УФ-м и Социальнэ фонд АР-мкIэ и Къутамэ сэкъатныгъэ зиIэ кIэлэцIы­кIухэм е къызыхъугъэм къыще­гъэжьа­гъэу апэрэ купым хахьэрэ сэкъатны­гъэ зиIэхэм алъыплъэхэрэм мазэ къэс къафэкIорэ ахъщэ тыныр про­центи 9,5-кIэ 2025-рэ илъэсым имэзае и 1-м къыщегъэжьагъэу индекса­цие ышIыгъ.

Ар сомэ 10950-рэ зэрэхъугъэр, Адыгеим щыпсэурэ унэгъо 390-мэ къафэкIо.
ЫпэкIэ мы ахъщэ тыныр ны-тыхэр, сабыим лъыплъэнэу е ыпIунэу зыштагъэхэр ары къызфакIощтыгъэхэр, нэмыкIэу зынаIэ атетыхэм сомэ 1200-рэ къаратыщтыгъ.
— Сомэ 10000-р къызфэкIощтхэм яспискэ хагъэ­хъуагъ. Джы мы ахъщэр ны-тыхэм, лъыплъэнэу е ыпIунэу зыштагъэхэм анэмыкIэу, IофшIапIэ Iутыным ыныбжь нэсыгъэу, ау сэкъатныгъэ зиIэ кIэлэцIыкIум е къызыхъугъэм къыщегъэжьагъэу апэрэ купым ха­хьэрэ сэкъатныгъэ зиIэм зэрэлъыплъэрэм къыхэкIэу Iоф зымышIэхэрэм зэкIэми къаратыщт, — къыIуагъ УФ-м и Социальнэ фонд АР-мкIэ и Къутамэ ипащэу МэщлIэкъо Хьамид.
Ащ фэдэу ахъщэ тыныр къызтефэхэрэм ар агъэ­псыным пае Социальнэ фондым АР-мкIэ и Къутамэ «иклиентскэ къулыкъу» зыкъыфагъэзэн фае. ЕтIанэ илъэс къэс тхылъыр къагъэлъэгъонэу щыт.
Сэкъатныгъэ зиIэ кIэлэцIыкIум е къызыхъугъэм къыщегъэжьагъэу апэрэ купым хахьэрэ сэкъатныгъэ зиIэм лъыплъэрэм а уахътэр иилъэс IофшIагъэхэм ахалъытэ, пенсиехэмкIэ коэффициентэу нэужым пенсиер зэрэфагъэуцущтхэм ахэхъо. Зы илъэсэу зэрэлъыплъэрэ пэпчъ коэффициент 1,8-рэ ыкIи зы илъэс IофшIагъэ иIэ мэхъу.
Шъугу къэтэгъэкIыжьы, сэкъатныгъэ зиIэ кIэлэ­цIыкIум е къызыхъугъэм къыщегъэжьагъэу апэрэ купым хахьэрэ сэкъатныгъэ зиIэм лъыплъэрэр мэфэныкъом пэIудзыгъэ шIыкIэм тетэу е унэм исэу Iоф ышIэн фит. Ащ фэшI IофшIэпIэ чIыпIэр къезытыгъэм зэзэгъыныгъэу дишIыгъэмрэ IофшIэкIэ амалэу иIэхэр зыфэдэр зэрытхэгъэ тхылъымрэ къыгъэлъэ­гъонхэ фае.

ГъэпцIакIохэм шъуафэсакъ!

УФ-м и Социальнэ фонд АР-мкIэ и Къутамэ тишъолъыр щыпсэухэрэр гъэпцIакIохэм афэсакъынхэу къяджэ. БзэджашIэхэм цIыфхэр, анахьэу нэжъ-Iужъхэр, зэрагъэпцIэщтхэ шIыкIэ­хэр бэу къагъотых.

Къышъуфытеохэу Социальнэ фондым и Къутамэ иIофышIэу къышъуаIомэ, шъушIошъ шъумыгъэхъу, «шъуиунэе даннэхэр», гущыIэм пае, паспортым итхэр, банкым икартэ иномер, нэмыкIхэр яшъумытых. Къута­мэм испециалистхэр цIыфхэм афытеохэрэп, «клиентскэ къулыкъум» къырагъэблагъэхэрэп, банкым щыряIэ счетхэм язытет, картэм иномер, икод, ипароль, унэе счетым, страховой номерым (СНИЛС), паспортым арытхэм, нэмыкIхэм акIэупчIэхэрэп.
— Социальнэ фондым и Къутамэ иIофышIэу зыIорэ гъэпцIакIом илъэс IофшIагъэу шъуиIэр къызалъытэм хэукъоныгъэ хашIыхьагъэу, шъуипенсие икIэрыкIэу къалъытэжьыным пае шъо шъушъхьэкIэ шъуекIолIэн фаеу къышъуиIон ылъэкIыщт. ЦIыфым «иунэе кабинет» бзэджашIэхэр ихьагъэхэу, социальнэ ахъщэ тын фагъэнэфэным пае лъэIу тхылъ ытын фаеу е ны мылъкум къыдэлъытэгъэ ахъщэр Iэрылъхьэу къыратыщтэу къыраIоу къыхэкIы. «Унэе даннэхэм» телефонымкIэ акIэупчIэхэрэр гъэпцIакIохэр ары ныIэп. Ар зыщы­жъугъэгъупшэ хъущтэп, — къыкIигъэтхъыгъ Къутамэм ипащэу МэщлIэкъо Хьамид.
ГъэпцIакIохэм шъуиахъщэ къызIэкIагъэхьаным фэшI шIыкIэ зэфэшъхьафхэр къаугупшысых, пшъэрылъэу зыфагъэуцужьырэр зы — къэралыгъо фэIо-фашIэхэм япортал е мобильнэ банкым ащышъуиIэ нэкIубгъохэм арыхьанхэр ары. Цыхьэ афэзышIыхэрэм ацIэкIэ чIыфэхэр къаIэкIахых е ясчетхэм арылъ ахъщэр аратыгъукIы.
Къышъуфытеуагъэм шъуцIэ, шъуятэ ыцIэ ышIэу, шъуиунагъо хэшIыкI фыриIэу, Социальнэ фондым АР-мкIэ и Къутамэ иадрес шъыпкъэ къеIоми, шъу­шIошъ шъумыгъэхъу. Ахэр къызэрэзыIэкIагъэхьащт шIыкIэ зэфэшъхьафыбэ щыI.
Мы лъэныкъохэмкIэ упчIэ шъуиIэмэ ЗыкI клиентскэ гупчэм шъукъытеон шъулъэкIыщт. Мары телефо-
ныр: 8(800)100-00-01 (ыпкIэ хэлъэп), блыпэ-мэфэку мафэхэм, пчэдыжьым сыхьатыр 9-м щегъэжьагъэу 6-м нэс, бэрэскэшхом 9-м щегъэжьагъэу 5-м нэс Iоф ешIэ.
Социальнэ хъытыуми тижъугъотэщт:
https://vk.com/sfr.respublikaadigeya, https://ok.ru/group/7000000I89II68, https://t.me/osfrrespublika
adigeya.
зыгъэхьазырыгъэр Хъут Нэфсэт.