Адыгеим и ЛIышъхьэу КъумпIыл Мурат IофшIэгъу зэIукIэгъу Москва щыдыриIагъ ныбжьыкIэхэм яIофхэмкIэ Федеральнэ агентствэм ипащэу Григорий Гуровым.

Анахьэу къызщыуцугъэхэр ныбжьыкIэ политикэр республикэм щыпхырыщыгъэ­ныр, лъэпкъ проектхэу «Кадрэхэр» ыкIи «НыбжьыкIэхэмрэ кIэ­лэцIыкIухэмрэ» зыфиIохэу мы илъэсым къыщыублагъэу пхыращыхэрэр гъэцэкIагъэ хъунхэр ары.
ЗэдэгущыIэгъум хэлэжьагъэх Адыгеим ыцIэкIэ УФ-м исенаторэу Хъопсэрыкъо Мурат, АР-м ныбжьыкIэхэм яIофхэмкIэ и Комитет итхьаматэу Максим Галушкиныр, республикэ ныбжьыкIэ гупчэу «Адыгеим иныбжьыкIэхэр» зыфиIорэм ипащэу Мыгу Бислъан.
КъумпIыл Мурат федеральнэ къулыкъум ипащэ къыфиIотагъ ныбжьыкIэ политикэм, яхэгъэгу фэшъыпкъэхэу пIугъэнхэм алъэныкъокIэ республикэм Iофтхьабзэхэу щызэрахьэхэрэм, ныбжьыкIэхэм лъэныкъо пстэумкIи зэдиштэу хэхъоныгъэ ашIыным пае амалхэр ягъэ­гъотыгъэнхэм афэгъэхьыгъэу. Илъэс къэс а лъэныкъом ахъщэу пэIуагъахьэрэр нахьыбэ ашIы, ныбжьыкIэ политикэм ихэхъоныгъэ илъэсэу икIыгъэм сомэ миллиони 130-м ехъу пэIуагъэхьагъ.
«Апшъэрэ пшъэрылъэу тиIэр ныбжьыкIэхэм ящыкIэгъэ инфраструктурэр, гупчакIэхэр дгъэпсынхэр, кIалэхэмрэ пшъашъэхэмрэ зыщызэрэугъоинхэ алъэ­кIыщт чIыпIакIэхэр ягъэгъотыгъэнхэр, зигъо Iофыгъохэм анаIэ тырягъэдзэгъэ­ныр, обществэм шIуагъэ къыфэзыхьыщт проектхэр щыIэныгъэм щыпхыращынхэм афэгъэсэгъэнхэр, пэщэныгъэ зехьэгъэнымкIэ IофшIэным икъулаиныгъэхэр аIэкIэгъэхьэгъэнхэр ары. НыбжьыкIэ движениехэр ыкIи Адыгеим икIэлэцIыкIу организациехэр тигъусэхэу а лъэны­къомкIэ тызэдэлажьэ, тиIоф­шIэнкIи ахэм яеплъыкIэхэр къыдэ­тэлъытэх», — къыхигъэщыгъ АР-м и ЛIышъхьэ.

КъумпIыл Мурат къызэриIуагъэмкIэ, ныбжьыкIэ Iофтхьабзэхэр Адыгеим щызэшIуахых, сэнаущыгъэ зыхэлъ ныбжьыкIэхэм язэхахьэу «Фыщтым» бэ къекIуа­лIэрэр, Къыблэ ыкIи Темыр-Кавказ федеральнэ шъолъырхэм къарыкIыгъэхэр ащ бэу къекIуалIэх, джащ фэдэу 2023-рэ илъэсым щыIэгъэ шъолъыр форумэу «Адыгеим иныбжьыкIэхэр» зыфиIорэми бэ хэлэжьэгъагъэр. Адыгеим истудентхэм я Ассоциацие джащ фэдэу чанэу иIоф­шIэн зэхещэ, республикэм икIыгъэхэу Москва, Санкт-Петербург, Краснодар, Ростов-на-Дону, Саратов ыкIи Ставрополь ащеджэхэрэр ащ зэрепхых.
