Адыгэ Республикэм ибоксеритIумэ боксымкIэ Европэм ипервенствэ хэлэжьэнхэу фитыныгъэ къыдахыгъ. Ащ фэдэ амал къязытыгъэр Уры­сыем изэнэкъокъоу къалэу Краснодар щыкIуагъэм изэфэхьысыжь ары.

Мыщ илъэс 19 – 22-рэ зыныбжь спортсменхэр хэлэжьагъэх. СпортымкIэ дунэе класс зиIэ ма­стерэу Николай Павлюк ишIэжь фэгъэхьыгъэ зэнэкъокъум тишъо­лъыр илIыкIохэу Мушег Баяндурянрэ Евгений Жоровымрэ гъэ­хъэгъэшIухэр щашIыгъэх, тIуми текIоныгъэр къыдахыгъ.
Тибоксерхэм республикэм икъэлэ шъхьаIэ испорт еджапIэхэм защагъасэ, Александр Кимрэ Карлен Восканянрэ ятренерых. Адыгеим ыцIэ дахэкIэ рязыгъэIогъэ тикIалэхэм къафэгушIуагъ АР-м и ЛIышъхьэ. Те­кIоныгъэу къыдахыгъэм ишIуа­гъэкIэ ахэм дунэе мэхьанэ зиIэ зэнэкъокъум Урысыер къыщагъэлъэгъощт.
УФ-м и Президентэу Владимир Путиным игукъэкIыкIэ агъэцэкIэрэ къэралыгъо программэу «Физическэ культурэм ыкIи спортым хэхъоныгъэ ашIыныр» зыфиIорэм къыдыхэлъытагъэу мы зэнэкъо­къур рагъэкIокIыгъ.