АР-м мэкъумэщ хъызмэтымкIэ и Министерствэ тызэрэщигъэгъозагъэмкIэ, Адыгеим ичIыгулэжьхэм гъэтхэсэ лэжьыгъэхэм япхъын ыкIэм рафылIагъ.
Мыгъэ пстэумкIи гектар 104721-рэ республикэм щагъэнэфэгъагъ. Ащ щыщэу гектар 57489-р — тыгъэгъазэм, 16833-р лэжьыгъэ ашIыщт натрыфым апай, гектар 10112-м пынджыр халъхьащт, хьарыхъу джэнч гектар 1701-рэ, зэнтхъэу 442-рэ апхъыщт.
Джащ фэдэу тичIыгулэжьхэм мыгъэ сое гектар 12374-рэ, гъэтхэсэ хьэу гектар 212-рэ, Iэзэгъу уцхэр, «эфирнэкIэ» заджэхэрэ дагъэхэр зыхашIыкIырэ къэкIыхэрэу гектар 1033-м ехъу, илъэс пчъагъэхэм къыхэкIыжьырэ уцхэр гектар 889-м ехъу, илъэс къэс халъхьэрэ уцхэу 1038-рэ, былымIус ашIынэу натрыф гектар 1980-рэ ап­хъыщт, хэтэрыкIхэм гектари 131-рэ, картофым гектар 51-рэ, къэбжъыем, хъырбыдзым ыкIи нашэм гектари 9 арагъэубытыщт.
Тыгъэгъазэм щыщэу 54580-м ехъу халъхьэгъах, пынджым гектар 7059-рэ хагъэкIыгъ, лэжьыгъэ ашIыщт натрыфым инахьыбэри, ар 14000-м ехъу, соеу 7438-рэ апхъыгъах.
Анахьыбэу гъэтхэсэ лэжьыгъэр мы­гъэ хэзылъхьащтыр Джэджэ районым ичIыгулэжьхэр ары. ПстэумкIи гектар 25475-рэ агъэнэфагъ. Ащ щыщэу 12039-р тыгъэгъазэм, 5003-р соем арагъэубытыщт, лэжьыгъэ ашIыщт натрыфэу гектар 4681-рэ, зэнтхъэу 68-рэ, хьарыхъу джэнчэу 1404-рэ халъхьащт, Iэзэгъу уцхэр, «эфирнэкIэ» заджэхэрэ дагъэхэр зыхашIыкIырэ къэкIыхэрэу гектар 766-рэ агъэнэфэгъагъ, ар апхъыгъах.
Ахэм анэмыкIэу мы районым ичIыгулэжьхэм илъэс пчъагъэхэм къы­хэкIыжьырэ уцхэу гектари 152-рэ, илъэс къэс халъхьэрэ уцхэу 203-рэ, былымIус ашIынэу натрыф гектар 960-рэ халъхьэн гухэлъ яI, хэтэрыкI гектари 8,5-рэ, картоф гектар 26-рэ, къэбжъые, хъырбыдз ыкIи нэшэ гектари 3 агъэтIысхьащт. Мы уахътэм гъэтхасэхэм ахагъэкIыгъэр пстэумкIи 22582-м ехъу.
Гъэтхэсэ гектар 16698-рэ Кощхьэблэ районым ичIыгулэжьхэм агъэнэфагъ. Ащ щыщэу гектар 9000-р — тыгъэ­гъаз, 6600-р лэжьыгъэ ашIыщт натрыф, гектар 668-р — сое, зэнтхъым — гектари 160-рэ, хьарыхъу джэнчым гектар 80 арагъэубытыщт.
Джащ фэдэу илъэс къэс халъхьэрэ уцхэу гектари 3, былымIус ашIынэу натрыф гектар 45-рэ халъхьэн гухэлъ яI, хэтэрыкIхэм гектар 14, картофым гектари 8 арагъэубытыщт. Мы уахътэм пстэумкIи гектар 15600-м ехъу апхъы­гъах.
Шэуджэн районым игъэтхасэхэри анахьыбэхэм ащыщых. ПстэумкIи гектар 14557-рэ ащ ичIыгулэжьхэм яI. Ащ инахьыбэм, ар гектар 11820-р ары, тыгъэгъазэр халъхьащт, гектар 2100-р лэжьыгъэ ашIыщт натрыфым, гектар 580-р пынджым арагъэубы­тыщт, илъэс пчъагъэхэм къыхэкIыжьырэ уцхэу гектар 40-м ехъу халъхьащт, хэтэрыкI гектари 4, картоф гектари 7, къэбжъые, хъырбыдз ыкIи нэшэ гектари 6 агъэтIысхьанэу агъэнэфагъ. Шэуджэн районым гъэтхасэхэм яхэлъхьан щаухыгъ пIоми хъущт.
ХЪУТ Нэфсэт.