Урысые зэнэкъокъоу «ЗисэнэхьаткIэ анахь дэгъу» зыфиIорэм ишъолъыр уцугъо мы мафэхэм Мыекъопэ индустриальнэ техникумым щыкIуагъ. ПщэрыхьэкIо анахь дэгъур къыхахыгъ.

Зэнэкъокъум хэлэжьагъэхэм пщэры­хьан закъор арэп япшъэрылъыгъэр, ар шапхъэхэм адиштэу, IэшIоу шIыгъэн фэягъ, дахэу къатыжьынэуи щытыгъ. Илъэсищ нахь мымакIэу Iоф зышIэхэрэр ары хэлэжьагъэхэр. Ахэр: Павел Коротковских, Алексей Никитченкэр, Наталья Осокинар, Нина Тюляевар. ПщэрыхьанымкIэ IэпэIэсэныгъэшхо ахэлъэу пстэуми зыкъагъэлъэгъуагъ.
ЦIыфхэм IофшIэн ягъэгъотыгъэнымкIэ федеральнэ къулыкъумрэ Адыгэ Респуб­ликэм IофшIэнымрэ социальнэ хэхъоныгъэмрэкIэ и Министерствэрэ Iофтхьабзэм икIэщакIох.
— Гурыт сэнэхьатым имэхьанэ къэ­Iэтыгъэным, ар къыхэзыхырэ цIыфхэм япчъагъэ нахьыбэ шIыгъэным афэшI 2012-рэ илъэсым къыщегъэжьагъэу Урысыем мыщ фэдэ зэнэкъокъухэр щызэхащэх. ГъэрекIо Адыгеир апэрэу хэлэжьагъ, къое ихынымкIэ анахь Iэпэ­Iасэр агъэунэфыгъагъ, ащ къэралыгъо уцугъом зыщиушэтыгъагъ.
— Непэ республикэм ит ресторан анахь дэгъухэм япщэрыхьакIохэр зэнэкъо­къух. ЯIофшIэн хэшIыкI ин зэрэфыряIэр нэрылъэгъу тфэхъугъ. Аупщэ­рыхьыгъэхэр IэшIух, дахэу къагъэлъэгъуа­гъэх. Мы зэнэкъокъур илъэс къэс зэ­хэтщэн мурад тиI, — къыIуагъ Галина Цыганковам.
Зэнэкъокъум хэлэжьагъэхэм пцэжъы­ем хэшIыкIыгъэ шхыныгъохэр ашIыгъэх, къупшъхьэхэр хэхыгъэу, дахэу зэгъэфагъэу ахэр къагъэхьазырыгъэх, сыхьатым къыкIоцI IофшIэныр агъэцэкIагъ. Нэужым чэтылым гарнирищ голъэу ашIыгъ, ащ такъикъ 70-рэ тырагъэкIодагъ. Панкейкым соус IэшIу голъэу кIэухым ашIыгъ.
— Шхыныгъо пэпчъ лэгъищ къашIыгъ, ахэм къащэчырэр зэфэдизэу яфэбагъэ шапхъэхэм адиштэу, дахэу гъэпсыгъэу щытынхэ фэягъ. УплъэкIунхэр зэрэдгъэ­цэкIэщт Iэмэ-псымэхэр зэкIэ Мыекъопэ индустриальнэ техникумым къытитыгъэх. Шхынхэр ашIыфэ талъыплъагъ, ахэр зэрэIабэхэрэр тыуплъэкIугъ. ГущыIэм пае, пцэжъыер зэрэзэIыпхыщт доскэм ышъо шхъонтIэн фае, ар зэкIэми агъэцэ­кIагъ, зэрэзэIахыгъэр, къупшъхьэхэр къызэрэхахыгъэр ыкIи нэмыкIыбэмэ тынаIэ атедгъэтыгъ, — къыIуагъ экспертхэм ахэтэу, Адыгэ къэралыгъо университетым и Мыекъопэ къэралыгъо гуманитар-техническэ колледж «Индустрия гостеприимства» зыфиIорэ иотделение ипащэу Нэгъой Фатимэ.
Анахь дэгъоу зыкъэзыгъэлъэгъуагъэр ресторанэу «Бэрэчэт» зыфиIорэм ипщэрыхьакIоу Алексей Никиточенкэр ары, ащ федеральнэ уцугъом джы зыкъыщигъэлъэгъощт. ТекIоныгъэ ыкIи хагъэунэфыкIырэ чIыпIэхэр къыдэзыхыгъэхэм шIухьафтынхэр афагъэшъошагъэх.
ДЕЛЭКЪО Анет.