IэпэIэсэ зэфэшъхьафхэм янысхъапэхэр зыхэхьэгъэхэ къэгъэлъэгъон гъэшIэгъон Мыекъуапэ къыщызэIуахыгъ. Пшъэшъэ­жъыехэм апае джэнэт — ары зэу шъхьэм къихьэрэр ар зыплъэгъурэм. ЧIыпIэ нэкI имыIэу квадрат метрэ 15 фэдиз хъурэ унэ мыиным гъэкIэрэкIэгъэ нысхъэпэ 200 фэдиз щызэхэугъоягъ. Ахэр дыгъэх, хъыгъэх, зэхэгъэпкIагъэх, тхылъыпIэм. хъэдэным, пхъэм, бжъэм, уарзэм ыкIи нэмыкIыбэхэм ахэшIыкIыгъэх. Джащ фэдэу, ныбжьэу яIэмкIи нысхъапэхэр зэфэшъхьафых. ГущыIэм пае, Елена Быковам нысхъапэу ыугъоихэрэм ащыщэу къыщыгъэлъэгъуагъэм илъэс 200 фэдиз ыныбжь. Чайна Долл нысхъапэхэкIэ заджэхэрэм ащыщ. Шъхьэмрэ Iэ лъакъо­хэмрэ китай фарфорым хэшIыкIыгъэх. Шъуашэу щыгъыр IэкIэ дыгъэ. Я 19-рэ лIэшIэгъум иублэгъум ашIыгъагъ. Илъэс 50 зыныбжь мышъэжъыери ащ пэмы­чыжьэу щыс. Къэгъэлъэгъоныр зигукъэ­кIыр мысатыу организациеу «Нысхъапэхэм ятарихъ иунэ-музей» зыфиIорэм ипащэу Галина Яроваяр ары. Ежь ышIы­гъэ нысхъапэхэри Iофтхьабзэм къыщыгъэлъэгъуагъэх.
— Шъыпкъэр пIощтмэ нысхъапэхэм яугъоин сыздэлажьэрэр илъэсипшI- пшIыкIутIу фэдиз хъугъэ. ЫужкIэ музей сиIэ хъумэ къыщызгъэлъэгъонэу шIухьафтын къысфашIыщтыгъэх, аущтэуи къысатыщтыгъэх, сэри нысхъапэхэм яшIыкIэ зэзгъэшIагъ. Ау ахэм яунэ-музей зызэхэс­щагъэр бэшIагъэп, Ивановэ сыкъикIыжьи, Мыекъуапэ сыкъызэкIожьыр ары ныIэп — илъэсрэ ныкъорэ фэдизкIэ узэкIэIэбэжьмэ, — еIо Галина Яроваям.
Нысхъапэхэм якъэгъэлъэгъон мэфэкI шIыкIэм тетэу къызэIуахыгъ. Ащ къекIолIагъэхэм джэгуалъэхэр алъэгъугъэхэ къоды­еп, ахэр зышIыгъэхэми гущыIэгъу афэхъу­гъэх. Адыгеим, Краснодар ыкIи Ставрополь крайхэм яIэпэIэсэ нэбгырипшIым ехъу ащ хэлэжьагъ. Ахэм ащыщ Татьяна Емельянова-Супрун. IэпэIасэхэмкIэ ар пстэуми анахь ныбжьыкI. ИсэнэхьаткIэ культуролог, флорист, IэрышIыгъэ пкъыгъохэмкIэ IэпэIас. Ащ инысхъэпабэхэр къэгъэлъэгъоным щыплъэгъунхэ плъэ­кIыщт. Адыгэ нысхъапэхэри джащ фэдэу Iофтхьабзэм къыщыгъэлъэгъуагъэх.
— Шъыпкъэр пIощтмэ, къэгъэлъэгъон гъэшIэгъон дэд. Тикъалэ мыщ фэдэ культурнэ чIыпIэхэр къызэрэдэуцохэрэм тегъэгушIо. Сэгугъэ бэхэр къэкIонхэу, зэрагъэлъэгъунэу, — къыIуагъ къэлэ администрацием культурэмкIэ игъэIорышIапIэ ипащэу Цэй Розэ.
Нысхъапэхэм якъэгъэлъэгъон мэкъуогъум и 8-м нэс кIощт. Ащ икIэщакIоу Галина Яроваям къызэриIуагъэмкIэ, непэрэр апэрэ Iахь ныIэп.
Анцокъо Ирин.