Гупчэу «Адыгеим иныбжьыкIэхэр» зыфиIорэм Iофэу ышIэрэм къытегущы­Iагъ КъумпIыл Мурат. Тарихъ унэжъэу Мыекъуапэ дэтыгъэм зэтегъэпсыхьан IофшIэнхэу рашIылIагъэхэм яшIуагъэкIэ а гупчэр агъэпсын алъэкIыгъ. Урысые зэнэкъокъоу щыIагъэм проектым текIоныгъэр къыщыдихыгъ. НыбжьыкIэхэм яIофхэмкIэ Федеральнэ агентствэм пэщэныгъэ дызэрихьэзэ «Шъолъырыр ныбжьыкIэхэм апай» зыфиIорэ программэр гъэцэкIагъэ хъугъэ. Сомэ миллион 75,6-рэ фэдиз ахъщэ IэпыIэгъоу федеральнэ бюджетым къыхагъэкIи проектым изэшIохын пэIуагъэхьагъ. Президент про­граммэу «Шъолъырыр ныбжьыкIэхэм апай» зыфиIорэм республикэр мы илъэ­сым хэлажьэ.
Республикэм и ЛIышъхьэ къызэрэхигъэщыгъэмкIэ, АР-м ныбжьыкIэ политикэм зыщегъэушъомбгъугъэнымкIэ 2026 – 2030-рэ илъэсхэм ателъытэгъэ Стратегием къызэрэдилъытэрэмкIэ, респуб­ликэм икъэлэ ыкIи ирайон пстэуми ащ фэдэ ныбжьыкIэ гупчэхэр ащызэхащэнхэ мурад яI. Мы илъэсым Теуцожь ыкIи Шэуджэн районхэм ащ фэдэ гупчэхэр ащызэхащэгъахэх.
Ахэм анэмыкIэу республикэм иныбжьыкIэ организациехэмрэ изэхахьэхэмрэ апае кIэлэцIыкIухэм гъэсэныгъэ тедзэ зыщарагъэгъотырэ Гупчэу къалэу Мые­къуапэ дэтым икъатитIу агъэцэкIэжьыгъ. Мы илъэсым къалэу Мыекъуапэ изы унэ игъэкIотыгъэ гъэцэкIэжьынхэр ра­шIылIэнхэу агъэнэфагъ. Шъолъыр къутамэу «Движение Первых» зыфиIорэр зы­дэщыIэм ар хэтыщт. НыбжьыкIэ слетхэр, форумхэр Iофыгъо гъэнэфагъэ­хэм афытегъэпсыхьэгъэ лагерьхэм Iоф ащызышIэщт чIыпIэхэр гъэнэфэгъэнхэм, Iофтхьэбзэ зэфэшъхьафхэр зэшIуахынхэм пае гупчэу «Адыгеим иныбжьыкIэхэр» зыфиIорэм псыхъоу Къурджыпс Iут гъэ­псэфыпIэр къыратыжьыгъ.
КъумпIыл Мурат къызэрэхигъэщыгъэм­кIэ, ныбжьыкIэхэр гуфакIохэм IофшIэнэу агъэцакIэрэм чанэу хэлажьэх, хэушъхьафыкIыгъэ дзэ операцием хэтхэм ыкIи ахэм яунагъохэм арысхэм яшIуагъэ арагъэкIы.
Урысыем иныбжьыкIэхэм япащэу Григорий Гуровым зэIукIэгъум фэгъэ­хьыгъэ зэфэхьысыжьхэу къышIыгъэхэм къащыхигъэщыгъ ныбжьыкIэ политикэр пхырыщыгъэнымкIэ, къыткIэхъухьэхэрэм ащыщхэу сэнаущыгъэ ин зыхэлъхэм нахь зыкъызэIуахынымкIэ ящыкIэгъэ амалхэр ягъэгъотыгъэнхэмкIэ Адыгеим щызэрахьэрэ Iофтхьабзэхэм шIогъэ ин къызэратырэр.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.