ЖъоныгъокIэ мазэм и 4-м къыщегъэжьагъэу и 26-м нэс Росреестрэм и ГъэIорышIапIэу АР-м щыIэм фэтэрыбэу зэхэт унэ 19 кIэу республикэм щашIыгъэу, ар квадрат метрэ 2600-рэ мэхъу, кадастрэ учетым хигъэуцуагъ. Ащ щыщэу 10-р Мыекъуап зыщагъэуцугъэр.

Шъугу къэдгъэкIыжьын, 2025-рэ илъэ­сым игъэтхапэ и 1-м къыщыублагъэу цIыфхэм яахъщэ зэхалъхьэзэ ашIыгъэ псэуалъэр «дольщикхэм» заратыжьырэ ыкIи кадастрэ учетым зыхагъэуцорэ ужым, псэолъэшIым унэр къэралыгъо регистрацие зышIыщт къулыкъум электроннэ шIыкIэм тетэу тхылъхэр фигъа­хьынхэ фае.
Зиахъщэ хэзылъхьагъэхэм унэр зэраритыжьырэр къэзыушыхьатырэ тхы­лъым зызэдыкIэтхагъэхэм ыуж мэфэ 30 нахьыбэ темышIэу ар ыгъэцэкIэнэу законым къыщеIо. ПсэолъэшIым ар Iэпэдэлэл ышIыгъэмэ, зиIахь хэзылъхьи фэтэрыр язгъэшIыгъэм ежь-ежьырэу тхылъхэр Росреестрэм IэкIигъэхьанхэ фит.
Къэралыгъо ыкIи мунципальнэ фэIо-фашIэхэр зыщагъэцакIэхэрэ Гупчэм екIуалIэмэ ахэр ытынхэ ылъэкIыщт. Мы илъэсым игъэтхапэ и 1-м нэс актым зэдыкIэтхагъэхэмэ, тхьапэм тетхэми хъущт. Джащ фэдэу къэралыгъо фэIо-фашIэхэм япортал е Росреестрэм иинтернет нэкIубгъо ащитыни ылъэкIыщт.