Компьютерхэм, цифрэм «ятетыгъо» зыщылъэш лъэхъаным тыщэпсэуми, хэутыгъэ тхьапэр, тхылъыр тищыIэныгъэ хэпчыпэн плъэкIыщтэп. Ащ ишыхьат тхылъхэр тхылъеджапIэхэм къачIэкIыхи урамхэм къазэрэтехьагъэр.

«Урам тхылъеджапIэхэр» ыIоу зытетхагъэхэр къэлабэмэ адэтых, Мыекъуапи ахэмэ ясатыр хэуцуагъ. Къэлэ администрацием ипресс-къулыкъу къытыгъэ къэбарымкIэ, непэ республикэм икъэлэ шъхьаIэ ащ фэдэ чIыпIи 6 щагъэпсыгъ. Зыр культурэм и Унэу «Гигантым» дэжь щыI, ятIонэрэр бульварэу «ТекIоныгъэм» тет, плIыр бэмышIэу агъэкIэжьыгъэ къэлэ гупчэу Лениным ыцIэ зыхьырэм къыщызэIуахыгъэх. Районхэми зырызхэми ахэр ащагъэфедэх. Мыщ фэдэ щагу тхылъ мэкIайхэм яхьатыркIэ, тхылъхэр цIыфхэм къахэхьагъэх, нахь апэблагъэ хъугъэх. «Седжэнэу сыфай шъхьаем, тхылъеджапIэм сынэсышъурэп» пIоныр джы нахь къин. КъэпкIухьэ пэтзэ узыблэкIырэм укIэрыхьашъунба?

Щагу тхылъеджапIэхэр цIыфхэм агъэ­федэмэ зэзгъэшIэнэу ахэр зыдэщыт чIыпIэхэм сяблэгъагъ ыкIи пстэуми еджа­кIохэр акIэрытхэу сытефагъ. Тедзэ­гъоу адэлъхэр зыфэгъэхьыгъэхэмкIэ зэфэшъхьафых: къэкIхэрэм, псэушъхьэ­хэм, кIэлэцIыкIухэм апае тхыгъэхэр, детективхэр, усэхэр ыкIи нэмыкIыбэхэр. Шъхьадж хэплъыхьэмэ, шIогъэшIэгъон горэ къыхихыщт. ГущыIэм пае, Галина Бондарь бульварэу «ТекIоныгъэм» тет тхылъ мэкIаим дэжь мэзий хъугъэ къэкIо. Ипхъорэлъфыр щагум къызырищыкIэ къекIуалIэ, ыгу рихьырэ тхылъыр еш­тэшъ, зеджэкIэ къехьыжьы.

— Ары, мыщ ренэу сыкъекIуалIэ. Детективхэр сикIасэхэшъ, тхылъхэм къахэсэгъуатэ, сяджэ. Сыдигъуи хэсымынэу къэсэхьыжьы. Сэ сишIошIкIэ, мыщ фэдэ щагу тхылъеджапIэхэр Iэрыфэгъу дэдэх. Сэри тхылъ горэ къэсщэфи седжэгъа­хэмэ, мы мэкIаим къытесэлъхьэ. Сэщ фэдэу ари зыгорэм ыгу ре­хьы, ештэ, — еIо бзылъфыгъэм.
Ары щагу мэкIайхэм ямэхьанэр —тхылъхэмкIэ узэхъожьыныр, еджэным икультурэ цIыфхэм къахэхьажьыныр ары. Арышъ, тхылъеджэм тедзэгъур зэриштэрэм дакIоу, мэкIаим телъхэм япчъагъэ ежьыми ыгъэбаимэ дэгъу. Тигъэзетэу «Адыгэ макъэми» бэмышIэу адыгабзэкIэ тхылъхэр культурэм и Унэу «Гигантым» дэжь щытым тырилъхьэгъа­гъэх. Агу зэрэрихьыгъэхэм ишыхьат зэрэзэбгырахыгъэхэр. Непэ урамым тесхэу машхэх, кофе ешъох. Арэу зыхъу­рэм, сыда узкIемыджэшъущтыр?
Анцокъо Ирин.