Ингушетием илIыкIо куп Адыгеим щыIагъ. Шъолъырым мэкъу-мэщымкIэ иминистрэу Магомед Гагиевыр, къалэу Назрань ипащэу Руслан Оздоевыр, къулыкъу зэфэшъхьафхэм ялIыкIохэр ащ хэтыгъэх. ХьакIэхэм гухэлъ шъхьаIэу яIагъэр архитектурэмкIэ, къэлэгъэпсынымкIэ, псэупIэ-коммунальнэ хъызмэтымкIэ, общественнэ чIыпIэхэм язэтегъэпсыхьанкIэ ыкIи зыгъэпсэфыпIэхэм ягъэпсынкIэ республикэм шIэныгъэу IэкIэлъым зыщагъэгъозэныр, ядэжь ар щагъэфедэжьыныр.

НэIосэныгъэр хьакIэхэм Мыекъуапэ щаублагъ. АР-м и ЛIышъхьэу КъумпIыл Мурат иунашъокIэ, къэлэ администрацием ипащэу Геннадий Митрофановыр лIыкIо купым игъусэу республикэ гупчэм исоциальнэ псэуа­лъэхэр къаплъыхьагъэх, шъолъыритIум ыкIи якъэлэ шъхьаIэхэм язэдэлэжьэныгъэ тегущыIагъэх, шIэныгъэ­хэмкIэ зэхъожьыгъэх.
— Зы къэралыгъу тиIэр, арышъ, типшъэ­рылъхэри зэфэдэх. Лъэныкъо зэфэшъхьаф­хэмкIэ тызэдэлэжьэнымкIэ амалышIухэр тэлъэгъух, арышъ, ащ ылъэныкъокIэ Iоф тшIэщт. ШъолъыритIум ащыпсэухэрэм ящыIэкIэ-псэукIэ нахьышIу шIыгъэнымкIэ ащ ишIуагъэ къэкIощт, — къыIуагъ Геннадий Митрофановым.
Мыекъуапэ ыуж лIыкIо купыр Кощхьэблэ районым кIуагъэ, ащ хэхъоныгъэу иIэхэр зэрагъэлъэгъугъ. Къа­плъыхьагъэхэм ащыщых «Къоджэ псэупIэхэм хахъо ягъэшIыгъэныр» зыфиIорэ къэралыгъо программэм къыдыхэлъытагъэу ашIыгъэ социальнэ ыкIи инфраструктурнэ псэуалъэхэр, тыгъэгъэзэ дэгъэшIыпIэу «Мамрыкъор». Алъэгъугъэм хьакIэхэр ыгъэрэзагъэх. ЯIофшIэнрэ яIофшIакIэрэ зыщагъэгъозэнэу амал зэраритыгъэмкIэ АР-м и ЛIышъхьэу КъумпIыл Мурат рэзэныгъэ гущыIэхэр фагъэзагъэх.