Top.Mail.Ru

Я 7-рэ чIыпIэр къыдихыгъ

Image description

ГандболымкIэ Урысые зэнэкъокъухэр Мыекъуапэ щыкIуа­гъэх. Зыныбжь илъэс 14-м емы­хъугъэ пшъашъэхэм за­ушэтыгъ.

Финал едзыгъом командэ 12 хэлэжьагъ, ахэр купитIоу го­щыгъагъэх. ЖъоныгъуакIэм и 19-м щегъэжьагъэу и 29-м нэс республикэм икъэлэ шъхьаIэ ихьэкIагъэх Москва, Санкт-Петербург, Астраханскэ, Волгоградскэ, Московскэ, Самарскэ, Рос­товскэ, Ярославскэ хэкухэм ыкIи Краснодар краим ялIыкIохэр.
Пшъашъэхэм ухьазырыныгъэ дэгъу къагъэлъэгъуагъ, яешIэгъу­хэр гъэшIэгъонэу кIуагъэх. Адыге­ир турнирым къыщызыгъэлъэ­гъуагъэхэр спорт еджапIэу С. М. Джэнчатэм ыцIэ зыхьырэм зыщызыгъасэхэрэр ары. Апэрэ едзыгъом ахэм зэIукIэгъуитIу ашIуахьыгъ, ащ къыхэкIыкIэ медальхэр къахьын амал яIагъэп. Я 5 — 8-рэ чIыпIэхэм афэбанэ­хэзэ я 7-рэ хъугъэх, Самарскэ хэкум иятIонэрэ командэ джыри зэ атекIуагъэх.
Турнирым иешIэгъу шъхьаIэ щызэIукIагъэх Краснодар ыкIи Астрахань якомандэхэр, ахэр финалныкъом щатекIуагъэх Волгоград ыкIи Москва ялIыкIохэм. Гъунэгъу краим икомандэ нахь лъэшыгъ, 19:17-у текIоныгъэр къыдихыгъ. Москва ящэнэрэ хъу­гъэ, ащ Волгоград 22:20-у къы­шIуихьыгъ.


Командэхэр зыдэщыт чIыпIэхэр:

  1. «Академия гандбола-1» (Краснодар).
  2. «Астраханскэ хэкур-1».
  3. «Юность Москвы».
  4. «Динамо-2» (Волгоград).
  5. «СШОР N 1» (Санкт-Петербург).
  6. «Самарскэ хэкур-1».
  7. «СШ N 1» (Мыекъуапэ).
  8. «Самарскэ хэкур-2».
  9. «СШОР N 9» (Ярославль).
  10. «СШОР N 8» (Ростов-на-Дону).
  11. «Московскэ хэкур».
  12. «Академия гандбола-2» (Краснодар).
    ХагъэунэфыкIырэ чIыпIэхэр къыдэзыхыгъэхэм зэрафэгушIуагъэхэм дакIоу, зэнэкъокъум иешIэкIо анахь дэгъухэри къыхагъэщыгъэх. Адыгеим икомандэ пштэмэ, ыпэкIэ анахь лъэшэу щешIагъэу къыхахыгъэр София Таджимухомедовар ары, ащ зэIукIэгъуи 7-м къэлапчъэм Iэгоо 47-рэ щыдидзагъ, командэм иешIэкIо анахь дэгъур Виктория Баховар ары.
    Урысые зэнэкъокъухэм яхэ­шыпыкIыгъэ командэ хэхьагъэх: Е. Николаевар (къэлэп­чъэIут, Санкт-Петербург), В. Сос­нов­скаяр (Ростов-на-Дону), А. Митрофановар («Самарскэ хэкур-2»), С. Абалонскаяр (Волгоград), К. Ассадулинар («Астраханскэ хэкур-1»), С. Таджимухо­медовар (Мыекъуапэ), А. Солониченковар (Москва).