ЖъоныгъуакIэм и 30-м КъокIыпIэм щыпсэурэ лъэпкъхэм яискусствэкIэ Къэралыгъо музеим икъутамэу Мыекъуапэ дэтым Юрий Камелиным иунэе къэгъэлъэгъонэу «Дорогами странствий» зыфиIоу, сурэтышIыр къызыхъугъэр илъэс 80 зэрэхъурэм фэгъэхьыгъэр къыщызэIуахыгъ.

Ащ иэкспозицие ышIыгъэ сурэт 62-рэ щыплъэгъун плъэкIыщт.
МэфэкI къэгъэлъэгъоныр псэлъэ фабэкIэ къызэIуи­хыгъ музеим икъутамэ ипащэу ШъэуапцIэкъо Аминэт. Ар кIэкIэу, IупкIэу сурэтышIэу Ю. В. Камелиным ищыIэкIагъэм, иIофшIагъэхэм къатегущыIагъ. Творческэ цIыф пстэумэ зыкIэ афэдэу, игъогухэр гупшысэн мыухыжькIэ зэрэпкIэгъагъэхэр, икIэсэ сурэтыр ежь ыгукIэ зэхишIэрэ пстэумэ япхыгъэу, шъо теплъэ зэфэшъхьафхэмкIэ зэрэзэригъэкIущтыгъэхэр кIигъэтхъыгъ.
АР-м культурэмкIэ иминистрэ игуадзэу Кушъу Светланэ Ю. Камелиным имэфэкI къэгъэлъэгъон сурэтышIыр щыIагъэмэ илъэс 80 зэрэхъущтыгъэм епэсыгъэ дэдэу ылъытагъ. ЩыIэныгъэм илъэныкъуа­бэ куоу изылъэгъукIыщтыгъэ сурэтышIыр непи къыт­хэтым фэдэу, къэгъэлъэгъоным танэIу къыригъэуцоу икартинэхэр зэрэлъэгъупхъэхэр, зэрэзэфэшъхьафхэр, шIыкIэ-екIолIэкIэ гъэшIэгъонхэр сурэтымкIэ зэрэIэ­кIэлъыгъэхэр кIигъэтхъыгъ, мэфэкI къэгъэлъэгъоным къекIолIагъэхэм, ныбжьыкIэхэм гухахъо хагъотэнэу къафэлъэIуагъ.
МэфэкIым ягуапэу хэлэжьагъэх сурэтышIым ып­хъуитIу. Адыгеим имузеишхо ятэ исурэтшIыгъабэ къызэрэщагъэлъагъорэр, зэхахьэм цIыфыбэ къызэрекIолIагъэр зэрягуапэр къаIуагъ. АР-м культурэмкIэ и Министерствэ, министрэм игуадзэу Кушъу Светланэ ыкIи ШъэуапцIэкъо Аминэт «тхьашъуе­гъэпсэу» къараIуагъ, ятэ ихудожественнэ IэшIа­гъэхэмкIэ «КаталогыкIэр» ежь музейми, пащэхэми, къэгъэлъэгъоныр зыгъэхьазырыгъэ музеим инаучнэ IофышIи къафагъэшъошагъэх.
Дзэукъожь
Нуриет.