Адыгабзэм икъызэтегъэнэнрэ ихэгъэхъонрэ дэлэжьэрэ Проектнэ офисым хэтхэм Темыр Осетием IофшIэгъу дэкIыгъо щыряIагъ. Ныдэлъфыбзэм икъызэтегъэнэнрэ изэгъэшIэнрэкIэ гъунэгъу шъолъырым шIэныгъэу IэкIэлъымрэ екIолIакIэу ыгъэфедэхэрэмрэ защагъэгъозагъ.

Гуманитар ушэтынхэмкIэ Адыгэ рес­публикэ институтэу КIэрэщэ Тембот ыцIэ зыхьырэм ипащэ игуадзэу Беданэкъо Марзият, Проектнэ офисым хэт кIэлэегъаджэхэр, кIэлэцIыкIу IыгъыпIэхэм япащэхэр лIыкIо купым хэтыгъэх. Ахэм еджэпIэ, кIэлэцIыкIу IыгъыпIэ заулэ зэрагъэлъэгъугъ, бзэ зэфэшъхьафхэм язэгъэшIэн зэрэщырекIокIырэм зыщагъэ­гъозагъ.
— Проектнэ офисым, гуманитар ушэтынхэмкIэ Адыгэ рес­публикэ институтэу КIэрэщэ Тембот ыцIэ зыхьырэм ипащэу ЛIыIужъу Адам ягукъэкIкIэ Темыр Осетием теблэгъагъ. Iоф­шIэгъу дэкIыгъор дэгъоу рекIо­кIыгъ. Владикавказ дэт «Алан гимназием», къэлэ ыкIи къоджэ кIэлэцIыкIу IыгъыпIэхэм тащыIагъ. ЕджапIэу «Эрудитыр» зэдгъэлъэгъугъ. ЗэIукIэгъу пэпчъ Iэнэ хъураехэр къыдыхэлъытэ­гъагъэх. Шъолъырым гъэсэныгъэмкIэ илIыкIохэм гущыIэгъу тафэхъугъ, — къыщитхыгъ Проектнэ офисым ителеграм-нэкIубгъо Беданэкъо Марзият.
Ныдэлъфыбзэм икъызэтегъэнэнрэ ихэгъэхъонрэ кавказ лъэпкъхэмкIэ гумэкIыгъо шъхьаIэу щыт. Ащ тегъэ­псы­хьэгъэ хэушъхьафыкIыгъэ программэр Темыр Осетием игъэкIотыгъэу щэлажьэ. КIэлэцIыкIу IыгъыпIи 115-мэ бзабэ зэзыгъэшIэрэ купхэр ащызэхэщагъэх. ЕджэпIэ 18-мэ егъэджэнымрэ пIуныгъэм­рэ осетиныбзэкIэ зыщыре­кIокIырэ классхэр яI. Егъэджэн сыхьатхэр ныдэлъфыбзэ закъокIэ зыщарагъэхьырэ гимназии шъолъырым щэлажьэ.
Анцокъо Ирин.