Урысыем и Мафэрэ кушъхьэфэчъэтесым и Дунэе мафэрэ афэгъэхьыгъэ Iофтхьабзэ непэ республикэм икъэлэ шъхьаIэ щыкIощт.

Ащ игъогу Мыекъуапэ иурам шъхьаIэхэу Пролетарскэмрэ Пионерскэмрэ апхырыкIыщт. Кушъхьэфачъэхэм атесхэм зэкIэмкIи километрэ 18 къачъыщт, ар километри 4,5-рэ зэрылъ едзыгъуиплIэу зэтеутыгъэщт.
Iофтхьабзэм хэлажьэхэрэм гъогурыкIоным ишапхъэхэр агъэцэкIэнхэ ыкIи сыхьатым километрэ 15-м къырамыгъэхъоу къэчъэнхэ фае. ЗэкIэри гъогу-патруль къулыкъум ыкIи кушъхьэфэчъэ еджапIэм яавтомобильхэм ауж итхэу ягъогу къырыкIонхэр шапхъэхэм къадыхэлъытагъ.
Шъолъырым щыпсэухэу ыкIи ихьакIэхэу зыныбжь илъэс 14-м ехъугъэхэр Iофтхьабзэм хэлэжьэнхэу зэхэщакIохэм рагъэблагъэх. КIэлэ­цIыкIухэм апае Зэкъошныгъэм игупчэ чIыпIэ хэхыгъэ щагъэнэфагъ. Зыныбжь ­илъэс 16-м нэмысыгъэхэм нахьыжъхэр ягъусэнхэ фае.
Пстэури Зэкъошныгъэм игупчэ щызэрэугъоищтых, Iофтхьабзэр зыщырагъэжьэщтыр урамхэу Пионерскэмрэ Лермонтовым ыцIэ зыхьырэмрэ зыщызэуалIэхэрэм дэжь. Ыпшъэ­кIэ зигугъу къэтшIыгъэ гупчэм узщышхэн, кушъхьэфачъэм епхыгъэу фэIо-фэшIэ зэфэшъхьафхэр зыщагъэцэкIэн алъэкIыщт чIыпIэхэр къыщызэIуахыщтых, шIухьафтынхэр зэрылъ велолоторее зэхащэщт, чIыпIэ творческэ купхэр зыхэлэжьэщтхэ концерт рагъэ­кIокIыщт.
Iофтхьабзэм хэлэжьэщтхэм ятхын пчэдыжьым сыхьатыр 8-м щегъэжьагъэу 9:45-м нэс кIощт. Сыхьатыр 10-м ягъогу техьащтых, сыхьатыр 12-м къызэдэчъэныр аухыщт. Сыхьатыр 12:10-м щегъэжьагъэу 12:25-м нэс лъэныкъо зэфэшъхьафхэмкIэ текIоныгъэр къыдэзыхыгъэхэм афэгушIощтых, 12:30-м Iофтхьабзэр зэфашIыжьыщт.