Мэкъэтынхэр лъэкIуатэх
«ЩыIэныгъэм пае инфраструктурэр» зыфиIорэ лъэпкъ проектым къыдыхэлъытагъэу зэхащэгъэ мэкъэтынхэр зэрэкIохэрэр шъугу къэтэгъэкIыжьы.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, Адыгеим зымакъэ щызытыгъэр мы уахътэм нэбгырэ 30500-м ехъу.
Адыгеим икъэлэ шъхьаIэ дэсэу нэбгырэ 20300-м ехъу мэкъэтынхэм ахэлэжьэгъах. Мы уахътэм чылысэу Успение Пресвятой богородицы къыпэIулъыр апэ ит, нэбгырэ 10995-мэ ащ амакъэхэр фатыгъэх. Хэгъэгу зэошхом хэкIодагъэхэм ясаугъэт ыуж къэкIы — мэкъэ 6297-рэ, урамэу Шоссейннэм тет скверыр къыхэзыхыгъэр нэбгырэ 3912-рэ мэхъу.
Къэлэ гъэпсыкIэ зиIэ Инэм псэупIэ коимкIэ къуаджэу БжыхьэкъоякIэм дэт культурэм и Унэ дэжь щыт кIэлэцIыкIу джэгупIэм пэрытныгъэр ыIыгъ. Къоджэдэс нэбгырэ 3857-мэ ащ амакъэхэр фатыгъэх. Къутырэу Суповскэм икIэлэцIыкIу джэгупIэ мэкъэ 366-рэ къыугъоигъ. ПсэупIэ коимкIэ мэкъэтынхэм ахэлэжьагъэр нэбгырэ 4223-рэ.
Поселкэу Яблоновскэм щыщэу зымакъэ зытыгъэр нэбгырэ 5997-рэ. Ащ иурамэу Космическэм тет унэу 37-м дэжь щыIэ кIэлэцIыкIу-спорт площадкэр апэ ит, мэкъэ 2370-рэ фатыгъ. Ащ ыуж ит, мэкъэ 1660-рэ къыугъоигъ, Лениным ыцIэ зыхьырэм иобщественнэ чIыпIэ. Джащ фэдэу урамэу Космическэм тетэу джыри зы площадкэ, Краснодарскэм тетэу ащ фэдэ чIыпIэ мэкъэтынхэм ахагъэлажьэх. Зым нэбгырэ 1050-мэ, адрэм 917-мэ амакъэхэр афатыгъэх.
Шъугу къэдгъэкIыжьын мэкъуогъум и 12-м нэс ахэр кIощтых. ШIоигъоныгъэ зиIэхэр мы ссылкэмкIэ хэлэжьэнхэ алъэкIыщт: zagorodsreda.gosuslugi.ru.