Мазэм къыкIоцI адыгэ ыкIи урыс культурэхэм ямафэ­хэу республикэм щыре­кIокIыгъэхэр ыкIэм фэкIуагъэх. Культурнэ хэхъоныгъэмкIэ гупчэу «Ошъадым» урыс культурэм ифестивалэу щызэхаща­гъэм ахэр зэфишIы­жьыгъэх.

Адыгеим ипсэупIэ пстэури къызэлъызыу­бытыгъэ Iофтхьабзэм икIэщакIор АР-м лъэпкъ IофхэмкIэ, IэкIыб къэрал­хэм ащыпсэурэ тилъэп­къэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет. Лъэпкъ IофхэмкIэ къэралыгъо агентствэр иIэпыIэгъоу илъэсих хъугъэу зэхещэ. Апэрэ уахътэм адыгэ ыкIи урыс культурэхэм ямафэхэр зыщыкIощтыгъэхэр Мые­къуапэмэ, аужырэ илъэситIум районхэм япсэу­пIэхэр зэкIэ Iофтхьабзэм хагъэлажьэх. Ар къыщи­Iуагъ ишIуфэс гущыIэ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет ипащэу Шъхьэлэхъо Аскэр.

— Мыщ дэжьым район гупчэхэр арэп тэркIэ шъхьаIэхэр, къуаджэхэр, къутырхэр ары. Ащы­псэурэ пчъагъэм емы­лъытыгъэу зэкIэри къы­зэлъаубытынэу, зылъэгъу­рэр, хэлажьэрэр нахьыбэнэу тыфай. ГъэрекIорэ фестивалыр ащ фэдэу зы­ретэгъэкIокIым цIыфхэм лъэшэу агу рихьыгъ. Джы мыгъи ащ фэдэу лъыдгъэкIотагъ, ау чы­лагъохэр зэблэтхъугъэх. Мы­гъэ Еленовскэм фестивалыр зыщыретэгъэ­кIо­кIым, къэшъокIо купхэм ахэтхэу курд кIэлэ­цIыкIу­хэр хэлэжьагъэх. Ахэм яплъынхэу янэ-ятэхэр къе­кIолIагъэх. Бэ мыхъу­хэми ар екъу. Арышъ, мэхьанэу фестивалым иIэр цIыф лъэпкъ зэфэшъхьафхэр зэхи­щэнхэр, зым икультурэ адырэм ригъэлъэ­гъуныр ары, — еIо Шъхьэлэхъо Аскэр.
Мыекъуапэ итворческэ куп зэфэшъхьафхэр, орэдыIохэр, къэшъуакIохэр урыс культурэм ифестиваль хэлэжьагъэх. Къэгъэлъэ­гъон гъэшIэгъонхэр щагуми, гупчэ кIоцIми цIыфхэм къыщяжагъ. Концерт ужым урыс шхыныгъохэмкIэ мэфэкIым къекIолIагъэхэр ахьэкIагъэх.
КъызэIуахыгъакIэми, Iофтхьэбзэ дэхабэмэ чIыпIэшIу афэхъунэу игъо ифэгъэ культурнэ хэхъоныгъэмкIэ гупчэу «Ошъадым» АР-м лъэпкъ Iоф­хэмкIэ, IэкIыб къэралхэм ащыпсэурэ тилъэп­къэгъухэм адыряIэ зэпхы­ныгъэхэмкIэ ыкIи къэ­бар жъугъэм иамалхэмкIэ и Комитет ипащэу Шъхьэлэхъо Аскэр щытхъу тхылъ къыфигъэшъошагъ. Лъэпкъ зэныбджэгъуныгъэр пытэнымкIэ иIахьышIоу хилъхьэрэм фэшI ащ ипащэу Едыдж Викторие «тхьауегъэпсэу» риIуагъ.
Адыгэ ыкIи урыс культурэхэм яфестиваль къэ­кIорэ илъэсми Iоф ышIэщт. НэмыкI лъэпкъхэу Адыгеим щыпсэухэрэм ямафэхэри Iофтхьабзэм хагъэхьанхэм дегупшысэщтых.
Анцокъо Ирин.