Урысыем иапшъэрэ еджэпIитфэу федеральнэ проектэу «Производительность труда» зыфи­Iорэр зыщагъэцэкIэщтхэм Мые­къопэ къэралыгъо технологическэ университетыр ахэхьагъ.

Ар лъэпкъ проектэу «ШIуагъэ къэзытырэ ыкIи зэнэкъокъур зылъэпсэ экономикэр» зыфиIорэм къыдыхэлъытагъ.
Урысые Федерацием шIэныгъэмкIэ ыкIи апшъэрэ гъэсэныгъэмрэкIэ и Министерствэрэ УФ-м экономикэ хэхъоныгъэмкIэ и Министерствэрэ ар зэхащагъ. Университетхэм амалэу яIэхэм ахагъэхъоныр ары пшъэрылъ шъхьаIэу иIэр.
Проектым иапэрэ унашъохэр щагъэцэкIэнхэу МКъТУ-р къыхахыгъ, ащ ыуж нэмыкI апшъэрэ еджапIэмэ а практикэр ащагъэфедэщт.
Пленарнэ зэхэсыгъом ипрограммэ къыдыхэлъытагъэу лъэтегъэуцо ыкIи экспертнэ сессиехэр зэхащагъэх.
Апшъэрэ еджапIэм иректорэу Къуижъ Саидэ университетым щырагъэкIокIырэ Iофтхьабзэхэм шIуагъэу къатырэр къы­Iотагъ. ХьакIэхэм егъэджэпIэ гупчэу «Фабрика процессов» ыкIи проектнэ офисэу «Бережливый вуз — МГТУ» зыфиIохэрэр зэрагъэлъэгъугъэх. IофшIэныр зэрэгъэпсыгъэр, проектэу агъэцэ­кIагъэхэр ахэм нэрылъэгъу афэхъугъ. Джащ фэдэу экспертнэ сессиер рагъэ­кIокIыгъ.
Мыекъопэ къэралыгъо технологическэ университетыр кIэугъоен шIыкIэр зы­щагъэфедэрэ апшъэрэ еджапI, а ста­тусыр 2018-рэ илъэсым официальнэу иIэ хъу­гъэ. АщкIэ IэпыIэгъу къыфэхъугъэх ком­паниеу «Росатомыр» ыкIи Адыгэ Рес­публикэм и ЛIышъхьэу КъумпIыл Мурат. Университетыр пилотнэ проектэу «КIэугъоекIо правительствэм» хэлэжьэгъагъ. Университетым феде­ральнэ инновационнэ площадкэу «Lean­Skills.lab» зыфиIорэр къыщызэIуахыгъ, ар 2021-рэ илъэсым къыщегъэжьагъэу агъэцакIэ.
Гупчэу «Фабрика процессов» зыфи­Iорэм Урысыем ишъолъыр 25-мэ къарыкIыгъэ нэбгырэ мини 4-м ехъу щагъэ­хьазырыгъ, ахэр студентых, МКъТУ-м иIофышIэх, хабзэм, социальнэ лъэныкъом ыкIи бизнесым ялIыкIох. «КIэугъое­кIо апшъэрэ еджапIэхэм я Ассоциацие» зыфиIорэ проектым университетыр чанэу хэлажьэ.
Мыекъопэ къэралыгъо технологическэ университетым ипресс-къулыкъу.