Адыгэ къэралыгъо университетым правэмкIэ и Институт ипащэу, тарихъ шIэныгъэхэмкIэ докторэу, профес­сорэу Шъоджэ Азэмат мы мафэхэм я XIII-рэ дунэе юридическэ форумэу Санкт-Петербург щыкIуагъэм хэлэжьагъ.

Ащ къэралыгъо 91-мэ къарыкIыгъэ нэбгырэ 5100-рэ фэдиз щызэрэугъоигъ. ЮстициемкIэ министрэхэр, генеральнэ прокурорхэр, апшъэрэ ыкIи конституционнэ хьыкумхэм ялIыкIохэр, юристхэр, шIэныгъэлэжьхэр, экспертхэр ащ хэлэжьагъэх.
Адыгэ къэралыгъо университетым ыцIэкIэ Шъоджэ Азэмат Iофтхьабзэм хэлэжьагъ. Платформэ экономикэм ама­лэу къытыхэрэм, бзэджэшIэным изытет джырэ технологиехэм зэрэзэрахъокIырэм, юстицием ицифрэ амалхэм, цIыфым ифитыныгъэхэр къэухъумэгъэнымкIэ дунэе зэзэгъыныгъэхэм ыкIи нэмыкI лъэныкъохэм атегущыIагъэх.
Мы илъэсым форумым итемэ шъхьаIэр «Правэр: блэкIыгъэм иурокхэмкIэ неущрэ мамырныгъэр». Программэм Iофтхьэбзи 120-рэ фэдиз къыдыхэлъы­тэгъагъ, сессиехэр, къэгъэлъэгъонхэр, лекциехэр, зэхэсыгъохэр зэхащагъэх, шIэныгъэу аIэкIэлъхэмкIэ зэхъожьыгъэх, зигъо къэсыгъэ Iофыгъохэм атегущыIагъэх. Урысые Федерацием щынэгъончъэнымкIэ и Совет ипащэ игуадзэу Дмитрий Медведевыр, хабзэ зэрэхъугъэу, Iофтхьабзэм хэлэжьагъ.
Шъоджэ Азэмат мы мафэхэм къызы­хъугъэ мафэр хигъэунэфыкIыгъ, ыныбжь илъэс 60 хъугъэ. Адыгэ къэралыгъо университетым ищыIэныгъэ гъогу рипхыгъэу, илъэс 40 фэдиз хъугъэу ищытхъу аригъаIозэ иIофшIэн егъэцакIэ. 1989-рэ илъэсым Адыгэ къэралыгъо кIэлэегъэджэ институтым тарихъымкIэ ыкIи советскэ правэмкIэ икафедрэ иассистентэу Iоф­шIэныр ыублэгъагъ. 1995-м юридическэ факультетым идекан игуадзэу, теорием­кIэ, тарихъымкIэ ыкIи правэмкIэ ка­федрэм ипащэу, нэужым факультетым идеканэу лэжьагъ. 2022-рэ илъэсым къыщегъэжьагъэу апшъэрэ еджапIэм правэмкIэ и Институт ипащэу Iоф ешIэ.
1999-рэ илъэсым Урысыем хэгъэгу кIоцI IофхэмкIэ и Министерствэ епхыгъэ университетэу Санкт-Петербург дэтым диссертациер къыщигъэшъыпкъэжьыгъ ыкIи юрист шIэныгъэхэмкIэ доктор ­хъугъэ.
Илъэс зэкIэлъыкIохэм IофшIэнышхо ыгъэцэкIагъ, монографии 3-мэ яавтор, егъэджэн-методическэ пособиехэр ­къы­дигъэкIыгъэх, научнэ статья 120-рэ ытхыгъ ыкIи апшъэрэ юридическэ журналхэм яредколлегие хэхьэ.
Непэрэ мафэм Шъоджэ Азэмат апшъэ­рэ еджапIэм ипроектэу «Право устойчивого развития и региональная без­опасность» зыфиIорэм ипащ. 2004-рэ илъэсым къыщегъэжьагъэу 2016-м нэс Адыгэ Республикэм и Конституционнэ хьыкум яхьыкумышIэу Iоф ышIагъ, Урысыем иконституционалистхэм я Ассоциацие и Адыгэ шъолъыр къутамэ ипащ.
Шъоджэ Азэмат Адыгэ Респуб­ликэм изаслуженнэ юрист, УФ-м гъэсэны­гъэмкIэ иIофы­шIэ гъэшIуагъ. «150 лет судебной реформы в России» зыфи­Iорэ медалыр къыфагъэшъошагъ, джащ фэдэу АР-м и Къэралыгъо Со­вет — Хасэм, респуб­ликэм и Конституционнэ хьыкум, Урысые общест­веннэ организациеу «Урысыем июристхэм я Ассоциацие» зыфиIорэм ящытхъу тхылъхэр къыфа­гъэшъо­ша­гъэх.
Зыгъэхьазырыгъэр
ДЕЛЭКЪО Анет.