущыIэзэ.
ГъэрекIо мыщ тетэу цIыфхэм амакъэхэр атыхи, МыекъуапэкIэ Лениным ыцIэ зыхьырэ гупчэр, Инэм псэупIэ коимкIэ поселкэу Дружнэм иурамэу Крестьянскэм тет кIэлэцIыкIу джэгупIэр, поселкэу Яблоновскэм иурамэу Кочубей ыцIэ зыхьырэм тет спорт площадкэр къыхахыгъэх. Ахэр мыгъэ зэтырагъэпсыхьэх.