ЯшIэныгъэхэм ахагъэхъуагъ
ЖъоныгъуакIэм и 23-м къыщегъэжьагъэу и 25-м нэс псэупIэу Краснооктябрьскэм дэт зыгъэпсэ-фыпIэу «Турист» зыфиIорэм Адыгэ Республикэм ыкIи Краснодар краим ащыпсэурэ быслъымэн-
хэм я ДиндэлэжьапIэ иимамхэм яшIэныгъэхэм ахэгъэхъогъэнымкIэ егъэджэнхэр афызэхащагъэх. Iофтхьабзэм изэхэщакIох ХъокIо Заурбыйрэ Хъущт Азэматрэ.
Ислъам диным пылъ шапхъэхэм язэгъэшIэнкIэ узыгъэгъозэрэ программэ игъэкIотыгъэ Iофтхьабзэм хэлажьэхэрэм афызэхагъэуцуагъ. ШIошъхъуныгъэм, фикхым алъапсэ, къурIан егъэджэным, хьадис шIэныгъэм афэгъэхьыгъэу лекциехэм къафеджагъэх.
— Егъэджэнхэр мэфищэ кIуагъэх. КIэухым мыщ хэлэжьагъэхэм зэфэхьысыжь ушэтынхэр атыгъэх, ащ ыуж зэреджагъэхэр къэзыушыхьатырэ сертификатхэр аратыжьыгъэх. Имамхэм яшIэныгъэхэм ахагъэхъонхэм, дин ыкIи шIэныгъэзехьэ IофшIэныр гъэлъэшыгъэным афэшI мыщ фэдэ егъэджэнхэр илъэсым тIогъогогъо зэхэтщэнхэу зэдэтштагъ, — къыщаIуагъ Адыгэ Республикэм ыкIи Краснодар краим ащыпсэурэ быслъымэнхэм я ДиндэлэжьапIэ.