Федеральнэ хэбзэIахь къулыкъум цIыфхэм агу къегъэкIыжьы Урысые физкультурэ-спорт комплексэу «IофшIэнымрэ хэгъэгум икъэухъумэнрэ сафэхьазыр» (ГТО) зыфиIорэм ишапхъэхэр зы­гъэцэкIагъэхэм ащ пэIуагъэхьэгъэ хъар­джхэр афэлъэгъужьыгъэнхэмкIэ амалыкIэ щыIэ зэрэхъугъэр — хэбзэIахьэу лэжьапкIэм хаубытыкIырэм къафыщагъакIэу джы аублэщт.

Ащ итамыгъэ (дышъэми, тыжьынми, джэрзми) зиIэхэм фитыныгъэу ащкIэ яIэр къагъэшъыпкъэ­жьыным пае удостоверениемрэ диспансеризациер зэракIугъэр къэзыушыхьатырэ справкэмрэ IофшIапIэу зыIутым ибухгалтерие е кадрэхэмкIэ иотдел къырахьылIэнхэ фае. ЛэжьапкIэу къыратырэм изы Iахь хэбзэIахьыр тырамылъхьанэу ашIыщт. Илъэс къэс сомэ мин 18-м хэбзэIахь тырамылъхьанэу ашIыщт, НДФЛ-кIэ заджэхэрэм тетэу сомэ мини 2,34-рэ къафызэкIагъэкIожьыщт.
Комплексым ишапхъэхэм ахалъытэх чъэныр, лъэныр, кIуачIэм иушэтын, нэмыкIыбэхэри.
Ахъщэу къышъуфалъэгъужьыщтыр къышъуIэкIэхьаным пае мы илъэсым лъэIу тхылъыр яшъутын, Федеральнэ хэбзэIахь къулыкъум исайткIэ мыщ епхыгъэ Iофтхьабзэхэр икъоу жъугъэунэфынхэ шъулъэкIыщт. 2026-рэ илъэсым къыщыублагъэу 3-НДФЛ-кIэ хэбзэIахь декларациер аIэкIэжъугъэхьан фаеу хъущт.
Ащ нэмыкIэу спортымкIэ учреждение зэфэшъхьаф­хэм защызгъасэхэрэми 2025-рэ илъэсым къыщыублагъэу ащ фэдэ амал яIэ хъущт. ХэбзэIахь зытырамылъхьащтыр сомэ мин 19,5-м нэсыщт.
Къэралыгъо IэпыIэгъур зыфэIорышIэрэр цIыфхэм япсауныгъэ гъэпытэгъэныр, щыIэкIэ-псэукIэ тэрэзым нахь игъэкIотыгъэу ахэр хэщэгъэнхэр ары.
Урысыем и Федеральнэ хэбзэIахь къулыкъу исайт шъуихьэмэ, нахь игъэкIотыгъэу а Iофым зыщыжъугъэгъозэн шъулъэкIыщт.