Народнэ фронтым иныбжьыкIэхэм ыкIи дзэ къулыкъушIэхэм Адыгэ къэралыгъо университетым и Мыекъопэ къэралыгъо-­гуманитар техническэ колледж истудентхэм дзэ частэу 72153-м Iофтхьа­бзэ ащыфызэхащагъ.

НыбжьыкIэхэм яхэгъэгу шIу алъэгъуным ыкIи граждан обществэмрэ дзэмрэ азыфагу зэгурыIоныгъэ илъыным ар фэгъэ­хьыгъагъ.
Дзэ Iофтхьабзэм хахьэу студентхэм апае программэ гъэшIэгъон агъэхьазырыгъ. Пыим ыгъэфедэрэ Iашэхэм, ахэм язэхэлъыкIэ нэIуасэ афашIыгъэх. Джащ фэдэу мы мафэхэм дзэм пшъэрылъэу иIэхэм ыкIи дзэ къулыкъум имэхьанэ афэгъэхьыгъэу лекцие къафеджагъэх. ДзэкIолIхэм къагъэлъэгъуагъ террорис­тическэ щынагъо щыIэ хъумэ узэрэзекIон плъэкIыщт шIыкIэхэр. ЗэкIэ шIоигъоныгъэ зиIэхэм Iашэм изэпкъырыхынкIэ ыкIи иугъоинкIэ заушэтын амал яIагъ.
IофтхьабзэмкIэ анахь шъхьаIэ хъугъэр ТекIоныгъэм ибыракъ квадрат метрэ 200 фэдизым зэрэщагъэбыбэтагъэр ары.
«Мы Iофтхьабзэр апэрэу зэхэтэщэ. Зэ­кIэмкIи ащ нэбгырэ 30 фэдиз хэлэ­жьагъ, ар апэрэ лъэбэкъу ныIэп. КъыткIэхъухьэрэ ныбжьыкIэхэм яхэгъэгу шIу алъэгъоу пIу­гъэнхэм фэIорышIэрэ мыщ фэдэ Iофтхьабзэхэр тапэкIи нахь игъэкIотыгъэу ред­гъэкIокIыщтых», — къыIуагъ Народнэ фронтым илIыкIоу Никита Зоровым.
ЗэхэщакIохэм зэрэхагъэунэфыкIы­гъэмкIэ, ныбжьыкIэхэм яхэгъэгу итарихъ ашIэным, ащ шIулъэгъуныгъэу фыряIэр гъэпытэгъэным ыкIи УФ-м и УIэшыгъэ КIуачIэхэм еплъыкIэ тэрэз фыряIэным мы Iофтхьабзэр фэIорышIэ.