Пшъэры­лъыбэ зыгъэцэкIэрэ ныбжьыкIэ гупчэу «Адыгеим иныбжьыкIэхэр» зыфиIорэр мэфэкI шIыкIэм тетэу Мыекъуа­пэ къыщызэIуахыгъ.

Адыгеим и ЛIышъхьэу КъумпIыл Мурат а Iофтхьабзэм хэлэжьагъ. Ащ нэмыкIэу Гупчэм икъызэIухын къекIолIэгъагъэх АР-м иминистрэхэм я Кабинет и Тхьаматэу КIэрэщэ Анзаур, Урысые Федерацием и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу Цэй Эдуард, Адыгеим ими­нистрэхэм я Кабинет и Тхьаматэ игуа­дзэу Виктор Орловыр, АР-м гъэсэ­ны­гъэмрэ шIэныгъэмрэкIэ иминистрэу Ев­гений Лебедевыр, АР-м ныбжьыкIэхэм яIофхэмкIэ и Комитет итхьаматэу Максим Галушкиныр, республикэм иапшъэрэ еджэпIитIумэ ялIыкIохэр.
Гупчэм ипащэу Мыгу Бислъан респуб­ликэм и ЛIышъхьэрэ къекIолIагъэхэмрэ Гупчэм къыщырищэкIыгъэх — Офисэу «Адыгеим иныбжьыкIэхэр» зыфиIорэр къалэу Мыекъуапэ игупчэ шъыпкъэ ит, урамэу Пионерскэм тет тарихъ-архитектурэ псэуалъэу ыпэкIэ кIэлэцIыкIу стоматологиер пIэлъэ кIыхьэм къыкIоцI зыхэтыгъэм ар къыщызэIуахыгъ. НыбжьыкIэхэм Iоф ашIэнымкIэ, ямурадышIу­хэр пхыращынхэмкIэ ащ фэдэ чIыпIэ яIэ хъуным иамал къэзытыгъэр урысые зэнэкъокъоу «Шъолъырыр ныбжьыкIэхэм апай» зыфиIоу лъэпкъ проектэу «Гъэсэныгъэм» тегъэпсыхьагъэу ныбжьыкIэхэм яIофхэмкIэ Федеральнэ агентст­вэм зэхищэрэм тиреспубликэ текIоныгъэ къызэрэщыдихыгъэр ары. Федеральнэ бюджетым сомэ милион 75,6-рэ къы­хагъэкIи, ащ пэIуагъэхьагъ. Квадрат метрэ 440,9-рэ хъурэ унэм игъэкIотыгъэ гъэцэкIэжьынхэр рашIылIагъэх, тарихъ теплъэу иIэр нахь агъэкIэжьыгъ, квадрат метрэ 1041-р хъурэ чIыпIэу къыпэIулъри дахэу зэтырагъэпсыхьагъ.

Унашъхьэм къыщегъэжьагъэу коммуникациехэм анэсыжьэу зэкIэ агъэкIэ­жьыгъ. НыбжьыкIэ гупчэм пае джырэ уахътэм диштэрэ Iэмэ-псымэхэр ыкIи мебелыр къащэфыгъ. Организацием ипшъэрылъхэр икъоу зэшIуихынхэм пае ищыкIэгъэщтыр зэкIэ мыщ хэт. Апэрэ къатым Iоф зыщашIэщт кабинетхэр, зэIукIэгъухэр, Iэнэ хъураехэр, зэнэкъо­къухэр зыщыкIощтхэ конференц-залыр тетых, ащ ычIэгърэ къатым зызща­гъэ­псэфыщт, уахътэр ашIогъэшIэгъонэу зы­щагъэкIощт, лекциехэм къызщяджэщтхэ унэхэр хэтых.

Мыгу Бислъан къызэриIуагъэмкIэ, Гупчэм нэбгырэ 27-рэ щэлажьэ. Ащ кIэлэцIыкIухэмрэ ныбжьыкIэхэмрэ апае социальнэ мэхьанэ зиIэ Iофтхьабзэхэр щызэшIуахых. Илъэсыр къызихьагъэм къыщегъэжьагъэу организацием Iоф­тхьэбзэ 200-м ехъу зэхищагъ. Ахэм нэбгырэ мини 9 фэдиз къякIолIагъ. Пчэдыжьым сыхьатыр 8-м къыщегъэ­жьагъэу пчыхьэм сыхьатыр 11-м нэс ныбжьыкIэхэм апае Гупчэр зэIухыгъэщт. Мыщ кIэлэцIыкIухэм ятворческэ амалхэм ща­пылъынхэ, гуфэкIо ыкIи патриот Iоф­тхьабзэхэм ахэлэжьэнхэ, общественнэ IофшIэным епхыгъэ Iофхэр щагъэцэкIэнхэ, социальнэ мэхьанэ зиIэ проектхэмкIэ IофшIэкIэшIоу щыIэ хъугъэр аIэ къыщырагъэхьан алъэкIыщт. ХэушъхьафыкIыгъэ дзэ операцием хэлажьэхэрэм, хабзэм илIыкIохэм, экспертхэм зэIукIэгъухэр ща­дашIышъущт.
Адыгеим и ЛIышъхьэу КъумпIыл Мурат Гупчэм зыщэIэм къызэрэхигъэщыгъэмкIэ, ныбжьыкIэхэм IэпыIэгъу ятыгъэныр хэ­бзэ къулыкъухэм анахь лъэшэу анаIэ зытырагъэтыхэрэм ащыщ. НыбжьыкIэ политикэм хэхъоныгъэ ышIыным, сэнаущыгъэ зыхэлъ кIэлэцIыкIухэр къыхэгъэщыгъэнхэм ыкIи ахэм яамалхэр икъоу гъэунэфыгъэн­хэм апае бэ зэшIуахырэр. Урысыем и Президентэу Владимир Путиныр кIэщакIо зыфэхъугъэ проектхэу «НыбжьыкIэхэмрэ кIэлэцIыкIухэмрэ», «Кадрэхэр» зыфиIо­хэрэм лъэшэу анаIэ атырагъэты.

