Ядунэе цIыкIу зыфэдэр къагъэлъэгъуагъ
КIэлэцIыкIухэм якъэухъумэн и Дунэе мафэ ипэгъокIэу аутизмэ зиIэ сабыйхэм афэгъэхьыгъэ Iофтхьабзэ Адыгеим и Сурэт къэгъэлъэгъуапIэ къыщызэIуахыгъ.
Мыщ фэдэ сабыйхэм агу ихъыкIырэр, ядунэе цIыкIу зыфэдэр къизыIотыкIырэ сурэт 62-рэ къыщагъэлъэгъуагъ. Ахэр гъэшIэгъоных, купкI ин ахэлъ. Проектыр илъэсым къыкIоцI агъэцэкIагъ, мэзищэ сурэтхэр тырахыгъэх. Унэгъо 22-мэ ащапIурэ кIэлэцIыкIу 24-рэ хэлэжьагъэх. Сурэттех нэбгыри 7-мэ яIофшIэнхэр мыщ щызэхэугъоягъэх.
Аутизмэ зиIэ сабыйхэр пыдзы амышIыхэу, гукIэгъуныгъэ нэбгырэ пэпчъ къызыхигъафэзэ гущыIэгъу, IэпыIэгъу афэхъунхэр ары пшъэрылъ шъхьаIэу зэхэщакIохэм зыфагъэуцужьыгъэр.
— Мы къэгъэлъэгъоныр ыпэрапшIэу тэщ пай, мыщ фэдэ сабыйхэм ар ящыкIагъэп, ежь ядунэе цIыкIу ахэр щэпсэух. Аутизмэ зиIэхэр тыгукIэ къэтштэнхэм, гукIэгъуныгъэ афытиIэным мэхьанэшхо иI. Непэрэ мафэм я 100-рэ сабый пэпчъ мы узыр иIэу агъэунэфы. Ахэр щыIэныгъэм хэщэгъэнхэр, къин къащымыхъоу псэунхэр тэры зыIэ илъыр. НэмыкIхэм мыхэр зэрафэмыдэхэр, агу зэрэкъабзэр атетхыгъэ сурэтхэм къагъэлъагъо, янэ-ятэхэм шIулъэгъоу афыряIэр ащыпхырыщыгъ. Язакъоу, янэ-ятэхэм ягъусэхэу сурэтхэр атетхыгъэх, псынкIагъэп, ау анахь мэхьанэ зиIэ IофшIэнэу дгъэцэкIагъэхэм ащыщэу тэлъытэ ядунэе цIыкIу щыщ тызэрашIыгъэр, агу къызэрэтфызэIуахыгъэр, ащкIэ лъэшэу тафэраз, — къыIуагъ Iофтхьабзэм икIэщакIоу, модельнэ еджапIэм ипащэу, сурэттехэу Елена Михайловам.
Мы къэгъэлъэгъоным мэхьэнэ ин зэриIэр гущыIэ зэратыгъэ ныхэми къаIуагъ. НэмыкI лъэныкъокIэ зэплъыжьыгъэх. ЩэIэгъэшхо яIэу сурэттеххэм Iоф зэрадашIагъэр, ясабыйхэм зэрагурыIуагъэхэр къыхагъэщыгъ. ЯщыIакIэ зэхашIэн ыкIи сурэтымкIэ къагъэлъэгъон зэралъэкIыгъэмкIэ зэрафэразэхэр къаIуагъ.
2015-рэ илъэсым республикэ общественнэ организациеу «Особенные дети Адыгеи» зыфиIорэр зэхащагъ. Аутизмэ зиIэ сабыйхэм IэпыIэгъу афэхъугъэнымкIэ, щыIэныгъэм хэщэгъэнхэмкIэ ащ IофшIэнышхо егъэцакIэ. Мыщ фэдэ сабый зэрыс унагъохэм ахэхъо зэпыт, ау организацием хэтыр зэрэмакIэр ащ ипащэу Анна Ошхуновам къыIуагъ. ЯгумэкIыгъохэр язакъоу зэшIуамыххэу, зэдеIэжьхэзэ сабыйхэм ящыIэныгъэ гъогу нахь псынкIэ зэрашIыщтым зэрэдэлэжьэщтхэр къыIуагъ.
ДЕЛЭКЪО Анет.