Адыгеим имэкъумэщ хъызмэтшIэпIэ анахь инхэм ащы­щэу, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мирный-Адыгея» зыфиIорэр мэл ыкIи пчэн лъэпкъышIухэм яя XXV-рэ Урысые къэгъэлъэгъонэу Республикэу Дагъыстан щыкIуагъэм хэлэжьагъ.

Урысыем ишъолъыр зэфэшъхьафхэм къарыкIыгъэ хъызмэтшIэпIэ 65-рэ къызэкIолIэгъэ Iофтхьабзэм «зааненскэ» зыфаIорэ пчэн лъэпкъхэр зыща­Iыгъхэ «Мирный-Адыгеим» лъэныкъо зэфэшъхьафхэмкIэ тынхэр къыщихьыгъэх. ГущыIэм пае, ар пчэнхъуным изегъэушъомбгъункIэ ыкIи ахэм къатырэ щэм гъомылапхъэхэр хэшIыкIыгъэнхэмкIэ къэгъэлъэгъон анахь дэгъухэр зэриIэхэм афэшI Гран-при къырихыгъ ыкIи дипломрэ шIухьафтынрэ къыратыгъэх. Джащ фэдэу щытхъу ыкIи рэзэныгъэ тхылъхэмкIэ къыхагъэщыгъ.

Шъугу къэдгъэкIыжьын, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мирный-Адыгеяр» мэкъумэщ холдингэу «Мирный» зыфиIорэм хэхьэ. Мыекъопэ районыр ары зыщылажьэрэр. Ащ ифермитIумэ «зааненскэ» пчэн лъэпкъхэу шъхьэ 6500-рэ ащаIыгъ, ахэм щэу къакIахырэм гъомылап­хъэхэр зыщыхашIыкIырэ завод яI. «Зааненскэ» лъэпкъыр мэ зыпымыоу, цIыфым ипсауныгъэ шIуагъэ къыфэзыхьырэ щэ бэу къызэритырэмкIэ зэ­лъашIагъэу щыт.