«ТиныбжьыкIэхэм амалышхохэр аIэкIэ­лъых, непэрэ ныбжьыкIэхэр ары Адыгеим имызакъоу, Урысыеми инеущрэ мафэ зыфэдэщтыр зэлъытыгъэхэр. Лъэныкъо зэфэшъхьафхэм тикIалэхэмрэ типшъа­шъэхэмрэ зыкъызэрэщагъэлъагъохэрэр тинэрылъэгъу: социальнэ проектышхохэр зэшIуахых, спортымкIэ гъэхъэгъэ инхэр ашIых, наукэм ылъэныкъокIи афызэшIохыщтхэр ашIэ, культурэ кIэным хэхъоныгъэ егъэшIыгъэным яIахь хашIыхьэ, гуфакIо­хэм IэпыIэгъу афэхъух. Сицыхьэ телъ ин­вестициехэмрэ ныбжьыкIэхэмрэ анахь мэхьанэшхо непэкIэ зиIэхэм зэращыщхэм, джырэ уахътэм диштэрэ мыщ фэдэ гупчакIэхэм язэхэщэн анахь лъэшэу тынаIэ зытетын фаехэм зыкIэ ахэтэлъытэ, — къыIуагъ КъумпIыл Мурат.
Адыгеим и ЛIышъхьэ къызэриIуагъэмкIэ, офисэу «Адыгеим иныбжьыкIэхэр» зыфиIорэр унэ къодыеу щытэп, кIэлэ ыкIи пшъэшъэ ныбжьыкIэхэм якъулаиныгъэхэм, яамалхэм хэхъоныгъэ зыщафашIын, шIэныгъэхэр аIэ къызщырагъэхьанхэ алъэ­кIыщт, ягупшысэхэр зыщыпхыращы­шъущтхэ чIыпIэу хъун ылъэкIыщт. НыбжьыкIэхэм яIофхэмкIэ Федеральнэ агентст­вэм ипащэу Григорий Гуровым КъумпIыл Мурат зыIокIэм къызэриIуа­гъэмкIэ, 2030-рэ илъэсым нэс республи­кэм икъэлэ ыкIи ирайон пстэуми ныбжьы­кIэ гупчэхэр ащызэхащэнхэу рахъухьагъ.
Гупчэм икъызэIухын зыщыкIогъэ уахътэм КъумпIыл Мурат республикэм иныбжьыкIэ куп гъэнэфагъэхэм япащэхэм зэIукIэгъу адыриIагъ. Адыгеим и ЛIышъхьэ ащ къыщыраIуагъ джырэ ныбжьыкIэхэм яфэныкъоныгъэхэр ыкIи яфедэхэр къызэрэгурыIохэрэм пае инэу зэрэфэразэхэр. Социальнэ мэхьанэ зиIэ проектыкIэхэу ныбжьыкIэ политикэр нахь игъэкIотыгъэу пхырыщыгъэным, культурэр къэухъумэгъэным, кIэлэцIыкIухэр яхэ­гъэгу фэшъыпкъэхэу пIугъэнхэм атегъэпсыхьагъэхэмкIэ предложение заулэ къахьыгъ. Республикэм и ЛIышъхьэ къыгъэгугъа-­
гъэх ахэмкIэ ишIуагъэ аригъэкIынэу ыкIи ведомствэ заулэмэ пшъэрылъхэр афи­шIыгъэх.
«Непэ ащ фэдэ лъэныкъохэм къадедгъаштэзэ, неущ Адыгеир джыри нахь зэтегъэпсыхьагъэ зэрэхъущтым лъэпсэ пытэ фэтшIынэу етэгъажьэ. Сицыхьэ телъ Гупчэр сэнаущыгъэ зыхэлъ кIэлэцIыкIу­хэм зэрафэлэжьэщтым, ащ къычIэкIыщтых пэщакIэхэр, зиIоф хэшIыкIышхо фызиIэщт цIыфхэр, анахь проект гъэшIэгъонхэр пхырызыщышъущтхэр. НыбжьыкIэхэр ары хэхъоныгъэм ылъапсэхэр, арышъ, непэ тфэлъэкIыщтыр зэкIэ тшIэн фае тикIалэхэм яамалхэм нахь зыкъызэIуахынымкIэ, хэхъоныгъэ нахь ашIынымкIэ!», — къы­Iуагъ Адыгеим и ЛIышъхьэ.
Гупчэу «Адыгеим иныбжьыкIэхэр» къызщызэIуахыгъэ мафэм офисыкIэм Iофтхьэбзабэ щызэрахьагъ, зэрэреспуб­ликэу къарыкIыгъэ ныбжьыкIэхэр Iоф­тхьабзэхэм ахэлэжьагъэх. Купэу «Мыс­тым» икъэтынкIэ Iофтхьабзэр ухыгъэ хъугъэ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.