КъокIыпIэм щыпсэурэ цIыф ­лъэпкъхэм яискусствэ и Къэ­ралыгъо музей икъутамэу
Мые­къуапэ дэтым къэгъэлъэ­гъонэу «Темыр Кавказым щы­псэурэ лъэпкъхэм ящыгъын-­шъуаш» зыфиIорэр къыщызэ­Iуахыгъ.

Ар шIуфэс псалъэкIэ къызэIуихыгъ музеим ипащэу ШъэуапцIэкъо Аминэт. КъокIыпIэм и Къэралыгъо музей Темыр-КавказымкIэ икъутамэ загъэпсыгъэр илъэс 40 зэрэхъурэм мэфэкIыр зэрипэгъокIыр ащ кIигъэтхъыгъ. Мы уахътэм музеим лъэпсэ дахэ зэришIыгъэр къыIуагъ, зигъо Iофтхьабзэм музеим икъутамэ ежь иугъоигъэхэр, АР-м и Лъэпкъ музей къычIахыгъэхэр, Темыр Осетием — Аланием, Адыгеим иеджэпIэ зэфэшъхьафхэм — Мыекъопэ къэралыгъо гуманитар-техническэ колледжым, Адыгэ къэралыгъо университетым, ­ансамблэу «Кубаночкам» ящыгъын-шъо­шэ теплъэ ыкIи АдыгеимкIэ IэпэIасэхэу дышъэидэм дэлажьэу Л. Гумэм, З. Джа­рымэкъом, С. Сетым, А. Хъура­нэм, А. Блэгъожъым, М. Хьамырзэм ыкIи мыхэм анэмыкIхэм яIэшIагъэхэр хэхьагъэх. ШъэуапцIэкъо Аминэт къызэриIуагъэмкIэ, къэгъэлъэгъоным экспонат 300 Iэпэ-цыпэ хэлажьэ, ахэр зэкIэ Кавказым щыпсэурэ цIыф лъэпкъхэм яшъуашэ къэзгъэкIэрэкIэрэ пкъыгъо гъэ­шIэгъоных; ежь лъэпкъ пэпчъ ищы­IакIэ, ынапэ тешIыкIыгъэх. Мы шъошэ джанэхэр, бгырыпххэр, бзылъфыгъэ паIор, тыжьыным хэшIыкIыгъэ бгъэгупэ чыIур IапэкIэ ашIыгъэ закIэх, джарэу дышъэидэмкIи, дышъэ ыкIи тыжьын пкъыгъохэр шIыгъэнхэмкIи IэпэIасэхэр бэу яIагъэх.

Къэгъэлъэгъоным хэлэжьагъ ыкIи къыщыгущыIагъ АР-м культурэмкIэ иминистрэу Аулъэ Юрэ. Я XIX-рэ лIэшIэ­гъум икъежьапIэм ыкIи я XX-рэ лIэшIэгъум анахьэу ашIыгъэ лъэпкъ щыгъын-шъуа­шэхэр, ахэр зэрэгъэдэхэгъэ пкъыгъохэр непэрэ мафэхэм къанэсыжьыгъэхэу музейхэм зэрачIэлъхэр, непэрэ къэгъэ­лъэгъонышхор Темыр Кавказым икультурэ иIахь инэу, шъуашэр нэм къыкIэз­гъэуцоу, лъэпкъым игъэпсыкIагъэр озгъашIэу ылъытагъ. МэфэкIымкIэ пстэу­ми къафэгушIуагъ, IэшIагъэхэр зышIыхэу ащ хэлажьэхэрэм тапэкIи гъэхъагъэхэр ашIынхэу къафэлъэIуагъ.
Темыр-Кавказым щызэдэпсэурэ лъэпкъ­хэм ящыгъын-шъошэ зэфэшъхьафыбэ къыщагъэлъэгъуагъ, джащ фэдэу дышъэидэр зытет дэпкъпылъэхэр, ныс­хъапэхэу лъэпкъ джэнэ дахэхэу дышъэи­дэр зытетымкIэ гъэкIэрэкIагъэхэр бэу щыолъэгъух.
Мы проектыр зытегъэпсыхьагъэр та­рихъ шIэжьыр ухъумэгъэныр, хэти ­илъэпкъ культурэ зыфэдэр ышIэныр ыкIи ыгъэлъэпIэныр, лъэпкъ шэн-хабзэхэр ыкIи зекIокIэ-гъэпсыкIэхэр ышIэнхэр ары.
МэфэкI къэгъэлъэгъоныр зыгъэхьазырыгъэхэр музеим икъутамэу Мые­къуапэ дэтым иотдел ипащэу Фатима Сулеймановар, дышъэидэмкIэ IэпэIасэу, мы музеим инаучнэ IофышIэу Сет Сафыет ыкIи музеим иIофышIэу ПIатIэкъо Айдэмыр.
МэфэкIыр къагъэкIэрэкIагъ лъэпкъ къэшъокIо ансамблэу «Мыекъуапэ инэфылъэхэм» ыкIи лъэпкъ орэдыIо ансамблэу «Казачата» зыфиIорэм.
Дзэукъожь Нуриет.