Чылапхъэхэм якъыхэхынкIэ аужырэ шапхъэхэм адиштэрэ шIыкIэхэр гъэфедэгъэнхэм тегъэпсыхьэгъэ мэкъумэщ биотехнопаркэу «Джаджэм» Адыге­им хэхъоныгъэ зэрэщишIырэм фэгъэхьыгъэ къэбарыр Владимир Путиным IэкIагъэхьагъ.

Проектыр пхырызыщырэр компаниеу «Русид» — тихэгъэгу чылапхъэхэр къыщыдэзгъэкIыхэрэмкIэ анахь пэрытыр. ПшъэдэкIыжьэу ыхьырэмкIэ гъунэпкъэ гъэ­нэ­фагъэ зиIэ обществэу «Русская Селекция» зыфиIорэм ипащэу, «Русидым» иIофшIэгъу гъэIорышIакIоу Марк Гехт Президентым къыфиIотагъ проектым шIуа­гъэу къыхьыщтыр зыфэдэр. Ащ Адыгеим зыщегъэушъомб­гъугъэным фэгъэхьыгъэ зэзэгъыныгъэм республикэм ипащэ щыкIэтхэгъагъ я 2-рэ Кавказ инвестиционнэ форумым.
«ЛъэкIэу тиIэр зэкIэ етхьылIэщт Адыге­ир шIыкIакIэхэр зыщагъэфедэрэ, лъэп­къышIухэр ыкIи чылэпхъакIэхэр къызщыхахырэ, шIуагъэ къэзытырэ чIыпIэу мэкъумэщ биотехнопаркым ишIуагъэкIэ хъуным. МэкъумэщышIэхэм къэралыгъом къыщыдагъэкIырэ чылэпхъэ дэгъу ягъэгъо­тыгъэным иIофыгъо псынкIэу ыпэкIэ ригъэхъущт хъызмэтшIэпIакIэм.
Инвесторым Iофэу датшIэрэр лъыд­гъэкIотэщт, мэхьанэшхо зиIэ Iофыгъом ипхырыщынкIэ IэпыIэгъу тыфэхъущт. Ар лъэбэкъушIу IэкIыбым къыращырэ чылапхъэхэм тызэряпхыгъэр гъэмэкIэгъэнымкIэ ыкIи мэкъумэщ-къыдэгъэкIыжьыным итехнологическэ шъхьафитныгъэ гъэпытэгъэнымкIэ», — къащитхыгъ КъумпIыл Мурат исоциальнэ хъытыухэм.