Адыгеим и ЛIышъхьэу КъумпIыл Мурат Красногвардейскэ районым щыIагъ Урысыем хэгъэгу кIоцI IофхэмкIэ и Ми­нистерствэ икъутамэ зычIэтыщт къулыкъу­шIэ унакIэм икъызэIу­хын епхыгъэ мэфэкI Iоф­тхьабзэм хэлэжьэным пае.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м хэгъэгу кIоцI IофхэмкIэ иминистрэу Олег Без­смельницыныр, Красно­гвардейскэ районым ипащэу Гъубжьэкъо Темур.
Республикэм и ЛIышъхьэ отделым иIофышIэхэм унэ­чIэ­хьажьым пае афэгушIуагъ, джырэ шапхъэхэм адиштэрэ псэуалъэр ищыкIэгъэ пстэумкIи зэрэзэтегъэпсыхьагъэр къыхигъэщыгъ. Полицейскэхэм Iоф ашIэнымкIэ, цIыфхэр рагъэблэгъэнхэмкIэ, ящыкIэгъэ амалхэр зэкIэ къыдалъытагъэх. Хабзэр укъуагъэ мыхъунымкIэ, районым щыпсэурэ цIыфхэр къэухъу­мэгъэнхэмкIэ, отделым Iофэу ышIэ­­рэм нахь зыкъыIэтынымкIэ а пстэуми яшIуагъэ къэкIощт.
ЦIыфхэр зэрэухъумагъэхэр зэхашIэн, полицием зыфагъа­зэ­мэ ящыкIэгъэ IэпыIэгъур къы­зэраратыщтым, зыгъэгумэкIыхэрэ Iофыгъохэр псынкIэу зэшIохыгъэ зэрэхъущтхэм яцы­хьэ телъын фае. Шъо пшъэры­лъэу шъуиIэхэр шъуиIэпэIэ­сэныгъэ къызфэжъугъэфедэзэ гуетыныгъэ хэлъэу зэрэзэшIошъухыщтхэм ахэр щэгугъых. Общественнэ щынэгъончъэныр щыIэнымкIэ участкэ уполномоченнэхэм Iофэу ашIэрэм кIэу­хэу фэхъущтым мэхьанэу иIэр шъхьа­фэу къыхэзгъэщынэу сыфай. Республикэм ихэбзэ къулыкъухэри ищыкIэгъэ IэпыIэ­гъур къышъуатыным ренэу фэ­хьазырых», — къыIуагъ АР-м и ЛIышъхьэ.
КъумпIыл Мурат къызэриIуа­гъэмкIэ, хэгъэгум ипащэхэм яIэпыIэгъу хэлъэу республикэм илъ щынэгъончъэныр джыри нахь зэрэпытэщтым анаIэ тырагъэты. Республикэм социальнэ ыкIи экономикэ лъэныкъомкIэ зэхъокIыныгъэ инэу фэхъу­хэрэм ателъытагъэу хэбзэухъу­макIохэм гъусэныгъэ адыряIэу IофшIэныр агъэцакIэ.
«ЗэкIэми тынаIэ зытедгъэтырэр ыкIи ткIуачIэ зэтхьылIэрэр цIыфхэм Iэрыфэгъу, щынэгъончъэ щыIакIэ яIэныр ары», — къыIуагъ Адыгеим и ЛIы­шъхьэ.
Отделым Iоф щызышIэхэрэмрэ пэщэныгъэ дызезыхьэхэрэмрэ къафэгушIуагъ АР-м и Къэралыгъо Совет — Хасэм и Тхьаматэу Владимир Нарожнэр.
АР-м хэгъэгу кIоцI IофхэмкIэ иминистрэу Олег Безсмельницыныр къызэгущыIэм къызэрэхигъэщыгъэмкIэ, отделым иуна­кIэу къызэIуахыгъэм мэхьанэшхо иI полицием мылъкумкIэ ыкIи техникэмкIэ иIофхэм язы­тет уахътэм нахь диштэу шIыгъэнымкIэ, ащ щылажьэхэрэм IофшIэнымкIэ амалышIухэр ягъэ­гъотыгъэнхэмкIэ. Олег Безсмельницыным Урысыем хэ­гъэгу кIоцI IофхэмкIэ и Ми­нистерствэ Красногвардейскэ районымкIэ икъутамэ ипэщакIэ цIыфхэр нэIуасэ фишIыгъэх, ар полицием иподполковникэу Хьасанэкъо Эдуард ары.
ИкIэухым хьакIэхэм унакIэр къарагъэплъыхьагъ. Республи­кэм и ЛIышъхьэ IофшIэпIэ каби­нетхэр ыкIи къулыкъум епхыгъэ нэмыкI унэхэр зэригъэлъэгъугъэх, ащ Iоф щызышIэхэрэмрэ фирмэу унэр зыгъэпсыгъэм ипащэхэмрэ гущыIэгъу афэ­хъугъ.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ЛидерСтрой» зыфи­Iорэм IофшIэнхэр ыгъэцэкIа­гъэх, къэралыгъо къулыкъу программэм тегъэпсыхьагъэу федеральнэ бюджетым имылъку къыз­фагъэфедэзэ псэолъэшIынхэр зэшIуахыгъэх. КъатитIоу зэтет унэу квадрат метрэ 1500-рэ хъурэм ишIын сомэ миллион 48-м ехъу пэIуагъэхьагъ. Отделым щылажьэхэрэм якабинетхэр, актовэ залыр, цIыфхэр зыщырагъэблэгъэщтхэ унэхэр, дежурнэхэр зэрысыщтхэр ащ хэтых, джащ фэдэу хэгъэгу кIоцI IофхэмкIэ Министерствэм иветеран организацие Iоф зыщишIэщт чIыпIэри къыфыха­гъэкIыгъ. Унэжъым IофшIэныр щылъагъэкIотэщт пIэлъэ гъэнэфагъэкIэ къаубытыгъэхэр зы­чIэсыщтхэмрэ къулыкъу зау­лэхэмрэ.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.