ФехтованиемкIэ Къыблэ федеральнэ шъолъырым изэнэкъокъу поселкэу Инэм щыкIуагъ.

Илъэс 15-м ыкIи 18-м анэс зыныбжь пшъашъэхэр ыкIи кIалэ­хэр ащ хэлэжьагъэх. Адыгеим, Краснодар краим, Ростовскэ ыкIи Волгоградскэ хэкухэм, Севастополь, Къырым, Луганскэ ыкIи Донецкэ народнэ республикэхэм яспортсмен 200-м ехъумэ зау­шэтыгъ.
АР-м иминистрэхэм я Кабинет и Тхьаматэ игуадзэу Хъоткъо Хъызыр, Тэхъутэмыкъое район администрацием ипащэу Шъэо Аскэр, олимпийскэ резервым испорт еджапIэу N 2-м ипащэу ЦIэгъошIу Сэфэр, спорт къулыкъухэм япащэхэу Джарымэкъо Азмэтрэ Андрей Калустовымрэ къэзэрэугъоигъэхэм шIуфэс къарахыгъ, гъэхъагъэхэр ашIынхэу къафэлъэIуагъэх.
Унэе зэнэкъокъухэм дышъэ медаль къащихьыгъ Тэхъутэмыкъое спорт еджапIэу N 2-м зыщызыгъэсэрэ Анастасия Крижановскаям. Командэхэм язэнэ­къокъу «Адыгея-1-м» ятIонэрэ чIы­пIэр къыщыдихыгъ. Ащ хэтыгъэх Дарья Беловар, Карина Ка­лустовар, Милана Миргоро-
дар ыкIи Анастасия Крижановскаяр.
ЗэхэщакIохэм къызэраIуагъэмкIэ, мы турнирыр Адыгеим и Тэхъутэмыкъое район зэрэщызэхащагъэм шъолъырымкIэ мэхьа­нэшхо иI. Мы аужырэ илъэсит-
фым спорт разряд къызэратыгъэ спорт­смен 65-рэ республикэм щагъэхьазырыгъ, ахэм ащыщэу 6-р спортым имастер хъунхэмкIэ кандидатых.
Зыныбжь илъэсий хъугъэхэм фехтованием зыфагъэсэн алъэ­кIыщт. Президент грантхэм я Урысые зэнэкъокъоу 2024-рэ илъэ­сым рагъэкIокIыгъэм текIо­ны­гъэр къызэрэщыдихыгъэм ишIуагъэкIэ спорт еджапIэм ищыкIэгъэ оборудованиер ыщэфын ылъэ­кIыгъ.