Мэкъуогъум и 1-м кIэлэцIыкIу­хэмрэ ныбжьыкIэхэмрэ ярес­публикэ фестиваль Адыгеим щыкIуагъ.

Адыгэ Республикэм и ЛIышъхьэу КъумпIыл Мурат яIэпыIэгъоу, мы Iоф­тхьабзэр зэхащагъ кIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение Первых» зыфиIорэм ишъолъыр къута­мэрэ Адыгэ Республикэм ныбжьыкIэ IофхэмкIэ и Комитетрэ.
Мыекъуапэ ипчэгу шъхьаIэу агъэ­кIэжьыгъэр ары Iофтхьабзэр зыщыкIуагъэр. КIэлэцIыкIухэмрэ ныбжьыкIэхэмрэ атегъэпсыхьэгъэ интерактивнэ джэгупIэ зэфэшъхьафхэр мэфэ реным мыщ щызэIухыгъагъэх. Мастер-класс, зэнэкъокъу зэфэшъхьафхэр, унэгъо джэгукIэхэр ахэм афызэхащагъэх, аниматорхэм агъэчэфыгъэх.
ФестивалымкIэ анахь хъугъэ-шIэгъэшхоу хъугъэр мэкъамэхэмрэ шъо зэ­фэшъхьафхэмрэ зыщызэпэджэжьырэ псыутхыр къызэрэзэIуахыгъэр ары. Адыгеим и ЛIышъхьэ мэфэкIым хэлэ­жьагъ. КъумпIыл Мурат кIэлэцIыкIухэм якъэу­хъумэн и Дунэе мафэкIэ къыткIэхъухьэрэ ныбжьыкIэхэм, псыутхыр къызэрэзэIуа­хыгъэмкIэ къэлэдэсхэм афэгушIуагъ. Джырэ шапхъэхэм адиштэрэ инженер коммуникациехэр псыутхым щыгъэфедагъэх. Адыгеим ичIыопс, икультурэ лъэгъупхъэ чIыпIэхэм афэгъэхьыгъэ проекциехэу псым къытыридзэхэрэр мэфэкIым хэлэжьагъэхэм лъэшэу агу рихьыгъэх. Къалэм ичIыпIэ анахь да­хэхэм ар ахалъытэнэу, къэлэдэсхэмрэ республикэм икъэлэ шъхьаIэ ихьакIэхэмрэ языгъэпсэфыпIэ хъунэу мэгугъэх.
Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытэгъэ программэу «Къэлэ щыIэкIэ Iэрыфэгъум» диштэу Мыекъуапэ ипчэгу шъхьаIэу джырэ шапхъэхэм атетэу зэтырагъэпсыхьагъэм псыутх хьалэмэтым чIыпIэшхо зэрэщиубытырэр шъугу къэтэгъэкIыжьы. IофшIэнэу агъэцэкIагъэхэм ахэхьэх плиткэр зэрэзэблахъугъэр, тетIысхьэпIакIэхэр, остыгъэхэр, къэзгъэ­кIэрэкIэрэ пкъыгъо цIыкIухэр зэрагъэуцугъэхэр. Чъыгхэу, куандэхэу ащ дэтхэм къахэхъуагъ, къэгъэгъэ гъэкIыпIэхэм ятеплъэ нахь дахэ хъугъэ, газоныкIэхэри зэтырагъэпсыхьагъэх, ахэм автоматическэу псы атыракIэ хъугъэ.
КъумпIыл Мурат къызэрэхигъэщыгъэм­кIэ, пчэгур зэрэзэтырагъэпсыхьагъэр, джырэ шапхъэхэм адиштэрэ псыутхыр къэлэ щыIэкIэ Iэрыфэгъоу цIыфхэм яIэ­нымкIэ IофшIэнэу зэшIуахыгъэхэм къа­кIэкIуагъ. Къэлэдэсхэм ящыIэкIэ-псэукIэ зыкъегъэIэтыгъэным, зекIохэр нахьыбэу республикэм къихьанхэм ахэр зэрафэIорышIэщтхэм щэч хэлъэп.
«Мыщ фэдиз кIэлабэ, ныбжьыкIабэ пчэгум зэрэщытлъэгъурэр лъэшэу ти­гуап. КIэлэцIыкIухэм якъэухъумэн и Дунэе мафэ псыутхыр къызэрэзэIуахыгъэр гушIогъошхоу щыт. Теплъэ дахэ зиIэ республикэм тикIэлэцIыкIухэр щыпсэунхэу, еджэнымкIи, загъэпсэфынымкIи, зэчыеу ахэлъхэм зыкъызэIуахынымкIи амал дэгъухэр яIэнэфу тыфай. Пчэгоу агъэкIэжьыгъэр щыIэкIэ-псэукIэ Iэры­фэгъумкIэ, ныбжьыкIэхэм яамалхэм зягъэушъомбгъугъэнымкIэ Iофышхоу агъэцакIэрэм къыкIэкIуагъэхэм ащыщ. Тэ дгъэпсырэ инфраструктурэри, ныбжьыкIэхэм ягухэлъхэм зэрадедгъаштэ­рэри ащ фэIорышIэщтых. ЗэкIэми тIэ зэкIэдзагъэу тигъэхъагъэхэм тапэкIи ахэдгъэхъощт, республикэ гупчэр нахь дахэ шIыгъэным, ущыпсэункIэ нахь Iэрыфэгъу хъуным кIуачIэу тиIэр етхьы­лIэщт», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет.