ШIушIэным зэфищагъэх
ЧIыпIэ къин ифэгъэ цIыфым уишIуагъэ ебгъэкIыным нахь тхъагъо щымыIэу алъытэ Адыгэкъалэ щыщ бзылъфыгъэхэу ГъукIэлI Аминэт, Мэлгощ Асиет ыкIи Хъут Альбинэ.
Мыхэр ыпэкIэ зэрэшIэщтыгъэхэп, ау шIушIэным зэфищагъэх. Нэбгырэ пэпчъ унагъо иI, сабыйхэр епIу, иIофшIэн егъэцакIэ, ау ащ дакIоу сабый цIыкIоу зянэ-зятэ зимыIэжьыхэм е къэзыбгынагъэхэм IэпыIэгъу афэхъунхэр япшъэрылъэу мыхэм алъытэ.
БэмышIэу ахэр Мыекъуапэ дэт кIэлэцIыкIу унэм щыIагъэх. КIэлэцIыкIухэм якъэухъумэн и Дунэе мафэ ехъулIэу мэфэкI шъыпкъэ афызэхащагъ. Къэгъэлъэгъон цIыкIухэр къафашIыгъэх, Быщтэкъо Изабеллэ, Мэлгощ Салим орэдхэр къаIуагъэх, агъэджэгугъэх. Машинищым арызэу, шъхьадж къыугъоигъэр къафащагъ. Аныбжь елъытыгъэу джэгуалъэхэр, щыгъынхэр, тхылъхэр, порошокхэр, памперсхэр, пхъэшъхьэ-мышъхьэхэр, IэшIу-IушIухэр, анахь цIыкIухэм ашхырэ кашэхэр ыкIи нэмыкIыбэ къафащагъ. ШIушIэн Iофтхьабзэр зэхэзыщагъэхэм зэрафэразэр кIэлэцIыкIу унэм ипащэ къыIуагъ.
— Сабый цIыкIухэр зэрэчэфыгъэхэр зымыуасэ щыIэп. Ахэр зыми щагъакIэхэрэп, ау мыщ фэдэ мэфэкIхэр агу къенэжьы. ЕгъашIи ташIагъэм фэдэу къытэкIолIагъэх, къыддэджэгугъэх. Ны-тыхэр ары сабыйхэр къэзыухъумэнхэ фаер, ахэм япшъэрылъ амыгъэцIакIэу гъогум къызэрэтырагъэнагъэхэр зэхэпшIэныр къины. Анэгу цIыкIухэм гугъэу акIэлъыр бэрэ сыгу икIыжьыщтэп. Тыфай сабый пэпчъ унагъом щапIунэу, насыпышIоу къэтэджынэу. Мыщ фэдэ шIушIэ Iофтхьабзэхэм сазыхэлажьэкIэ пшъэрылъэу сиIэр згъэцэкIагъэу къысшIошIы, ар тапэкIи лъызгъэкIотэщт, — еIо ГъукIэлI Аминэт.
Аминэт Краснодар акушер-гинекологэу Iоф щешIэ, апэрэ квалификацие иI, сабыитIу епIу. IофшIэнымрэ унагъомрэ уахътэр зэкIэ аштэ нахь мышIэми, шIушIэныр зыщигъэгъупшэрэп. Илъэс пчъагъэ хъугъэ гъот макIэ зиIэ унагъохэм IэпыIэгъу афэхъу. Волонтер, УФ-м псауныгъэр къэухъумэгъэнымкIэ и Министерствэ ищытхъу тхылъ къыфагъэшъошагъ.
Хъут Альбинэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «СМУ-2» зыфиIорэм экономистэу Iоф щешIэ, апэрэ категорие иI. АР-м и Къэралыгъо Совет — Хасэм идепутат иIэпыIэгъу. Пшъэшъэжъые епIу, шIушIэным бэшIагъэ зыпылъыр, кIэлэцIыкIу унэхэр къекIухьэх.
Мэлгощ Асиет Краснодар медсестрау Iоф щешIэ. Илъэс 15 хъугъэ сабый цIыкIухэм адэжь зыкIорэр. КIэлищ епIу, Салим янэ игъусэу шIушIэ Iофтхьабзэхэм ахэлажьэ, орэд къеIо.
ШIушIэ Iофтхьабзэр зэхащэнымкIэ IэпыIэгъу къафэхъугъэ пстэуми зэрафэразэхэр бзылъфыгъэхэм къаIуагъ. Анахьэу Адыгэкъалэ дэт кIэлэцIыкIу IыгъыпIэу N 6-м ипащэу ТхьалI Къутас, Урсэкъо Заирэ, Бэгъушъэ Анжелэ, НапцIэкъо Марьянэ, Саида Лаюк, ГъукIэлI Руслъан, Хъут Мурат «тхьашъуегъэпсэу» араIо.