Адыгэ Республикэм илIыкIоу, АР-м псэолъэшIынымкIэ, транспортымкIэ, псэу­пIэ-коммунальнэ ыкIи гъогу хъызмэтымкIэ иминистрэ игуадзэу Лафышъэ Рэмэзан Геническэ дэт зыгъэпсэфыпIэ еджэпIэ-интернатым бэмышIэу щыIагъ.

КIэлэцIыкIухэм якъэухъумэн и Дунэе мафэ ипэгъокIэу шIухьафтынхэр афищагъэх. Шъолъырым итамыгъэ зытет щыгъынхэр, джащ фэдэу смарт-сыхьатхэр аритыгъэх.
Херсон хэкум и Геническэ район иадминистрацие къызэрэща­IуагъэмкIэ, зыгъэпсэфыпIэ еджэпIэ-интернатым чIэс кIэлэцIыкIухэм Адыгеим иIэпыIэгъу апэрэп къызэраIэкIахьэрэр. Мыщ ыпэкIэ еджапIэм щагъэфедэщт планшетхэр афащагъэх. Джащ фэдэу рес­публикэм ишIуагъэкIэ еджапIэм зэрэщыпщэрыхьэхэрэ инженернэ системэм игъэкIотыгъэ гъэцэкIэ­жьынхэр рашIылIагъэх.